Read wanga YEREMIA 34 Bible Online

YEREMIA 34 - wanga bible

YEREMIA 34

¹OMWAMI Nyasaye yaboola nende Yeremia lwomuruchi Nebukadineza wa Babuloni halala nabelihebe nende abelihe okhurula mubialo biosi nende mumahanga koosi akali hasi woburuchibwe bali nibaseeranga Yerusalemu nende amataala koosi akali ahambi ninalio.

²“OMWAMI Nyasaye wa Isiraeli aboola ari, tsia oboolele omuruchi Zedekia wa Yuda mbu, isie OMWAMI Nyasaye, enzia okhuhana litookho lino mumakhono komuruchi wa Babuloni, naye alalisamba liosi pe.

³Shiolahonokokha okhurula khuye ta, habula olatiilwa mana ohanwe khuye. Nomulole mumoni nomumoni khandi noboole ninaye omwene nomwene, mana noyilwe Babuloni.

⁴Kho iwe Zedekia omuruchi wa Yuda, isie OMWAMI Nyasaye emboola khwiwe endi, shinawiirwe nolukanga mwihe tawe.

⁵Olihuluukha mumulembe, ne shinga olwa abandu basambila abakuukabo obubane, abo abakhuranjilila okhuruka, khandi nolwa balikhusambila obubane nibekhuula bari, ‘Wowe, omuruchi wefwe afwile’ Isie OMWAMI Nyasaye nolwa emboola.”

⁶Mana omulakusi Yeremia naboolela omuruchi Zedekia amakhuwa ako koosi nali Yerusalemu,

⁷olwa abelihe liomuruchi wa Babuloni bali nibaseeranga litookho lia Yerusalemu khandi nibaseeranga litookho lia Lakishi nende lia Azeka, amatookho akali nikasikaale mu Yuda nikasirwa namasisi amarambi.

⁸OMWAMI Nyasaye yaboolela omulakusi Yeremia, olunyuma lwomuruchi Zedekia okhukhola indakano nabandu boosi aba Yerusalemu mbu abasumba boosi baleekhuulwe.

⁹Yalachilisia buli omundu okhuleekhuula omusumba omuheburania abe omusaatsa noho omukhasi. Kho mbu omundu yesi alakholakhwo omuyahudi washie okhuba omusumba tawe.

¹⁰Abemilisi boosi nende abandu boosi abali nibakholile indakano eyo bafuchilila okhuleekhuula abasumba Abaheburania boosi, kho mbu omundu yesi alabakholakhwo okhuba abasumba khandi ta.

¹¹Nebutswa olunyumakhwo bakalukhasia amapaaro kabwe mana nibafukula indakano eyo, nibakhola abasumba aba bali nibalekhuulile abasaatsa nende abakhasi okhuba abasumba khandi.

¹²Mana OMWAMI Nyasaye,

¹³Nyasaye wa Isiraeli naboolela Yeremia ari, “Isie OMWAMI Nyasaye ndakhola indakano nende abakuuka benywe olwa ndabarusia mushialo shia Misiri, nebakhola okhuba abaleekhuula okhurula mubusumba, nebaboolela endi,

¹⁴‘Buli khumuyika kwa musafu, buli mundu okhuula aleekhuule omusumba omuyahudi washie, ouba niyekusia omwene khwiwe. Niyakhakhukholela emilimo khulwemiyika chisasaba, okhuula omulekhuule atsie.’ Nebutswa abakuuka benywe shibaloonda lilako lino tawe.

¹⁵Tsinyanga tsindiiti etsiabirire, mweyema obwonooni bwenywe mana nimukhola amakhuwa amalayi imbeli wanje khulwa okhulekhuula abasumba bashienywe Abayahudi, mwakhola indakano imbeli wanje, muhekalu yanje eya munzinamilangamwo.

¹⁶Nebutswa olunyumakhwo mwakalukhasia amapaaro kenywe mana nimunyeka eliira lianje. Buli mulala khwinywe wabukule khandi abasumba abeshiyahudi abasaatsa nende abakhasi aba mwali nimumalile okhulekhuula mbu batsie. Mwabalunyilisiye okhuba abasumba benywe khandi.

¹⁷Khulweshio isie OMWAMI Nyasaye emboola mbu, inywe shimuloondile lilako lianje liokhulekhuula Abayahudi bashienywe ta. Kho nasi enzia okhumuhelesia obulekhuule, obulekhuule bwokhwiirwa nolukanga mwihe, okhwiirwa neinzala nende olumbe. Ndalamukhola okhuba lihanga lieshisinyo khumahanga koosi akokhushialo.

¹⁸Abandu abafunaka indakano yanje mana nibaloba okhutiila amalachilisio keindakano ya bakhola imbeli wanje, enzia okhubakhola shinga eshimoosi eshio eshia batonyamwo ebitonye bibili mana nibachenda nibabura hakari webitonye tsana ebio.

¹⁹Abemilisi ba Yuda, nende aba Yerusalemu halala nende abakhongo bomuruchi, abesaaliisi, halala nende abandu bandi boosi bakhola indakano ninasi khulwa okhubura hakari webitonye bibili bieshimoosi shia bali nibatonyilemwo.

²⁰Enzia okhubahana mumakhono kabasuku babwe nende mumakhono ka abo abakhabanga okhubeera. Emilambo chiabwe chilaliibwa netsingosia nende tsisolo nabulimo.

²¹Naye Zedekia omuruchi wa Yuda, nende abemilisibe boosi ndalabahana mumakhono kabelihe liomuruchi wa Babuloni, ababeele nibatsitsanga nibaleshile okhumuseera inywe.

²²Nebalachilisie, nabo nibakalukha khwitookho lino, nibaliseera, nibalibukula nende okhulisamba nomulilo liosi pe. Nekhole amataala ka Yuda okhuba amakunda komundu yesi alanyala okhumenyamwo ta. Isie OMWAMI Nyasaye emalile okhuboola.”