Read wanga YEREMIA 35 Bible Online

YEREMIA 35 - wanga bible

YEREMIA 35

¹Mutsinyanga tsia Yehoyakimu omusiani wa Yosia yali omuruchi wa Yuda, OMWAMI Nyasaye yaboolela Yeremia ari,

²“Tsia khubeshilibwa shia Rekabu oboole ninabo. Mana abareere muhekalu, obare mushisika shilala shia Ihekalu mana obahelesie idivai banywe.”

³Kho ndabukula Yaazania omusiani wa Yeremia, omusiani wa Habazinia nende abasiani babwe boosi, nende abaanabe boosi nende abandu boosi abomushilibwashie.

⁴Nebareera muhekalu, nebenjisia mushisika shiabasiani bomulakusi Hanani omusiani wa Igidalia, eshiali munzu yeikulu ya Maseyia omusiani wa Shalumu owali mulala khubakhongo abomuhekalu. Eshisika eshio shiali ahambi nende ebisika bindi biabakhongo bomuhekalu.

⁵Mana nebarenjeshela ebikombe nende ebikaye nibitsulemwo idivai, nebaboolela endi, “Munywekhwo idivai.”

⁶Nebutswa bangalusia nibamboolela bari, “Ifwe shikhunywetsanga idivai tawe. Kuuka wefwe Yonadabu omusiani wa Rekabu yakhulachilisia mbu, ifwe nende abolwibulo lwefwe khulanywakhwo idivai ta inziayo.

⁷Yakhulaka khandi mbu khulombakhakhwo tsinzu noho okhulima emikunda noho okhuraaka emitsabibu tawe. Yakhulaka mbu buli lwosi khumenyenje mumatili, kho mbu khumenye mushialo shia khwahuyilamwo shino tsinyanga tsinyinji.

⁸Khwatiila amalachilisio koosi aka Yonadabu yakhuhelesia. Ifwe abeene, kata abakhasi befwe kata abaana befwe shikhunywetsanga idivai tawe,

⁹khandi shikhumbakhanga tsinzu tsiokhumenyamwo tawe. Shikhulikhwo nemikunda chiemitsabibu, noho emikunda chindi kata chieimele tawe.

¹⁰Habula khumenyanga mumatili, khandi khwatiila amalachilisio koosi aka Yonadabu kuuka wefwe yakhulachilisia okhukhola.

¹¹Nebutswa olwa Nebukadineza omuruchi wa Babuloni yaseera eshialo shiefwe, khwamala nikhulola mbu khwilushile Yerusalemu khulwa okhwihonokosia okhurula khubelihe ba Babuloni nende elia Abasiria. Ako niko akachilanga ifwe nikhumenya mu Yerusalemu.”

¹²Mana OMWAMI Nyasaye, Nyasaye wa Isiraeli niyamboolela mbu enzie emboolele abandu ba Yuda nende Yerusalemu endi,

¹³“Isie OMWAMI Nyasaye omwene mahe emureebanga mbu, shimunyala okhuhulila amalako kanje nende okhulonda amalachilisio kanje ta?

¹⁴Abolwibulo lwa Yonadabu batiila amalachilisioke ka yabalaka mbu, balanywakhwo idivai ta, ne okhuula olwa leelo abulaho khubo ounywetsanga idivai. Nasi ndaboola ninenywe akhandi akhanji, nebutswa shimutiilanga amalako kanje tawe.

¹⁵Ndamurumila abakhalabani banje abalakusi nibamuchetsiyia mbu, buli omundu yekalukhasie, arule khunjila yobumayanu, mana akhole kahabwene. Mulakhalabanilakhwo kata okhwinamilakhwo abanyasaye bandi ta, kho mbu mana mumenye mushialo shia ndamuhelesia inywe nende abakuuka benywe. Nebutswa inywe shimwayambulila kata okhutiila amalachilisio kanje ta.

¹⁶Abolwibulo lwa Yonadabu omusiani wa Rekabu batiila amalachilisio ka Yonadabu yabahelesia, nebutswa inywe shimumbulilanga isie tawe.

¹⁷Khulweshio, bulano isie OMWAMI Nyasaye, Nyasaye wa Isiraeli, enzia okhumureerera inywe abandu ba Yuda nende aba Yerusalemu obusasishi bwosi obwa ndamusuubisia. Enzia okhukhola endio shichila shimwayambulila olwa ndaboola ninenywe ta, khandi shimwayangalusia olwa ndamulanga tawe.”

¹⁸Mana nemboolela abeshilibwa shia Rekabu aka OMWAMI Nyasaye omwene mahe, Nyasaye, wa Isiraeli yali naboolile ari, “Khulwa okhubela mwatiila amalachilisio ka Yonadabu kuuka wenywe yamulachilisia, khandi mwakhola koosi aka yamulaka okhukhola,

¹⁹Isie OMWAMI Nyasaye omwene mahe, Nyasaye wa Isiraeli, emusuubisia mbu, Yonadabu omusiani wa Rekabu shialachweyakhwo okhuba nomwitsukhulu wokhukhalabanila tawe.”