Read wanga YEREMIA 36 Bible Online

YEREMIA 36 - wanga bible

YEREMIA 36

¹Mumuyika kwakhane kwomuburuchi bwa Yehoyakimu omusiani wa Yosia omuruchi wa Yuda, OMWAMI Nyasaye yaboolela Yeremia ari,

²“Bukula eshitabu eshikanye mana ohandichekhwo amakhuwa koosi akandakhuboolela okhulondana nende eshialo shia Isiraeli, eshia Yuda nende amahanga koosi, okhurula khunyanga ya ndachaaka okhuboola ninawe Yosia nali omuruchi wa Yuda okhuula olwa leelo.

³Haundi olwa abandu ba Yuda bahulilakhwo amanyakhano koosi akandirechekhanga okhubakholela banyala okhwikalukhasia balekha okhukhola amakhuwa amabi, mana nasi ndabaleshela obwonooni bwabwe nende obumanyanu bwabwe.”

⁴Kho Yaremia nalanga Baruku omusiani wa Neria. Namuboolela amakhuwa koosi aka OMWAMI Nyasaye yali namubooleele, naye nakahandika koosi mushitabu eshikanye munyumamwe.

⁵Kho Yeremia nalachilisia Baruku namuboolela ari, “Isie endi omubohe, ne shiefuchililungwa okhutsia muhekalu tawe.

⁶Nebutswa enzenya mbu iwe otsie muhekalu khunyanga yabandu nabachaache okhwiyima eshiokhulia khulwa okhusaaya. Mana abasoomele nomwoyo omukhongo amakhuwa aka OMWAMI Nyasaye, akahandikwe mushitabu eshikanye shino. Okasoome koosi imbeli wabandu ba Yuda abetsa okhuba nibetsile okhurula mumataala kabwe koosi.

⁷Haundi balasaaya khu OMWAMI Nyasaye, khandi buli mulala khubo yekalukhasie nalekha okhukhola obwonooni. Okhuba OMWAMI Nyasaye urumbuule amakhuwa keliruma lilulu khandi akokhusinyisia muno khubandu bano.”

⁸Kho Baruku natsia nasoomela abandu muhekalu amakhuwa koosi aka OMWAMI Nyasaye yali nalachilisiye okhubirira khumulakusi Yeremia.

⁹Mumwesi kwashienda kwomumuyika kwakharano Yehoyakimu omusiani wa Yosia nali omuruchi wa Yuda, abandu ba Yerusalemu boosi nende boosi abetsa okhurula Yuda bafuchilisania okhwiyima eshiokhulia khulwa okhuchamisia Nyasaye.

¹⁰Mana abandu boosi nibarecheresia Baruku nasooma amakhuwa akali mushitabu eshikanye, koosi shinga olwa ndali nemubooleele. Yakasooma nali muhekalu, mushisika shia Gemaria omusiani wa Shefani, owali omuhandichi womushiina. Eshisikashie shino shiali mulwanyi lwomuhekalu hambi nende eshilibwa shia Ihekalu eshilangwa mbu Eshiyia.

¹¹Olwa Mikayia omusiani wa Gemaria omwitsukhulu wa Shefani yahulilakhwo amakhuwa koosi aka OMWAMI Nyasaye yali naboolile nikahandiikwe mushitabu eshikanye,

¹²yatsia munzu yomuruchi mushisika shiomuhandichi womushiina, ewabemilisi boosi bali nibakhung'anile. Bali, Elishama owali omuhandichi, Delayia omusiani wa Shemayia, Elinatsani omusiani wa Akibori, Gemaria omusiani wa Shefani, Zedekia omusiani wa Hanania nende abemilisi bandi boosi.

¹³Mana Mikayia nababoolela koosi aka yali nahuliile Baruku nasoomelanga abandu.

¹⁴Abemilisi abo nibaruma Yehudi omusiani wa Netsania, omusiani wa Shelemia omwitsukhulu wa Kushi mbu aboolele Baruku ari, “Bukula eshitabu eshikanye shia wasoomeele abandu eshio witse ninashio hano.” Kho Baruku omusiani wa Neria nabukula eshitabu eshikanye eshio natsia ninashio ewa abemilisi abo bali.

¹⁵Abemilisi abo nibamuboolela bari, “Yikhala hasi okhusoomele eshitabu eshikanye eshio.” Baruku nabasoomela amakhuwa ako.

