Read wanga YEREMIA 28 Bible Online

YEREMIA 28 - wanga bible

YEREMIA 28

¹Mumuyika tsana okwo, mumwesi kwakharano kwomumuyika kwakhane kwoburuchi bwa Zedekia, Hanania omusiani wa Azuri owali omulakusi okhurula Gibeoni yaboola ninasi muhekalu eya OMWAMI Nyasaye, imbeli wabesaaliisi nende abandu boosi ari,

²“OMWAMI Nyasaye omwene mahe, Nyasaye wa Isiraeli aboola mbu, efunaache obunyali bwomuruchi wa Babuloni.

³Oluhoono lwemiyika chibili ndalakalusia hano ebimanulwa biosi biomuhekalu, ebiomuruchi Nebukadineza wa Babuloni yabukula okhurula hano nabiyila Babuloni.

⁴Ndalakalusia khandi Yekonia omusiani wa Yehoyakimu omuruchi wa Yuda, halala nende abandu boosi ba Yuda abayilwa Babuloni mubuhambe. Okhuba ndalafunaka obunyali bwomuruchi wa Babulon. Nolwa isie OMWAMI Nyasaye emboola?”

⁵Mana omulakusi Yeremia naboolela Hanani ario, imbeli wa abesaaliisi nende boosi abali nibasinjiliho muhekalu eya OMWAMI Nyasaye.

⁶Naye omulakusi Yeremia naboola ari, “Lekha kabe kario, OMWAMI Nyasaye, akhoya wakhola ario. OMWAMI Nyasaye akhoya wakhola koosi akorumbuule koosibwa, mana yakalusia ebimanulwa biomuhekalu biosi nende abandu boosi abayilwa mubuhambe hano okhurula Babuloni.

⁷Nebutswa recheresia kekhuboolela iwe nende abandu boosi.

⁸Abalakusi bakhuranjilila isie ninawe khale, barumbula akobulakusi mbu lihe, inzala nende olumbe bilibaho khumahanga amanji nende khuburuchi obukhongo.

⁹Nebutswa omulakusi ourumbula amakhuwa komulembe amanyikhananga mbu toto arumilwe nende OMWAMI Nyasaye olwa amakhuwa akarumbulakhwo koosibwa.”

¹⁰Mana omulakusi Hanania nabukula lichoki okhurula mwikosi lia Yeremia nalifunaka.

¹¹Mana Hanania naboola imbeli wa abandu boosi ari, “OMWAMI Nyasaye aboola mbu, ndalafunaka lichoki liomuruchi Nebukadineza wa Babuloni yara khumahanga koosi, ne ndalakhola amakhuwa ako mumiyika chibili.” Nebutswa Yeremia yarulaho natsia.

¹²Olunyumakhwo, omulakusi Hanania namalile okhufunaka lichoki okhurula mwikosi liomulakusi Yeremia, OMWAMI Nyasaye yaboolela Yeremia ari,

¹³“Tsia oboolele Hanania ori, ‘Kano niko aka OMWAMI Nyasaye aboola mbu, ofunaache lichoki liebisaala ne mushilenje shialio ndalaraho lichoki lieshibia.

¹⁴Okhuba kano niko aka isie OMWAMI Nyasaye omwene mahe, Nyasaye wa Isiraeli emboola mbu, emalile okhura lichoki lieshibia mwikosi liamahanga koosi, nako kalakhalabanilanga Nebukadineza omuruchi wa Babuloni. Okhuba ndamuhelesiye kata tsisolo nabulimo okhumukhalabanila.’ ”

¹⁵Kho omulakusi Yeremia naboolela Hanania omulakusi wobubeeyi ari, “Recheresia, iwe Hanania, OMWAMI Nyasaye shiyakhurumilekhwo tawe, ne okholanga abandu bano okhusuubila akobubeeyi.

¹⁶Khulweshio, OMWAMI Nyasaye aboola ari, ‘Lola, ndalakhurusia khushialo khuno. Olafwa khumuyika kuno, shichila wabooleele abandu okhuukholela isie OMWAMI Nyasaye akobukhayi.’ ”

¹⁷Ne mumuyika tsana okwo mumwesi kwomusafu, omulakusi Hanania nafwa.