Read wanga YEREMIA 38 Bible Online

YEREMIA 38 - wanga bible

YEREMIA 38

¹Shefatia omusiani wa Matani nende Gedalia omusiani wa Pashuri nende Yukali omusiani wa Shelemia nende Pashuri omusiani wa Malikia bahulila amakhuwa ka Yeremia yali naboolelanga abandu ari,

²“OMWAMI Nyasaye aboola mbu, omundu yesi oulatong'a mwitookho lino aleerwa nolukanga, noho inzala noho olumbe, nebutswa yesi ounaurule elwanyi niyehaana khu aba Babuloni alabaho mwoyo. Alahonokokha, ne nabaho mwoyo.

³OMWAMI Nyasaye aboola mbu toto mwene atsia okhuhana litookho lino mumakhono kabelihe liomuruchi wa Babuloni, ne balalibukula.”

⁴Mana abemilisi abo nibaboolela omuruchi bari, “Omundu uno okhuula yeerwe, okhuba afwisinjia emioyo chiabelihe abatonyile mwitookho halala nende echia abandu bandi boosi khulwa amakhuwa kababoolelanga. Omundu ouno shiakhabilanga abandu bano akomulembe ta, habula yenyanga butswa okhubasalisia.”

⁵Mana omuruchi Zedekia naboola ari, “Ngwoyo, ali mumakhono kenywe shienyala okhumwikalila inywe likhuwa liosi liosi tawe.”

⁶Kho abemilisi abo nibabukula Yeremia nibamwishia hasi khumikoye mwiyabo lia Malikia omusiani womuruchi. Liyabo elio liali mulwanyi lwomuruchi, ne shilialimwo amaatsi ta, habula lialimwo obutoyi, mana Yeremia niyeyinikha mubutoyi obwo.

⁷Nebutswa Ebedi-Melekhi owokhurula Etsiopia, owali omulate owakholanga emilimo munzu yomuruchi, yahulila mbu beshiiye Yeremia mwiyabo. Kho lwomuruchi yali niyekhasiye eshiina mushilibwa shia Benjamini,

⁸Ebedi-Meleki yatsiaho ne naboolela omuruchi ari,

⁹“Omwami wanje, khandi omuruchi wanje, likhuwa lia abandu bano bakholile nelibi. Beshiiye omulakusi Yeremia mwiyabo, ne toto mwene alafwilamwo khulwa inzala, shichila emikaate shichilikhwo mwitookho tawe.”

¹⁰Mana omuruchi nalachilisia Ebedi-Meleki okhubukula abasaatsa bataru abokhukhwesa omulakusi Yeremia okhurula mwiyabo elio nashili okhufwa.

¹¹Kho Ebedi-Meleki natsia nabasaatsa bomunzu yomuruchi mushisika shiokhubiikhamwo ebindu, nabukula ebitasisi nende tsingubo tsiarandukha, nibara khumikoye ne nibeshilia Yeremia hasi ewa yali mwiyabo.

¹²Mana Ebedi-Meleki naboolela Yeremia ari, “Bukula ebitasi ebio nende tsingubo tsiarandukha etsio ebire mukwahamwo kho emikoye echio chileshe okhukhusalisia, naye Yeremia nakhola ario.

¹³Mana nibakhwesa Yeremia okhurula mwiyabo elio, olunyuma lwako Yeremia yatong'a mulwanyi lwabalindi.”

¹⁴Inyanga yindi omuruchi Zedekia yarumana mbu balanje omulakusi Yeremia yetse. Mana nalachilisia mbu Yeremia yetse ewa yali mushilibwa shiakhataru shiokhwinjila muhekalu. Mana naboolela Yeremia ari, “Enzenya okhukhureeba likhuwa, ne olambisakhwo eshindu shiosi shiosi tawe.”

¹⁵Naye Yeremia namureeba ari, “Nekhuboolela obwatoto shiolanzira? Ne nekhuchetsiyia shiolalonda obuchetsiyi bwanje ta.”

¹⁶Mana omuruchi Zedekia niyetsuba mumasilisi ari, “Shinga olwa OMWAMI Nyasaye aliho mwoyo, owakhulonga nakhuhelesia obulamu, esuubisia mbu shindalakhwiira kata okhukhuhana mumakhono kabandu bakhabanga okhukhwiira tawe.”

¹⁷Mana Yeremia naboolela omuruchi Zedekia ari, “OMWAMI Nyasaye, Nyasaye wa Isiraeli aboola ari, ‘Noba niwihaana khubemilisi bomuruchi wa Babuloni, kho olahonokosia obulamubwo, khandi litookho lino shililasambwa nomulilo tawe, khandi iwe halala nende abeinzuyo shibaleerwa tawe.

¹⁸Nebutswa noba nolehaana khubo ta, kho litookho lino, nilahaanwa mumakhono ka Abababuloni, nabo balalisamba liosi pe. Nawe shiolahonokokhamwo tawe.’ ”

¹⁹Nebutswa omuruchi Zedekia yakalusia Yeremia namuboolela ari, “Isie eritsanga abandu befwe Abayahudi abayelushe nibatsia khu Abababuloni, haundi enyala okhuhaanwa khubo nabo nibasalisia.”

²⁰Mana Yeremia namukalusia ari, “Shiolahaanwa khubo tawe. Iwe hulila amakhuwa ka OMWAMI Nyasaye, akekhubooleele, mana amakhuwa koosi kalaba amalayi khwiwe, khandi olahonokosia obulamubwo.

²¹Nebutswa noba noloba okhurula niwihaana khubo, lilolelo lia OMWAMI Nyasaye yamanyiyie ndielino mbu,

²²lola, abakhasi boosi abasikala munzu yomuruchi wa Yuda babele nibarusibungwa nibayilwa khubemilisi belihe liomuruchi wa Babuloni, nabo batsiile nibaboola bari, ‘Abetsabo bawesiika bakhukatiyie, mana bakhuhulile. Bulano, khulwa okhubela ebilenjebio biyinishe mubutoyi, bashiukhane nibakhulekha.’

²³“Abakhasibo boosi nende abaanabo boosi balarusibwa nibayilwa khuba Babuloni. Nawe omwene shiolahonokokha okhurula khubo tawe. Olatiilwa nomuruchi wa Babuloni, nalio litookho lino lilasambwa liosi pe.”

²⁴Mana Zedekia naboolela Yeremia ari, “Omundu yesi alamanyakhwo amakhuwa akakhuboolile ninawe kano tawe, nawe shioleerwa tawe.

²⁵Abemilisi nibaba nibahulila mbu emboolile ninawe, banyala okhwitsa okhukhureeba iwe bari, ‘Khuboolelekhwo aka obooleele omuruchi nende akomuruchi akhubooleele. Olakhubisakhwo likhuwa liosi ta, nefu shikhulakhwiira tawe.’

²⁶Nibaba nibakhureeba mbu obaboolele, obakalusie ori, ‘Isie esaayile butswa omuruchi mbu nachama alangalusia mumbohe eyili munzu ya Yonatsani ta, okhuba enyala okhufwilayo.’ ”

²⁷Mana abemilisi boosi nibetsa wa Yeremia yali nibamureeba amakhuwa ako, naye nababoolela butswa shinga lwomuruchi yali namubooleele. Kho nibamulekha bario, shichila abulaho owali nahuliile akabali nibaboolile nomuruchi.

²⁸Mana Yeremia namenya mulwanyi lwa abalindi okhuula khunyanga yelitookho lia Yerusalemu liabukulwa.