Read wanga YEREMIA 31 Bible Online

YEREMIA 31 - wanga bible

YEREMIA 31

¹OMWAMI Nyasaye aboola ari, “Mutsinyanga etsio ndakhabe Nyasaye wetsimbia tsia Isiraeli tsiosi, nabo bakhabe abandu banje.”

²OMWAMI Nyasaye aboola ari, “Abandu abeehonokokha okhwiirwa, ndababeela tsimbabasi mushitsiimi. Olwa abandu ba Isiraeli bekomba okhuhuluukha,

³isie omwene ndabaloleshela nendi ehale. Isie ndamuheela inywe nobuheeli oburalilu, khulwako enziilililanga okhuba omwisiikwa khwinywe.

⁴Khandi inywe abolukoosi banje, ndalamumbakha obuyia, nenywe mularalila. Khandi mulabukula obukhana bwenywe, nimutsia okhushina nimwikhoya.

⁵Mularaaka emitsabibu khandi khubikulu bia Samaria, nabo abachiraaka balasangalila ebiamo biachio.

⁶Okhuba inyanga yitsanga yabalindi beshilo betsa okhulanjilisia nomwoyo omukhongo mubikulu bia Efuraimu bari, ‘Buushe, khutikulushe Zayuni, khutsie ewa OMWAMI Nyasaye wefwe.’ ”

⁷Okhuba OMWAMI Nyasaye aboola ari, “Yimbe nobusaangaafu khulwa Isiraeli, khupe tsingalakala khulwa lihanga likhongo mukoosi. Yimbe tsinyimbo tsienywe tsiokhwitsoomia nimuboola muri, ‘OMWAMI Nyasaye ahoniye abandube, ahoniye abasikala khu Abaisiraeli.’

⁸Lola, ndalabachelesia okhurula mushialo shiemasaba, ndalababunjelesia okhurula khundulo tsieshialo. Ababofu nende abalema balachelela halala ninabo. Balachelela nende abakhasi bali tsinda nende abali hambi okhwibula. Balachelela nibali omukanda omukhongo.

⁹Abandu banje bakhakalushe nibekhuulanga, nasi ndakhabemilile nibahotselesia. Ndakhabemilile okhubirira khumichela. Bakhaloondele khunjila ingololofu yabalesichiralakhwo ta. Okhuba nisie samwana Isiraeli, naye Efuraimu nomusiani wanje omwikulanda.”

¹⁰OMWAMI Nyasaye aboola ari, “Inywe amahanga, recheresie amakhuwa kanje, mukarumbule okhuula khubialo biehale biokhunyanza. Muboole muri, ‘OMWAMI Nyasaye owasalasia abandube Abaisiraeli alabakhung'asia, khandi alabalinda shinga lwomwayi alindanga amakondike.’

¹¹Okhuba isie ndahonokosia obulamu bwabandu ba Isiraeli, ndabahonia okhurula khwihanga liamaani amanji muno.

¹²Bakhetse nibemba nomwikhoyo omukhongo khushikulu shia Zayuni. Bakhasaangaalile ebihaanwa bianje. Ebihaanwa bieimele, idivai nende amafura kemiseituni, ebihaanwa biamakondi nende tsing'ombe. Bakhabe shinga omukunda kwatsushililwa amaatsi obulayi. Shibakhasandekhwo khandi tawe.

¹³Mana abakhaana bakhashine nibasaangaala, nabo abasaatsa, abaraaka nende abakofu boosi bakhekhoye. Ndakhakalukhasie okhwikhula khwabwe nikhukwa okhwikhoya, nashio eshibeela shiabwe nishikwa okhutsaatsahala.

¹⁴Ndakhalisie nende okhwikusia abesaaliisi nemiandu eminji, nabo abandu banje bakhekure obukoosia bwanje.” Nolwa OMWAMI Nyasaye aboola.

¹⁵OMWAMI Nyasaye aboola ari, “Omwoyo kuhulilikha mwitookho lia Rama, omwoyo kwokhwikhuula nende okhulila okhululu. Raeli yekhuulanga abaanabe, alobile okhuhotselesibwa shichila abaanabe boosi babulaho.”

¹⁶OMWAMI Nyasaye aboola ari, “Lekha okhwikhuula, weye amasika okhurula mumonitsio, okhuba olanyoola omurungo khulwa akawakhola koosi. Boosi balachelela okhurula mushialo shiabasuku.

¹⁷Obunaayi buliho mutsinyangatsio tsiolunyuma. Nolwa isie OMWAMI Nyasaye emboola. Abaanabo boosi bakhakalushe mushialo shiabwe.

¹⁸Embuliile abandu ba Efuraimu nibekhuula nibaboola bari, ‘OMWAMI Nyasaye yakhuhelesiye eshinyasio, shinga eshiabahelesinjia ihunwa yilanyala okhurukwa ta, khuchelesie nefu khulakalukha habwene, okhuba niwe OMWAMI Nyasaye wefwe.

¹⁹Okhuba olunyuma lwokhushiukhana okhurula khwiwe, khweyama obwonooni bwefwe; Olunyuma lwokhweka, khwareesia emirwe mushibeela; Khwafimbibwa omurwe khandi nikhutiilwa tsisoni, shichila khwonoona nikhushili abaraaka.’

²⁰Efuraimu niye omwana wanje omuheelwa, niye omwana omukoosi muno okhushila abandi boosi, okhuba kata olwa emuhelesia eshinyasio, emwitsulilanga nobuheeli. Omwoyo kwanje kulibwa amahofu khuye, khulweshio shindalachweya okhumubeela tsimbabasi ta.” Nolwa OMWAMI Nyasaye.

