Read wanga YEREMIA 4 Bible Online

YEREMIA 4 - wanga bible

YEREMIA 4

¹OMWAMI Nyasaye aboola ari, “Iwe Isiraeli, noba niwenya okhungalushila isie, kho ngalushila. Noba norusiaho imbeli wanje ebindubio bieshisinyo, mana oleshe okhuchendachenda noloonda khubio.

²Khandi noba niwitsuba muliira lianje, isie OMWAMI Nyasaye, munjila yobwatoto, eyahabwene khandi eyobulunjishi, noboola ori, ‘Shinga OMWAMI Nyasaye aliho mwoyo,’ nolwa amahanga kalanyoola tsikhabi okhurula khwisie, nako kaleyitsiala nikanzitsoomia.”

³Okhuba OMWAMI Nyasaye aboolela abandu ba Yuda nende aba Yerusalemu ari, “Remache emikunda chienywe echiakonela okhulimwa, ne mulamiitsekhwo imwo mubisisia tawe.

⁴Inywe abandu ba Yuda nende aba Yerusalemu, mwisiiye, mube abatakatifu khulwa OMWAMI Nyasaye. Lekhuule emioyo chienywe chibe emieleleshe imbeliwe. Oburumabwe bwakhetsukhana nibumurubushilakhwo shinga omulilo, mana bwamwashilakhwo nibubula oubusimia, khulwa obumayanu bwamukholanga.”

⁵Lanjilisia obutinyu mwihanga lia Yuda, khandi orumbule mu Yerusalemu, noboola ori, “Khupe olwika mushialo shiosi, khupe tsimbungu nimuboola muri, ‘Chende khukhung'ane halala, khwilushe khutsie mumatookho kabotokhanwa netsingoba!’

⁶Sinjisie eshilolelo shielihe shihenje Zayuni, yilushe mwihonokooshe, muleng'oyosiekhwo tawe! Okhuba OMWAMI Nyasaye areeranga amatinyu, nende obusasishi obukhongo okhurula Emasaba.

⁷Shinga olwa italanyi yirulanga mushitsakha shiayo, nolwa oumululanga amahanga arulile yetsanga. Arulile ewamenyanga, yetsa okhusasia lihanga lienywe. Amatookho kenywe kalakwa amayindi amakhaya, shikalaba nende abamenyamwo tawe.

⁸Khulweshio mwifwale ebifwalo biamakunia, mwikhuule nimukhupa tsimbungu, okhuba oburuma obululu bwa OMWAMI Nyasaye, shibwakharulekhwoho mu Yuda tawe.”

⁹OMWAMI Nyasaye aboola ari, “Khunyanga eyo, omuruchi nende abakhongobe bakhafwe omwoyo. Abesaaliisi bakhalibwe ling'ang'a, kata abalakusi bakhahuchisibwe.”

¹⁰Mana nimboola endi, “OMWAMI Nyasaye, toto mwene, kho wakaatiye butswa abandu bano nende aba Yerusalemu, noboola mbu, balaba nomulembe, ne khane olukanga lumalile okhuula mubulamu bwabwe.”

¹¹Eshise eshio, abandu bano nende aba Yerusalemu bakhaboolelwe bari, “Omuyeka kuyiile pia kuhutsanga okhurula khubutenje bwebikulu ebili Emasaba mushitsiimi nikuchooma khubandu banje. Okwo shikulaba omuyeka kwokhuseleetsa noho okhulafia omukhutsi ta,

¹²habula kulaba omuyeka kwamaani muno okhurula khwisie. Nisie OMWAMI Nyasaye oulabakhalachila eshiina.”

¹³Lole! Omusuku yetsanga bwangu shinga amaleesi, amakaarike kelihe ketsanga bwangu shinga eshimbalakusi, natsio tsifarasitsie tsiilukhanga bwangu okhushila tsindutsu. Woowe! Khumuluulwe!

¹⁴Iwe Yerusalemu, wiyosie obumayanu bwomumwoyokwo kho mbu ohonibwe. Olatsiililila okhuba namapaaro kobumayaanu mumwoyokwo okhuula liina?

