Read wanga YEREMIA 29 Bible Online

YEREMIA 29 - wanga bible

YEREMIA 29

¹Eyilondakhwo yino niyo ibarwa yomulakusi Yeremia yahandika nali Yerusalemu, yahandichila abakhulundu abali nibashiliho mubuhambe, abesaaliisi, abalakusi nende abandu boosi bomuruchi Nebukadineza yali niyabukula okhurula Yerusalemu nabayila Babuloni.

²Yeremia yahandika ibarwa yino olunyuma lwomuruchi Yekonia nende nyinamwana, abakhongo bomuruchi, abakhulundu ba Yuda nende ba Yerusalemu, nende abandu abasitsa nende aberaanyi boosi bali nibayililwe mubuhambe.

³Ibarwa yino yayilwa nende Elesa omwana wa Shefani nende Gemaria omwana wa Hilikia, abomuruchi Zedekia wa Yuda yali narumile okhutsia Babuloni. Ibarwa tsana yaboola endi,

⁴“Isie OMWAMI Nyasaye omwene mahe, Nyasaye wa Isiraeli, emboolela abahambe boosi abandalekha nibabukulwa okhurula Yerusalemu, nibayilwa Babuloni ari;

⁵mumbashe tsinzu mumenyemwo, muraache emikunda mana muli ebiehese biachio.

⁶Muteshie abakhasi mana mwibule ninabo abaana abasiani na abakhaana. Helesie abaana benywe abasiani abakhasi bateshie, nabo abakhaana benywe mubabashe bateshibwe kho mbu, bosi bebule abaana abasiani nabakhaana. Mwibulaneyo mube abanji mulatuutuha tawe.

⁷Mukhaabenje akomulembe khulwa litookho liemuyililemwo okhuba abahambe, nimusaaya OMWAMI Nyasaye khulwalio, shichila niliba nomulembe mwesi khandi mulaba nomulembe.

⁸Isie OMWAMI Nyasaye omwene mahe, Nyasaye wa Isiraeli emuchetsiyia mbu, mulafuchililekhwo okhukaatibwa nabalakusi nende abafumu abali mwinywe ta, kata mulareka amarwi khumalooro ka baloora tawe.

⁹Okhuba bamulakulilanga butswa akobubeeyi muliira lianje, shiendi isie owabaruma tawe. Nolwa isie OMWAMI Nyasaye emboola.

¹⁰Isie OMWAMI Nyasaye emboola mbu, olunyuma lwemiyika amakhumi musafu okhuhwa nimuli Babuloni, ndakhamwitsulile nende okhuusia obusuubisie bwanje bwokhumukalusia mushialo shienywe shino.

¹¹Okhuba nisie sienyene oumanyile aka obuloosie bwanje khwinywe, obuloosie bwokhumureerera omulembe halali amabi ta, kho mbu mube nobunaayi bwomutsinyanga tsiolunyuma.

¹²Mana mulangalushila nimunzinamila, nasi ndalahulila okhuhaba khwenywe.

¹³Mulakhaaba nimunyoola shichila mulakhaaba nomwoyo kwenywe kwosi.

¹⁴Toto mwene emboola mbu mulaanyoola, nasi ndalamukalusia mushialo shienywe. Ndalamukhung'asia okhurula mumahanga koosi nende habundu hosi ewa ndamuyila. Ndalamukalusia habundu tsana ewa ndamurusia nemuyila mubuhambe. Isie OMWAMI Nyasaye nolwa emboola.”

¹⁵“Inywe muboolanga mbu OMWAMI Nyasaye wakhubuusiliye abalakusi Babuloni,

¹⁶nebutswa OMWAMI Nyasaye aboola ari khumuruchi ourukanga lihanga lia Daudi yarukanga nende khubandu abamenyanga mwitookho lino, nibo abekho benywe abatong'a nibalatsia ninenywe mubuhambe Babuloni ta.”

¹⁷OMWAMI Nyasaye omwene mahe aboola ari, “Ndalabarumila olukanga, inzala nende olumbe, ndalabakhola babe shinga amakhuyu akabola akalanyala okhulibwa ta.

