Read wanga YEREMIA 39 Bible Online

YEREMIA 39 - wanga bible

YEREMIA 39

¹Mumwesi kwekhumi mumuyika kwashienda kwomuburuchi bwa Zedekia, omuruchi Nebukadineza wa Babuloni yetsa nabelihebe boosi okhuseera litookho lia Yerusalemu, mana nibalibotokhana.

²Mana khunyanga ya shienda yomumwesi khwakhane mumuyika kwekhumi namulala kwoburuchi bwa Zedekia mu Yuda, amasiisi akali nikasira litookho koosi kakwisibwa hasi.

³Kho olwa Yerusalemu liabukulwa, abakhongo belihe liomuruchi wa Babuloni benjila nibekhala hashilibwa shia hakari. Abakhongo abo bali; Nerugali-shareza, Samugari-nebo, Sarisekimu, omurabusari nende Nerigali-shareza, omurabumagi halala nende abakhongo bandi belihe liomuruchi wa Babuloni.

⁴Olwa Zedekia omuruchi wa Yuda yabalola, ye halala nende abelihebe boosi belukha. Bataaba eshilo nibalonda khunjila yomumukunda kwomuruchi, nibabirira mushilibwa shili hakari wamasiisi kabili. Mana nibelushila khunjila eyihenjile mwibanda lia Araba.

⁵Nebutswa abelihe lia Babuloni babaloondachila ne nibabanyoolelesia ahambi nemihololokhwe chia Yeriko. Batiila omuruchi Zedekia nibamuyila khumuruchi Nebukadineza owali nali mwitookho lia Ribula mulukongo lwa Hamatsi. Habwene yaho Nebukadineza yakhalachila Zedekia eshiina.

⁶Nibali Ribula yaho, omuruchi Nebukadineza yeera abasiani bomuruchi Zedekia, Zedekia mwene narerekhwo tsimoni. Mana khandi niyeera abemilisi ba Yuda boosi.

⁷Olunyuma lwako, yafutula tsimoni tsia Zedekia ne namuboha neminyololo namuyila mubuhambe Babuloni.

⁸Aba Babuloni abo nibasamba inzu yomuruchi wa Yuda nende tsinzu tsiabandu khandi nibakwisia amasiisi akali nikasira Yerusalemu.

⁹Mana Nebuzaradani omwimilisi wabalindi bomuruchi nabukula abandu boosi abali nibasikale mwitookho nabayila mubuhambe Babuloni, halala nende abo boosi abali nibelushiile khuye.

¹⁰Nebutswa Nebuzaradani yalekha mu Yuda abandu batiiti abali abatakha, ababulakhwo eshindu shiosi, yabakabila emikunda chiemitsabibu nende echiokhulima nibarakamwo ebiokhulia.

¹¹Omuruchi Nebukadineza wa Babuloni yalachilisia Nebuzaradani omukhongo wabelihe naboola khu Yeremia ari,

¹²“Mubukule Yeremia mulamusalisiakhwo ta, habula mumulinde obulayi khandi mumuhelesie shiosi shia yenya.”

¹³Kho Nebuzaradani halala nende abakhongo bandi bano, Nebushazibani, omurabusari nende Nerigali-shareza, omurabumagi halala nende abakhongo bandi boosi bomuruchi wa Babuloni,

¹⁴nibarumana mbu Yeremia arusibwe mumbohe mulwanyi lwabalindi. Mana nibamura hasi wobulindwi bwa Gedalia omusiani wa Ahikamu omwitsukhulu wa Shafani, khandi nalachilisibwa mbu amukoobe ingo mumulembe. Kho namenya nabandu bashie.

¹⁵OMWAMI Nyasaye yaboola nende Yeremia olwa yali nashili mumbohe mulwanyi lwabalindi ari,

¹⁶“Tsia oboolele Ebedi-Meleki omu Etsiopia ori, ‘Isie OMWAMI Nyasaye omwene mahe, Nyasaye wa Isiraeli emboola mbu, lola, shinga butswa olwa ndaboola, mbu enzia okhusasia litookho lino, ne shindalalibeelakhwo ta, nolwa kalaba. Nawe olakalola netsimonitsio.

¹⁷Nebutswa ndalakhuhonokosia iwe, ne shiolahaanwa mumakhono kabandu boritsanga tawe.

¹⁸Okhuba toto mwene ndalakhulinda obulayi, ne shioleerwa tawe, shichila wesika mwisie, ndalahonokosia obulamubwo. Isie OMWAMI Nyasaye nolwa emboola.’ ”