¹⁶Olwa bahulila amakhuwa ako koosi, bashiukhana nibahengana muburi, ne nibaboolela Baruku bari, “Okhuula khuboolele omuruchi amakhuwa kano koosi.”

¹⁷Mana nibareeba Baruku bari, “Khuboolelekhwo, wahandiiche orie amakhuwa kano koosi? Yeremia yaboolilenje nawe nokahandika munyumamwe noho?”

¹⁸Baruku nabakalusia ari, “Yeremia yamboolela buli likhuwa, nasi nekahandika nobwino khushitabu eshikanye shino.”

¹⁹Mana abemilisi abo nibamuboolela bari, “Tsia wifise iwe nende Yeremia, ne omundu yesi alamanyakhwo aha muli tawe.”

²⁰Mana abemilisi abo nibabiikha eshitabu eshikanye eshio obulayi mushisika shia Elishama owali omuhandichi womushiina, ne nibatsia okhuboolela omuruchi amakhuwa ako.

²¹Mana omuruchi Yehoyiakimu naruma Yehudi okhutsia okhureera eshitabu eshikanye eshio. Yehudi nashireera okhurula mushisika shia Elishama, ne nashisoomela omuruchi halala nende abemilisi boosi abali nibasinjiile aha omuruchi oyo yali.

²²Tsiali tsinyanga tsiomunyiri, ne omuruchi yali niyekhaale munzuye yomunyiri, niyoranga omulilo kwamanda.

²³Ne buli olwa Yehudi yalinji niyakhasooma tsimbapulo tsitaru noho tsine, omuruchi yabukulanga olwembe mana akhalaka tsimbapulo etsio natsisukuna mumulilo okwo, yakhola ario okhuula olwa yasamba eshitabu eshikanye eshio shiosi mumulilo.

²⁴Nebutswa kata olwa ako koosi kekholekha, omuruchi nende abemilisibe shibatiilwakhwo noburi noho kata okhurandula ebifwalo biabwe khulwa eshibeela tawe.

²⁵Kata olwa Elinatsani nende Delayia nende Gemaria bamusaaya mbu aleshe okhusamba eshitabu eshio, shiyabarecheresiakhwo tawe.

²⁶Mana omuruchi oyo nalachilisia omusianiwe oulangwa mbu Yerahimeli, halala nende Sereya omusiani wa Asirieli nende Shelemia omusiani wa Abudeeli okhutsia okhutiila omulakusi Yeremia nende omuhandichi Baruku. Nebutswa OMWAMI Nyasaye yabafisa.

²⁷Olunyuma lwomuruchi Yehoyiakimu okhusamba eshitabu eshikanye shiamakhuwa ka Yeremia yaboola naye Baruku nakahandika munyumamwe, OMWAMI Nyasaye yaboolela Yeremia ari,

²⁸“Bukula eshitabu eshikanye shindi mana ohandichemwo amakhuwa koosi akali mushitabu shiambeli shiomuruchi Yehoyakimu wa Yuda yasambile.”

²⁹Ne oboolele omuruchi Yehoyakimu mbu, OMWAMI Nyasaye aboola ari, “Osambile eshitabu eshikanye, khandi noreeba Yeremia eshiachila nahandikamwo mbu omuruchi wa Babuloni toto niyetse okhumulula eshialo shino nende okhwira abandu bashio nende emiruko chiashio chiosi.

³⁰Khulweshio isie OMWAMI Nyasaye emboola khwiwe omuruchi Yehoyakimu mbu, abulakhwoho omundu womulwibulolwo oulirukakhwo lihanga liomuruchi Daudi. Khandi omulambokwo kulasukunwa elwanyi, ewa nakubakalwe khumubasu kweshiteere nende khumunyiri kweshilo.

³¹Nasi ndalakhuhelesia eshinyasio iwe, nende abolwibulolwo nende abemilisibo khulwa obwonooni bwenywe. Ndalareera khwinywe nende khuboosi abamenyanga mu Yerusalemu nende mu Yuda amanyakhano koosi aka ndarumbula khwinywe, nenywe nimulakateebakhwo eshindu shiosi tawe.”

³²Mana Yeremia nabukula eshitabu eshikanye shindi, nahelesia omuhandichiwe Baruku omusiani wa Neria. Nahandikamwo amakhuwa koosi aka Yeremia yaboola. Yahandikamwo amakhuwa koosi akali mushitabu shiambeli shiomuruchi Yehoyakimu yali nasambile. Amakhuwa kandi amanji akafwana kario kameetwamwo.