Read wanga YEREMIA 30 Bible Online

YEREMIA 30 - wanga bible

YEREMIA 30

¹OMWAMI Nyasaye yaboolela Yeremia ari,

²“Isie OMWAMI Nyasaye, Nyasaye wa Isiraeli emboola endi, handika mushitabu amakhuwa koosi kekhubooleele.

³Okhuba tsinyanga tsitsanga olwa ndakhakalusilie abandu banje ba Isiraeli nende ba Yuda tsikhabi tsiabwe, ndakhabachelesie mushialo shiandalaamila abakuuka babwe, nashio shiakhabe eshiabwe.”

⁴Kano niko ka OMWAMI Nyasaye aboola khubandu ba Isiraeli nende aba Yuda,

⁵“Isie OMWAMI Nyasaye emboola mbu, embuliile okhulila khweindenga, okhulila khwoburi, okhulali khwomulembe tawe.

⁶Kho abeene mwireebekhwo mana mumanyilisie, omusaatsa anyala okhulumwa inzibula noho? Ne kakhabele karie kendolanga buli omusaatsa niyetiilile amakhono mushishienje shinga omukhasi oulumwa inzibula? Mbushiina buli mundu akhuuniye mumoni?

⁷Toto mwene inyanga yamatinyu yitsanga, yibulaho inyanga yindi shinga eyo tawe. Yakhabe inyanga yamatinyu khubandu bolwibulo lwa Yakobo, nebutswa balihonokosibwa.”

⁸Isie OMWAMI Nyasaye omwene mahe emboola mbu, “olwa inyanga eyo yakhoole, ndakhafunache lichoki lili mwikosi mwabwe nende okhukhalaka eminyololo chiabwe, nabo shibakhabekhwo khandi abasumba babandu bandi tawe.

⁹Habula bakhakhalabanile isie OMWAMI Nyasaye wabwe nende omuruchi womulwibulo lwa Daudi owandakhababuusilie.”

¹⁰OMWAMI Nyasaye aboola ari, “Inywe abolwibulo lwa Yakobo abakhalabani banje mularie ta, kata okhutiilwa neindenga ta, okhuba ndakhamuhonie okhurula mushialo shiehale eshio, ndakhamuhonie okhurula mushialo shiamulimwo abahambe. Mwakhachelele mushialo shienywe nimumenyamwo mumulembe, khandi abulaho oulimurisia tawe.

¹¹Okhuba isie omwene endi ninenywe okhumuhonia. Nolwa isie OMWAMI Nyasaye emboola. Ndakhasasie amahanga koosi kandamusalasiamwo, nebutswa inywe shindakhamusasie mwesi tawe. Ndakhamuhelesie eshinyasio eshimuhela, nebutswa shindakhachweye okhumuhelesia eshinyasio tawe.”

¹²OMWAMI Nyasaye aboola ari, “Amafumire kenywe shikanyala okhuhonibwa ta, amakonzo kenywe shikanyala okhusilikhwa tawe.

¹³Abulaho ounyala okhumuhendela, amakonzo kenywe kabula indesi, kubulaho omusaala kwokhumuhonia.

¹⁴Abaheelwa benywe boosi bamwibilile, shibatebakhwo eshindu shiosi khwinywe ta. Emuseerire shinga ouseera omusuku, eshinyasio shienywe neshilulu muno, shichila obwonooni bwenywe nobunji, khandi obumayanu bwenywe nobukhongo.

¹⁵Mbushiina nimwiyiniakana khulwa okhusaalila khwenywe? Okhutsunwa khwenywe shikhunyala okhuhonibwa ta. Emuhelesiye eshinyasio shino shichila obwonooni bwenywe nobunji muno, khandi obumayanu bwenywe nobukhongo muno.

¹⁶Nebutswa abo boosi abamumulula inywe boosi khandi balamululwa, abasuku benywe boosi balayilwa mubuhambe. Boosi abamuyaaya inywe boosi khandi balayaaywa abamusandia balasandibwa.

¹⁷Ndalamukalusilia obulamu, khandi ndalamuhonia amakonzo kenywe. Kata abasuku benywe nibalakhulanganga mbu, ‘Elieshilaamo sh iobubikhandi elibula owokhulilinda.’ ”

¹⁸OMWAMI Nyasaye aboola ari, “Ndakhakalusilie abolwibulo lwa Yakobo tsikhabi, nende okhubatiililwa tsimbabasi. Litookho lia Yerusalemu liakhombakhwe obuyia aha lialinji, khandi itookho yomuruchi yakhombakhwe obuyia aha yalinji.

¹⁹Abandu abamenyamwo balimba tsinyimbo tsiokhukhupa orio, balikhupa tsingalakala nibekhoya. Ndilibakhola okhwinjiha, ne shibalibakhwo abaleemu ta, ndilibakhola okhuba aboluyali, ne shibalichaaywakhwo khandi tawe.

²⁰Abaana babwe balayindila shinga olwa balinji khale, khandi lihanga liabwe lilaralila imbeli wanje. Ndilihaana eshinyasio khuboosi ababasandinjia.

²¹Omuruchi wabwe yakheebe mulala khubelihanga liabwe liene, naye omwimilisi wabwe yakharule mubo abeene. Ndakhamukhole okhuba ahambi ninasi, naye yakhasite hambi khwisie. Okhuba niwiina ounyala okhutsaalikha okhusita ahambi ninasi, isie omwene nindalamusitiye ahambi ta?

²²Nenyu mulaba abandu banje, hasi ndalaba Nyasaye wenywe.” Nolwa OMWAMI Nyasaye aboola.

²³Lola, imbumbuyeka eya OMWAMI Nyasaye njieyo! Lirumalie libuushile, eshimbalukusi eshikhongo, shilatuumushila khumirwe chiabamayanu.

²⁴Liruma lilulu elia OMWAMI Nyasaye shililakalukha hasi ta, okhuula olwa alaba namalile okhukhola nende okhuusia koosi akali mumwoyokwe. Mwakhatiile khushisina shiamakhuwa kano mutsinyanga tsiolunyuma.