Read wanga YEREMIA 37 Bible Online

YEREMIA 37 - wanga bible

YEREMIA 37

¹Omuruchi Nebukadineza wa Babuloni yemekha Zedekia omusiani wa Yosia okhuba omuruchi wa Yuda okhukalukha mushilenje shia Konia omusiani wa Yehoyakimu.

²Nebutswa Zedekia halala nabemilisibe nende abandu ba Yuda shibahulilanga ameebalo aka OMWAMI Nyasaye aka yababoolelanga okhubirila mumulakusi Yeremia tawe.

³Omuruchi Zedekia yaruma Yehukali omusiani wa Shelemia nende omwisaaliisi Zefania omusiani wa Maseyia okhutsia khumulakusi Yeremia okhumuboolela ari, “Okhusaayile khu OMWAMI Nyasaye, Nyasaye wefwe.”

⁴Mutsinyanga etsio, Yeremia yali nashili okhutiilwa nende okhurebwa mumbohe, kho yali nashili omulekhuule okhuchenda mubandu.

⁵Khandi abelihe ba Babuloni bali nibabotokhana Yerusalemu khulwa okhuliseera. Nebutswa olwa bahulila mbu abelihe ba Misiri bambushe olwakho lwabwe betsanga, abelihe ba Babuloni bakalukha inyuma.

⁶Mana OMWAMI Nyasaye, naboolela omulakusi Yeremia ari,

⁷“Isie OMWAMI Nyasaye, Nyasaye wa Isiraeli emboola mbu, oboolele omuruchi wa Yuda owakhurumile khwisie mbu omusaayile ori, ‘Lola, abelihe lia Misiri abetsa okhukhoonya bali ahambi okhukalukha mushialo shiabwe.

⁸Nabo aba Babuloni baletsa khandi nibaseera litookho lino, balalibukula nende okhulisamba liosi nomulilo.

⁹Isie OMWAMI Nyasaye emusiomela nemboola mbu, mulekaatiekhwo abeene nimupaaro mbu abelihe lia aba Babuloni shibalamuseera tawe, okhuba toto mwene baletsa okhumuseera.

¹⁰Kata nimuba nimubahula boosi, nibatong'a butswa batiiti, baletinyia nibabukha okhurula mumaheema kabwe nende okhusamba litookho lino liosi nomulilo.’ ”

¹¹Olwa abelihe lia aba Babuloni belukha nibarula Yerusalemu khulwa okhubela abelihe lia Misiri bali nibetsanga,

¹²Yeremia yarula Yerusalemu okhutsia mushialo shia Benjamini okhubukula omukabokwe.

¹³Nebutswa olwa yoola butswa mushilibwa shilangwa mbu, Eshilibwa shia Benjamini, omulindi washio oulangwa mbu Iriya omusiani wa Shelemia, omwitsukhulu wa Hanania yasinjisia omulakusi Yeremia ne namureeba ari, “Iwe onyololokhanga okhutsia khu Ababuloni noho?”

¹⁴Ne Yeremia namukalusia ari, “Shikali kario tawe, shienyololokhanga okhutsia khu aba Babuloni tawe.” Nebutswa Iraya shiyarecheresia aka Yeremia yamuboolela ta, habula yamutiila namuyila khubemilisi belitookho.

¹⁵Abemilisi abo nibatiilwa neliruma nibamukhupa, khandi nibamwikalila munzu ya Yonatsani, owali omuhandichi womushiina, inzuye yali niyakholwa okhuba imbohe.

¹⁶Olwa Yeremia yali niyekalilwa munzu ya hasi khandi niyakhamalamwo tsinyanga tsinyinji,

¹⁷omuruchi Zedekia yamulanga nende okhumwinjisia munzu yoburuchi. Mana omuruchi namureeba nibali bonyene ari, “Olikhwo noburume bwosi bwosi okhurula khu OMWAMI Nyasaye?” Naye namukalusia ari, “Endi ninabwo.” Ne nameeta okhumuboolela ari, “Otsia okhuhulwa nomuruchi wa Babuloni.”

¹⁸Mana Yeremia namureeba ari, “Nilikhuwa shiina libi eliandakhukholela, kata nishiina eshiandonoonela abemilisibo noho abandu bano, elichila niura mumbohe?

¹⁹Bali heena abalakusibo abakhulakulila nibaboola bari, ‘Omuruchi wa Babuloni shialakhuseera iwe kata eshialoshio tawe?’

²⁰Bulano ekhusaaya nochama orecheresie aka enzenya okhukhuboolela iwe omwami wanje khandi omuruchi wanje. Ekhusaaya nochama olangalusia mumbohe, munzu ya Yonatsani tawe, enyala okhufwilamwo.”

²¹Kho omuruchi Zedekia nalaka mbu Yeremia yekalilwe mulwanyi lwelitookho, khandi mbu buli inyanga bamuhelesinjie omukaate okhurula munzu ya bateshelangamwo emikaate okhuula olwa emikaate chiosi chihwa mwitookho. Kho Yeremia nasikala mulwanyi lwabalindi.