Read wanga YEREMIA 32 Bible Online

YEREMIA 32 - wanga bible

YEREMIA 32

¹OMWAMI Nyasaye yaboola ninasi mumuyika kwekhumi Zedekia nali omuruchi wa Yuda, okwali omuyika kwekhumi namunaane kwomuburuchi bwa Nebukadineza omuruchi wa Babuloni.

²Olwene olwo, abelihe bomuruchi wa Babuloni bali nibaseeranga Yerusalemu, nasi Yeremia ndali nindikaliilwe mulwanyi lwomuruchi wa Yuda.

³Omuruchi Zedekia yali niyambohela ebweneyo shichila ndali nindarumbula mbu, OMWAMI Nyasaye yali naboolile ari, “Enzitsanga okhuhaana litookho lino mumakhono komuruchi wa Babuloni owitsa okhulibukula,

⁴naye omuruchi Zedekia shialahonokokha ta, habula alatiilwa nende okhuhanwa khumuruchi wa Babuloni, naamulole mumoni nomumoni, khandi naboole ninaye omwene nomwene.

⁵Omuruchi Zedekia nayilwe Babuloni, ne namenyeyo okhuula olwa nemukholele akenzenyanga. Kata naba naseera Babuloni shialahula ta. Isie OMWAMI Nyasaye nolwa emboola.”

⁶OMWAMI Nyasaye yamboolela mbu,

⁷Hananeli omusiani wa papa wanje omutiiti Shalumu yakhetse khwisie niyareebanga mbu engule omukundakwe okuli Anatsotsi mulukoba lwa Benjamini, shichila nisie omwikhowe wahambi oukhoyile okhukula omukunda okwo.

⁸Mana toto shinga olwa OMWAMI Nyasaye yali naboolile, omusiani wefwe Hananeli yetsa ewa ndali mulwanyi niyamboolela ari, “kula omukunda kwanje okuli Anatsotsi, shichila niwe omwikho wanje wahambi oukhoyile okhukula omukanda okwo.” Mana nemanya mbu toto ako namakhuwa okhurula khu OMWAMI Nyasaye.

⁹Kho nengula omukunda okwo okhurula khu Hananeli, ne obukusi bwakwo bwali ebitonye bieifetsa ekhumi namusafu.

¹⁰Ndara iseyi khubarwa yomukunda okwo mana niyirebwakhwo eshibalikho imbeli wabaloleleli, ne nenjela amapesa ako khuratili.

¹¹Mana nembukula ibarwa eyalikhwo eshibalikho, eyalimwo amakhuwa koosi akobukusi nende ikopi yayio eyali niyibulakhwo eshibalikho.

¹²Mana nembelesia Baruku omusiani wa Neria omwitsukhulu wa Maseya. Ndamuhelesia imbeli womusiani wefwe Hananeli nende imbeli wabaloleleli abali nibareere iseyi khubarwa eyokhukulasania omukunda okwo, nende imbeli wabayahudi boosi abali nibekhale mulwanyi.

¹³Mana imbeli wabwe boosi ndaboolela Baruku endi,

¹⁴“OMWAMI Nyasaye omwene mahe, Nyasaye wa Isiraeli aboola ari, bukula tsibarwa tsibili tsino, eyireerwekhwo eshibalikho nende eyibulakhwo eshibalikho otsire tsiosi musiongo yelitoyi kho mbu tsibikhwemwo obulayi khulwemiyika eminji.

¹⁵Okhuba OMWAMI Nyasaye omwene mahe, Nyasaye wa Isiraeli aboola mbu tsinzu nende emikunda nende emikunda chiemitsabibu chilakulasibwa khandi mushialo shino.”

¹⁶Olwa ndali nemalile okhuhelesia Baruku ibarwa yokhukula omukunda, ndasaaya nimboola endi,

¹⁷“Iwe OMWAMI Nyasaye, niwe owalonga likulu nende eshialo niwikhoonyelanga amaaniko nende obunyalibwo obukhongo, shibulaho eshilanyalikha ta imbeliwo.

¹⁸Iwe omanyinjia obuheelibwo oburalilu khubandu ebikhumila, nebutswa khandi ohananga eshinyasio khubaana khulwa obwonooni bwakholwa nabebusi, iwe oli Nyasaye omukhongo khandi owamaani muno, eliiralio nilio OMWAMI Nyasaye omwene mahe.

¹⁹Iwe oloosinjia nobuchesi obukhongo, khandi okholanga amakhuwa amakhongo, ololanga koosi kabandu bakholanga, orunganga buli mundu okhulondana nende akakholanga, khandi okhulondana nebikholobie omwene.

²⁰Mumiyika chiakhale iwe wakhola akamakana khandi akokhuchenya mushialo shia Misiri, mana khandi otsiilililanga okhukakhola okhuula olwa leelo mushialo shia Isiraeli nende mumahanga kandi koosi, kachila eliiralio liamanyikha buli habundu.

²¹Khulwa ebikholebio biamakana khandi biokhuchenya warusia abandubo Abaisiraeli mushialo shia Misiri.

²²Ne nobahelesia eshialo shino eshiawetsuba okhuhelesia abakuuka babwe. Eshialo shiobuyinda obunji khandi eshieliloba linulu.

