Read wanga YEREMIA 3 Bible Online

YEREMIA 3 - wanga bible

YEREMIA 3

¹OMWAMI Nyasaye areeba ari, “Omusaatsa naba nalonda omukhasiwe, mana omukhasi oyo ateeshele omusaatsa undi, omusaatsawe wambeli yakhafuchilila mbu omukhasi oyo akalushe noho? Eshialo eshio shishilabamwo eshifwabwi eshikhongo muno? Nebutswa iwe Isiraeli, wakholile obutamba obunji muno, ne bulano wenya khandi okhungalushila?

²Chinguula tsimonitsio ohenje khubutenje bwebikulu. Nihena habashili okhuheyakhwo ninawe? Wekhalanga khundulo wetsinjila nolindilila abatambabo, shinga olwa abandu abachendachendi bakoneshelanga abashiabwe mushitsiimi. Wareerire eshifwabwi khushialo, khulwa obutambabwo obubi bwamakana.

³Niko akachila ifula niyilakwa ta, kata ifula yeirotso yosi shiyikwitsanga tawe. Kata kario, oshiumile butswa imoni shinga omutamba, shiolikhwo neisoni khukokholanga tawe.

⁴Iwe waahabiilenje hambi hano butswa noboola ori, ‘Papa wanje, omwitsa wanje okhurula mubwana bwanje,

⁵toto olatsiililila okhuba noburuma khwisie buli lwosi noho? Olaasinyishila okhuula inziayo noho?’ Lola, nolwa iwe Isiraeli oboolanga. Nebutswa wakhola obumayanu bwosi obwa wanyalilwa.”

⁶OMWAMI Nyasaye yareeba mutsinyanga tsioburuchi bwa Yosia ari, “Olutsikhwo akabandu ba Isiraeli, ababula obwisiikwa bakhola? Bandekha nibatsia khu buli shikulu eshirambi nende mu buli eshiinikha shiomusaala omurabaafu, nibakhola obutamba!

⁷Isie ndapaaranga mbu, nibakhakhola ako koosi, balangalushila. Kata ta! Shibayangalushila ta. Abashiabwe ba Yuda ababeeyi abo, boosi bali abaloli khu kano.

⁸Okhumeeta khwako, abandu ba Yuda balola shinga olwa ndaloba Abaisiraeli nindekhana ninabo khulwa obutamba bwabwe. Ne kata kario shibaariakhwo ta, boosi khandi batsia nibakhola obutamba tsana.

⁹Ne okhuba bo balola mbu obutamba shineshindu khubo ta, bafwabia eshialo shiosi pe khulwa okhwinamila amachina nende emisaala.

¹⁰Okhumeeta khwako koosi, abandu ba Yuda shibayangalushilakhwo nomwoyo kwobwatoto ta, habula bangatia butswa, nolwa isie OMWAMI Nyasaye emboola.”

¹¹Mana OMWAMI Nyasaye niyamboolela ari. “Abaisiraeli ababula obwisiikwa, belolesiye abeene okhuba abalayikhwo okhushila abashiabwe ba Yuda ababeeyi.

¹²Tsia oboolele Abaisiraeli ori, ‘Mungalushile, inywe Abaisiraeli ababula obwisiikawa, Shindalatiilwakhwo noburuma khwinywe khandi ta, okhuba isie endi wetsimbabasi,’ nolwa isie OMWAMI Nyasaye emboola. Shindilikhusinyishilakhwo khandi ta inziayo.

¹³Fuchilila butswa obwonoonibwo, mbu wanzonoonela isie OMWAMI Nyasayewo. Wiyame mbu, buli hasi womusaala omutendeemu wenamiile abanyasaye bandi, ne shiwalinda amalako kanje tawe.” Nolwa Isie OMWAMI Nyasaye emboola.

¹⁴“Mungalushile, inywe abandu ababula obwisiikwa, okhuba nisie Omwami wenywe. Ndalabukula mwinywe omundu mulala okhurula mu buli litaala, nende babili okhurula mu buli oluyia, niibakalusia khushikulu shia Zayuni.” Nolwa isie OMWAMI Nyasaye emboola.

¹⁵“Ndalamuhelesia abemilisi abesiikwa bambulilanga isie, abalamwimilila mubuchesi nobumanyilisi.

¹⁶Mutsinyanga etsio, olwa mwakhabe nimwinjiye nimuli abanji mushialo, abandu shibakharalekhwo khandi lisanduku lieindakano yanje tawe. Shiliakhabe eliokhupaarakhwo kata okhwitsulilwakhwo tawe. Shibalilikombakhwo kata okhulikaasia khandi tawe.

¹⁷Mutsinyanga etsio, litookho lia Yerusalemu liakhalangwe mbu ‘Eshifumbi shioburuchi shia OMWAMI Nyasaye,’ nako amahanga koosi kakhakhung'ane Yerusalemu okhunzinamila isie OMWAMI Nyasaye. Shibakhakholekhwo akobumayanu kobwikombi bwemioyo chiabwe khandi tawe.

¹⁸Mutsinyanga etsio, abandu ba Isiraeli bakheetse halala nabandu ba Yuda, ne boosi halala bakharule mubuhambe mushialo shiemasaba, nibakalukha mushialo shiandahelesia abakuuka babwe okhuba obulaame bwabwe.”

¹⁹OMWAMI Nyasaye aboola ari, “Iwe Isiraeli, isie ndapaaranga mbu, ndakhakhureere mubaana banje, mana ekhuhelesie eshialo eshichamisia, obulaame obulayi bwamakana okhushila bwamahanga kandi koosi. Khandi ndapaaranga mbu, naunanje mbu, ‘Papa,’ khandi mbu shinoshiukhane nolekha okhunondakhwo tawe.

²⁰Toto mwene shinga olwa omukhasi oubula obwisiikwa alekhanga omusaatsawe, nolwa mwesi inywe abandu boluyia lwa Isiraeli, mubulile obwisiikwa khwisie murio. Nolwa isie OMWAMI Nyasaye emboola.”

²¹Tsimbungu tsiahulilikha, okhurula khubutenje bwebikulu, okhulila nende okhwikhuula khwabaana ba Isiraeli, shichila bashiama nibarula khutsinjila tsiabwe tsiahabwene, bamwibilila OMWAMI Nyasaye wabwe.

²²Mungalushile, inywe abaana ababula obwisiikwa, ndalamurusiakhwo imelo yokhubula obwisiikwa. “Inywe muboolanga muri, ‘Lola, ifwe khulakhukalushila, okhuba niwe OMWAMI Nyasaye wefwe.

²³Toto mwene okhwinamila khwebifwanani khwefwe khubikulu, nokhwabutswa. Toto, obuhonia bwa Isiraeli buli mu OMWAMI Nyasaye wefwe.

²⁴Nebutswa okhurula mubwana bwefwe akeshifwabi kefwe kasasiye koosi aka abapapa befwe bakhalabanila, ebiayo biabwe nemiruko chiabwe, abaana babwe abasiani nabakhaana.

²⁵Leshe bulano khwiyalisie hasi nikhufwimbwa omurwe, nikhufuunikhwa netsisoni. Okhuba ifwe nende abakuuka befwe, okhurula mubwana bwefwe okhuula olwa leelo shikhwahulila nende okhuria OMWAMI Nyasaye wefwe tawe.’ ”