¹⁵Omwoyo kulanjilisinjia okhurula mwitookho lia Dani, nikurumbula amatinyu aketsanga okhurula mubikulu bia Efuraimu.

¹⁶Kuchetsiyinjia amahanga, nikuboolela Yerusalemu kuri, “Abaseeri betsanga okhurula mushialo shiehale, baayulanga nibarisia amatookho ka Yuda.

¹⁷Balabotokhana Yerusalemu, shinga abasaatsa balindile omukunda, shichila abandu balio bandeshile isie OMWAMI Nyasaye.

¹⁸Iwe Yuda, injendayo nende ebikholebio bikhuchemeele kano. Shino nishio eshinyasioshio. Ne khandi neshilulu muno! Shinyeleelile mumwoyokwo mukari.”

¹⁹Enzuunwa muno! Enzuunwa muno! Engalakala mubutsuunwi, omwoyo kwanje kukhupa obutinyu mwisie, shienyala okhwifwila ta, okhuba embulilanga obuyoka bwolwika. Embulilanga obuyoka bwelihe.

²⁰Amatinyu kalondana namatinyu kandi, eshialo shiosi shikwisiibwe likunda. Amahema kefwe kasasiibwe masundusia, tsingubo tsinzeleesia tsiranduulwemwo mushise shitiiti muno.

²¹Ndalatsiililila okhulola akelihe, nende okhuhulila tsinzika nitsikhupwa okhuula liina?

²²OMWAMI Nyasaye aboola ari, “Abandu banje nabayingwa shibaamanyilekhwo isie tawe. Nabaana abayingwa, shibalikhwo nobumanyilisi bwosi bwosi tawe. Bamanya muno okhukhola akobumayanu, ne shibamanyilekhwo okhukhola amalayi tawe.”

²³Ndahenga khushialo, ne nashio shiali eshikhaya, khandi shishiali nobukondo bwosi bwosi tawe. Mana nihenga mwikulu, nabwo obulafu shibwalimwo tawe.

²⁴Ndahenga khubikulu, nabio biali nibitechelanga, tsingulu natsio tsiali nitsiirundanga.

²⁵Ndahenga, nebutswa shindalolakhwo omundu yesi ta, kata amanyonyi koosi kali nikapulushe.

²⁶Ndahenga nindola eshialo eshialinji eshiyinda muno, nishikwiile eshitsiimi. Nako amatookho kashio koosi nikakwiile amakunda, khulwa liruma lilulu lia OMWAMI Nyasaye.

²⁷Okhuba OMWAMI Nyasaye aboola ari, “Eshialo shiosi shilakwisibwa likunda, nebutswa shindalashisishilia elala tawe.

²⁸Khulweshio, lihanga lilekhuula, nalio likulu lileelima ti, okhuba endachile endio, ne shindalakalukhasia lichoomo lianje tawe. Emalile okhulaka endio, ne shindalachweya okhuusia tawe.

²⁹Olwa balahulila oluyoka lwabelihe, abachendelanga khutsifarasi nende abalasani bobuyingo, abandu abali mumatookho boosi balelukha nibeenjila mubitsakha, ne abandi nibenjila mutsinyanda. Amatookho koosi kalakwa amakunda, ne omundu yesi yesi shialamenyamwo tawe.

³⁰Nawe iwe Yerusalemu, owalekhwa nokwa likunda likhaya. Eshichilanga niwifwala ebifwalo ebiakhanyu nishiina? Eshichilanga niwisiaya ebimili bieitsahabu, nora khutsimonitsio ipala nishiina? Okhwisiayakhwo nokhukhaya, likondolio lilayi neliabutswa. Abatiabo bakhuchaaya, eshiabakhabanga nokhukhwiira.

³¹Okhuba ndahulila okhulila shinga khwomukhasi oulumwa inzibula, okhushenya khwobutsunwi shinga khwomukhasi owibula omwana omwikulanda, khwali okhulila khwomukhaana wa Zayuni, nakamulila emiuya, nakalikha amakhonoke ikulu naboola ari, ‘Endi mumasila! Betsanga okhunzira.’ ”