²¹“Kho sinjisie ebimanyilo khunjila, simishe ebindu biokhumumanyia injila. Khabilisie injila nende omuhanda omukhongo kwamwaloondakhwo nimutsia. Kalushe inywe abandu ba Isiraeli, kalushe mumatookho kenywe

²²Olayiiya yiiya okhuula liina iwe lihanga libula obwisiikwa? Okhuba isie OMWAMI Nyasaye emalile okhulonga eshindu eshiyia khandi eshiahukhane khushialo, mbu omukhasi niye oulakhaaba omusaatsa.”

²³OMWAMI Nyasaye omwene mahe, Nyasaye wa Isiraeli aboola ari, “Olwa engalusilia abandu banje ba Isiraeli tsikhabi, balirumbula khandi nibali mushialo shia Yuda nende mumatookho kashio mbu, ‘OMWAMI Nyasaye akhulamile tsikhabi iwe eshimenyo eshitakatifu, iwe eshikulu eshitakatifu.’

²⁴Mana abandu abamenya mumatookho nende abalimi nende abaayi balimenya halala mumulembe.

²⁵Okhuba abateshele ndilibasakulusia, nabo abeinzala ndilibekusia nebiokhulia.

²⁶Nilwo olwa abandu baliboola bari, ‘Embushile mundoolo, ne nimanya mbu tsindoolo tsianje tsibele tsindayi muno.’ ”

²⁷OMWAMI Nyasaye aboola ari, “Tsinyanga tsitsanga olwa ndakhameete nende okhwinjiyia abandu ba Isiraeli nende ba Yuda nende emiruko chiabwe shinga lwomumiitsi amiitsanga imwo.

²⁸Khulweshio shinga olwa ndahenjelesia obulayi olwa ndabasiula nende okhubalikulula, nebakwisia nebasasia nende okhubasandia, nolwa khandi enzia okhuhenjelesia obulayi nebasimikha nende okhubaraaka khandi. Nolwa emboola isie OMWAMI Nyasaye.

²⁹Mutsinyanga etsio shibaliboolakhwo khandi mbu, ‘Abasamwana baliile tsinzabibu tsinjiishi, nebutswa ameeno kabaana babwe niko akafwile,’ tawe.

³⁰Nebutswa buli omundu alifwa khulwa obwonooni bubwe omwene. Omundu oulia tsinzabibu tsinjiishi, niye owameenoke kalafwa.”

³¹ OMWAMI Nyasaye aboola ari, “Tsinyanga tsitsanga olwa ndilikhola indakano imbia nende abandu ba Isiraeli nende aba Yuda.

³²Nayo shiyiliba shinga indakano yandakaasia nende abakuuka babwe olwa ndabatiila omukhono nebemilila okhurula mushialo shia Misiri tawe. Bafunaka indakano eyo, kata olwa ndali omusaatsa wabwe. Nolwa Isie OMWAMI Nyasaye emboola.

³³Nebutswa indakano imbia yenzia okhukaasia nabandu ba Isiraeli njieyino mbu, ndalara lilako lianje mukari mwabwe, ndalahandika lilako elio mumioyo chiabwe. Nasi ndalaba Nyasaye wabwe nabo balaba abandu banje.

³⁴Abulaho khubo ouliechesia owashie okhumanya Nyasaye, okhuba boosi balimanya isie, okhurula khumutuutu khuboosi okhuula khumukhongo khuboosi. Ndilibabeela obumayanu bwabwe, khandi shindilitsulilakhwo obwonooni bwabwe khandi tawe. Nolwa isie OMWAMI Nyasaye emboola.”

³⁵OMWAMI Nyasaye aboola ari, Oyo owashinjia eliuba eshiteere, ne mushilo akhola omwesi nende tsing'ining'ini okhwakha, outuubuulanga inyanza nachikhola okhuhoola obutinyu, eliiralie niye OMWAMI Nyasaye omwene mahe.

³⁶“Oluhono olwebindu bia ndalonga ebio bishiliho mubukono bwabio, nolwa Isiraeli lilatsiililila okhuba lihanga imbeli wanje inziayo.

³⁷Likulu niliakhabeele elinyala okhuchelwa, nashio eshialo shili hasi walio okhulambuulwa, kho ndakhalobile abandu ba Isiraeli, khulwa amakhuwa kabaakholela. Nolwa isie OMWAMI Nyasaye emboola.”

³⁸OMWAMI Nyasaye aboola ari, “Tsinyanga tsitsanga olwa litookho lia Yerusalemu liakhombakhwe obuyia shinga litookho lianje, okhurula khumunaara kwa Hananeli okuli elubeka lwomumbo okhuula khushiliibwa eshilangwa mbu eshia Mukoona.

³⁹Ne olwakho lwokhwahukhasia luchachila habwene yaho nilutsiililila niluhenjile emulambo okhuula khushikulu shia Garebu mana lubotokhane okhuula Goa.

⁴⁰Libanda liosi liabafu bayabilungwamwo khandi elia bafuubangamwo amakokha nende emikunda chiosi echili injelekha womwalo kwa Kidironi okhuula khushilibwa eshilangwa mbu eshia Tsifarasi eshili elubeka lwebukwe lilaba litakatifu khwisie. Litookho shiliakhasasibwekhwo noho okhumululwakhwo khandi ta nziayo.”