²³Nebutswa olwa benjila nibabukula eshialo eshio, shibalonda amalako koko nende okhumenya okhulondana namechesio koko tawe, shibakholakhwo kata elala khuka wabalaka okhukhola tawe. Kho wabareerera amanyakhano kano koosi.

²⁴“Lola, Ababuloni bombashe ebituuli khulwa okhuseera nende okhubukula litookho. Lihe, inzala nende olumbe bilachila litookho nende abandu balio okhuhanwa mumakhono kabwe. Koosi ka warumbula kamalile okhuusibwa, omwene okalolile netsimonitsio.

²⁵Ne kata kario, iwe OMWAMI Nyasaye, niwe owamboolela ori, ‘Kula omukunda imbeli wabaloleleli,’ kata olwa litookho limalile okhuhaanwa mumakhono ka Abababuloni.”

²⁶Mana OMWAMI Nyasaye niyamboolela ari,

²⁷“Lola, isie nisie OMWAMI Nyasaye, Nyasaye wabandu boosi. Shilikhwoho eshinyala okhukhaya isie okhukhola?

²⁸Khulweshio, isie emboola mbu, ndalahana litookho lino mumakhono komuruchi Nebukadineza wa Babuloni nende khubelihebe, naye alalibukula.

²⁹Abababuloni abo balalisamba nomulilo nalio lilayia liosi pe, halala nende tsinzu etsia khubutenje bwatsio abandu basambilakhwo obubane khulwa okhwinamila omunyasaye Baali, nende okhuhaana omusango kwokhutsushilila kwa idivai khulwa okhwinamila abanyasaye bandi.

³⁰Okhurula khale abandu ba Isiraeli nende aba Yuda shibakholangakhwo amakhuwa amalayi imbeli wanje tawe, habula obumayanu butswa, mana bachilanga nendilwa neliruma likhongo khulwa ebikhole biabwe.

³¹Okhurula khunyanga yelitookho lino liombakhwa okhuula olwa leelo, abandu balio baasinyisinjia khandi babusinjia liruma lianje. Khulweshio okhuula elisasie liosi pe,

³²khulwa okhubeela obwonooni bwakholwa nabandu ba Yuda nende aba Yerusalemu, halala nende abaruchi babwe, abemilisi babwe, abesaaliisi babwe nende abalakusi babwe.

³³Bashiukhane nibakhupa omukongo, kata olwa ndatsiililila okhubechesia, shibarecheresia amebaalo kanje tawe.

³⁴Basinjisia ebifwanani biabanyasaye babwe beshisinyo muhekalu yanje, eyombakhwa khulwa okhunzinamilamwo, kho nibachionoonia.

³⁵Khandi bombakha mwibanda lia Hinomu ebimalilo biemisango khulwa omunyasaye Baali khulwa okhuhaanilakhwo abaana babwe abasiani nende abakhaana okhuba omusango omusambe khumunyasaye Moleki. Isie shindabalakakhwo okhukhola ako ta, kata shikalikhwo mumapaaro kanje mbu banyala okhukhola likhuwa lieshisinyo lino, nibachila abandu ba Yuda nibonoona ta.”

³⁶OMWAMI Nyasaye wa Isiraeli yamboolela ari, “Yeremia, abandu belitookho lino baboolanga mbu, inzala, obulwani nende olumbe bilakhola litookho lino okhukwa mumakhono komuruchi wa Babuloni. Nebutswa emboola endi,

³⁷ndalakhung'asia abandu banje okhurula mubialo biosi ebia ndabasalasiamwo nebasinyishile, khandi nendi neliruma lilulu. Ndalabachelesia hano mushialo shiabwe, nebakhola okhumenyamwo mumulembe.

³⁸Mana balaba abandu banje, nasi ndalaba Nyasaye wabwe.

³⁹Ndalabahelesia omwoyo mulala nelichoomo elala mbu, okhumbelesia oluyali buli lwosi, khulwa amalayi akalaba khubo abeene nende khubolwibulo lwabwe.

⁴⁰Ndalakaasia ninabo indakano yeinziayo mbu, shindililekhakhwo okhubakholela amakhuwa amalayi ta, khandi endibakhola okhumbelesia oluyali nomwoyo kwabwe kwosi, kho mbu shibalishiukhanakhwo nibandekha khandi tawe.

⁴¹Ndakhekhoye khulwa okhubakholela amakhuwa amalayi, khandi ndakhabaralisie inziayo nomwoyo kwanje kwosi mushialo shiabwe shino.

⁴²“Shinga butswa olwa ndabareerera amasila amakhongo nolwa khandi enzia okhubareerera amakhuwa amalayi akandabasuubisia.

⁴³Emikunda chilakulwa khandi mushialo eshia inywe muboolanga mbu, neshikhaya eshibulamwo abandu kata tsisolo, khandi eshiahaanwa khubakalidayo.

⁴⁴Abandu balakula emikunda, ne tsindakano tsiokhukulasania emikunda echio tsilarebwakhwo iseyi nende eshibalikho, khandi abandu bakhatsilolelele mushialo shia Benjamini, nende mutsingongo tsili ahambi Yerusalemu, nende mumatookho ka Yuda, nende mumatookho keshialo shiomubikulu nende komushialo shia Shefela nende kelubeka lwemulambo weshialo shia Yuda. Ndakhakalusie abandu mushialo shiabwe. Isie OMWAMI Nyasaye emalile okhuboola.”