¹⁸Ndalabalondachila nolukanga, neinzala, nende olumbe. Mana abandu bamahanga kandi balichenya khu ka balilola. Habundu hosi ewa ebasalasia, abandu balichenya nende okhuhuka khu akaliba nikabekholeshekhwo. Abandu balibatseshelela nende okhwikhoonyela eliira liabwe shinga eshilaamo eshiobubi.

¹⁹Kano kalekholekha khubo shichila shibahulila oburume bwa ndabarumilanga okhubirira mubakhalabani banje abalakusi ta. Baloba okhubuhulila.

²⁰Inywe mwesi abandarusia Yerusalemu nemuyila mubuhambe Babuloni recheresie aka isie OMWAMI Nyasaye emboola.”

²¹Kano niko aka OMWAMI Nyasaye omwene mahe, Nyasaye wa Isiraeli aboola khu Ahabu omwana owa Kolayia nende Zedekia omwana wa Maaseyia abamulakulilanga amakhuwa akobubeeyi muliira lianje mbu, “Lole ndalabahana mumukhono kwa Nebukadineza omuruchi wa Babuloni, naye alabeera nimureerekhwo tsimoni.

²²Khulwa okhubeela amakhuwa aketsa okhwikholekha khubo kano, abandu boosi abarula Yerusalemu abali mubuhambe Babuloni nibeenya okhulaama omundu eshilaamo shiobubi baliboolanga mbu, OMWAMI Nyasaye akhukhole shinga olwa yakholela Zedekia nende Ahabu aba omuruchi wa Babuloni yasamba nibali mwoyo.

²³Ako niko akalibanyoola shichila bali neshikha shiokhukhola obwonooni obubi muno mu Isiraeli, baheya nabakhasi babeene, khandi nibaboola amakhuwa kobubeeyi muliira lianje, amakhuwa ka ndalabalakakhwo ta. Isie nisie oumanyile, khandi nisie omuloli. Nolwa isie OMWAMI Nyasaye emboola.”

²⁴Ne khu Shemayia Omunehelamu omuboolele ori,

²⁵“Kano niko aka OMWAMI Nyasaye mwene mahe, Nyasaye wa Isiraeli aboola mbu, waruma tsibarwa muliira lilio omwene khu bandu boosi abali mu Yerusalemu, khu Zefania omwana wa Maaseya omwisaaliisi, nende khubesaaliisi waboolela Zefania ori,

²⁶‘OMWAMI Nyasaye yakhwahuule iwe obe omwisaaliisi mushilenje shia Yehoyada, khulwa okhusinjilila Ihekalu, okhoyile okhutiila nende okhumwinjisia mumakokolo nende mubitiili biomwikosi owamalalu yesi owikhola mbu nomulakusi.

²⁷Kho bulaano mbushiina nolamukondeshela Yeremia owokhurula Anatsotsi, owekhola mbu nomulakusi khwinywe?

²⁸Okhuba ye yarumila likhuwa Babuloni yino naboolanga mbu tsinyanga tsiefwe tsiomubuhambe tsilaba tsinyinji kho khumbashe tsinzu tsiokhumenyamwo, khurache emikunda nikhulia ebiakhuchesa okhurula muchio.’ ”

²⁹Nebutswa olwa Zefania yanyoola ibarwa ya Shemayia eyo, yatsia ninayo khumulakusi Yeremia mana namusoomela.

³⁰Kho OMWAMI Nyasaye, naboolela Yeremia ari,

³¹“Ruma likhuwa khu bandu boosi abali mubuhambe Babuloni obaboolele ori,

³²‘Isie OMWAMI Nyasaye emboola mbu, ndalamuhelesia Shemayia omu Nehelamu halala nende abolwibulolwe eshinyasio. Abulaho kata mulala khu bolwibulolwe oulatong'aho omulamu okhulola amalayi ka ndakhakholele abandu banje, shichila yaboolela abandu okhuukholela kobukhayi. Isie OMWAMI Nyasaye nolwa emboola.’ ”