Read wanga YEREMIA 33 Bible Online

YEREMIA 33 - wanga bible

YEREMIA 33

¹OMWAMI Nyasaye yaboola nende Yeremia olwakhabili, olwa yali nashiikalilwe mulwanyi lwomuruchi;

²OMWAMI Nyasaye owalonga eshialo, OMWAMI owashikaasia mana nashiralisia, weliiralie lili mbu, OMWAMI Nyasaye, aboola ari,

³“Unanje nasi ndalafuchira, ndalakhuboolela amakhuwa amakhongo khandi akebisa muno, aka iwe olamanyile ta.

⁴Okhuba isie OMWAMI Nyasaye, Nyasaye wa Isiraeli emboola mbu, tsinzu tsielitookho lia Yerusalemu nende tsinzu tsiabaruchi ba Yuda etsiakwisibwa hasi nitsikwa ebituuli biokhuninilakhwo olwa Abakalidayo babaseera netsinganga.

⁵Tsinzu etsio tsiletsulamwo emibili chiabandu abafwile abenzia okhwira khulwa liruma lianje nende okhusinyikha khwanje. Ndalafisa obweni bwanje okhurula khwitookho lino khulwa okhubeela obumayanu bwabandu balio bakhola.

⁶Ne kata kario enzia okhulihonia nende okhulikalusilia obulamu, ndalahonia abandu banje khandi ndalabakhola okhuralila nende okhwikhoya khulwa omulembe nende obulindwi.

⁷Ndalachelesia Yuda nende Isiraeli okhurula mubuhambe, nende okhubaralisia khandi shinga olwa balinji olwambeli.

⁸Ndalabasiiya okhurula mubwonooni bwabwe bwosi obwa baakholela, nende okhubabeela obumayanu bwabwe nende obukhayi bwabwe khwisie.

⁹Mana litookho lia Yerusalemu lino liakhabe eliokhusangasia, eliokhwitsoomibwa nende okhuhebwa oluyali mumahanga koosi akalihulilakhwo amakhuwa amalayi ka ndilikholela abandu banje. Amahanga ako kalitiilwa noburi nende indenga khulwa okhubela omulembe nende amalayi aka ndilikholela abandu ba Yerusalemu.”

¹⁰OMWAMI Nyasaye aboola ari, “Mumatookho kano, aka muboolanga mbu, namakhaya kabulamwo abandu kata tsisolo, mumihanda chia Yerusalemu nende mumatookho ka Yuda, akali butswa likunda, akabulamwo abandu nende tsisolo, nimwo omwa kakhahulilikhane khandi,

¹¹amayosi kokhwikhoya nende okhusaangaala, amayosi komwene shiselelo, komweha, nende aka abo abemba nibareera ebihaanwa, muhekalu yanje nibaboola bari, ‘Mukhupile OMWAMI Nyasaye omwene mahe orio, okhuba OMWAMI Nyasaye nomulayi, khandi obuheelibwe oburalilu nobweinzayo.’ Okhuba enzia okhukalusilia eshialo shino tsikhabi tsiashio etsia shiali ninatsio olwambeli. Isie OMWAMI Nyasaye emalile okhuboola.”

¹²OMWAMI Nyasaye omwene mahe aboola ari, “Habundu ahali butswa likunda khandi aha abandu kata tsisolo bibula hano nende mumatookho kaho koosi, niho aha balaba nolwayilo khandi aha abaayi balahuluusilia ebiayo biabwe.

¹³Mumatookho keshialo shiebikulu nende mumatookho ka Shefela nende akeshialo shiemulambo shia Yuda, nende mushialo shia Benjamini nende eshili ahambi Yerusalemu nende mumatookho ka Yuda, abaayi balabala khandi ebiayo biabwe, Isie OMWAMI Nyasaye nolwa emboola.”

¹⁴OMWAMI Nyasaye aboola ari, “Tsinyanga tsitsanga olwa ndakhahesie koosi aka ndasuubisia abandu ba Isiraeli nende aba Yuda.

¹⁵Mutsinyanga etsio khandi mubise ebio, ndakhaahule omuruchi omulunjishi okhurula mulwibulo lwa Daudi, omuruchi oyo yakhakhole akatoto khandi akahabwene mushialo.

¹⁶Mutsinyanga etsio, eshialo shia Yuda shiakhohonibwe, nalio litookho lia Yerusalemu liakhabe nomulembe. Litookho elio liakhalangwe mbu, ‘OMWAMI Nyasaye niye Obulunjishi bwefwe.’

¹⁷Isie OMWAMI Nyasaye esuubisia mbu, omuruchi okhurula mulwibulo lwa Daudi shialichweyakhwo okhubaho mwihanga lia Isiraeli tawe.

¹⁸Khandi omwisaaliisi okhurula mulwibulo lwa Abalawi shialichweyakhwo okhubaho owokhuuhaanila emisango emisambe, emisango chie imele nende emisango chindi chiosi tawe.”

¹⁹OMWAMI Nyasaye yaboolela Yeremia ari,

²⁰“Shinga lwolanyala okhufunaka indakano yanje yandaraho hakari weshiteere nende eshilo mbu, eshilo nende eshiteere bileshe okhubaho shinga olwa ndabiraho ta,

²¹kho nolwa olanyala okhufunaka indakano yanje nende omukhalabani wanje Daudi mbu, omuruchi okhurula mulwibulolwe shialichweyakhwo okhubaho owokhuruka mushilenjeshie ta, khandi abesaaliisi okhurula mulwibulo lwa Abalawi balabaho buli lwosi okhuukhalabanila.

²²Ndalenjiyia abolwibulo lwa Daudi omukhalabani wanje, nende olwa abesaaliisi abakhalabani banje, balaba abanji abalanyala okhubalwa ta, shinga tsing'ining'ini etsiomwikulu khandi shinga omuyeshe kwokhunyanza.”

²³OMWAMI Nyasaye yaboolela Yeremia ari,

²⁴“Iwe wahuliilekhwo kabandu baboolanga mbu, isie ndaloba abandu ba Isiraeli nende aba Yuda, tsimbia tsibili tsia ndaahula? Balechelesinjia abandu banje, shibabalolanga shinga nibali lihanga tawe.

²⁵Nebutswa isie OMWAMI Nyasaye ndamala okhukhola indakano nende eshiteere khandi nende eshilo, khandi ndaraho amalako kokhulinda eshialo nende likulu.

²⁶Kho shinga butswa olwa ndakhola ako, kho nolwa enzia okhulinda indakano yanje nende abolwibulo olwa Yakobo halala nende omuruchi wanje Daudi. Ndakhaahule mulala khubolwibulolwe okhuruka abolwibulo lwa Aburahamu, Isaka, nende Yakobo. Okhuba ndakhababeele tsimbabasi, ne nebakalusilia tsikhabi tsiabwe khandi.”