Read wanga YEREMIA 40 Bible Online

YEREMIA 40 - wanga bible

YEREMIA 40

¹OMWAMI Nyasaye yaboola nende Yeremia olunyuma lwa Nebuzaradani, omukhongo wabelihe liomuruchi okhumulekhuula okhurula Rama. Omukhongo oyo yabukula Yeremia namuboha neminyololo halala nende abandu bandi okhurula Yerusalemu nende Yuda abali nibayilungwa Babuloni shinga abahambe.

²Omukhongo wabelihe oyo yabukula Yeremia halubeka ne namuboolela ari, “OMWAMI Nyasaye, Nyasayewo yarumbula akamasila khushialo shino,

³kho akholile butswa aka yali niyarumbula mbu yakhakhole. Kano koosi kekholeeshe kario shichila abandubo bano bonoonela OMWAMI Nyasaye, khandi shibaloonda amalakoke tawe.

⁴Ne bulano, embolola eminyololo echili khumakhonoko nekhulekhuula. Noba niwenya, khutsie ninawe Babuloni, khutsie ndalakhulinda obulayi. Ne noba nolenya okhutsia ninefwe ta, oli omulekhuule okhutong'a hano. Lola, oli omulekhuule okhutsia hosi hosi aha wenya. Eshialo shiosi shili imbeliwo, onyala okhwahulakhwo habundu hosi aha onyala okhutsia okhumenya.

⁵Noba niwenya okhukalukhayo, kho kalukha otsie ewa Gedalia omusiani wa Ahikamu omwitsukhulu wa Shafani, owomuruchi wa Babuloni yayemeshe okhuba omukafuna wa mataala ka Yuda. Kho onyala okhumenyayo ninaye mubandu barukanga. Noho onyala okhutsia habundu undi hoosi aha wenya okhumenya.” Mana Nebuzaradani nahelesia Yeremia ebiokhulia biokhwikhoonyela khandi namuhelesia eshihaanwa, ne namulekhuula okhutsia.

⁶Mana Yeremia natsia okhumenya nende Gedalia mushialo shia Mizipa, namenyayo halala nende abandu abali nibaleshilwe mushialo eshio.

⁷Olwa abemilisi belihe ba Yuda halala nende abelihe babwe, abali nibashili mushialo eshio bahulila mbu omuruchi wa Babuloni yemeshe Gedalia omusiani wa Ahikamu okhuba omukafuna wokhusinjilila abandu abatakha boosi abali nibatonyile mu Yuda nibalayililwe mubuhambe Babuloni ta,

⁸boosi betsa okhulola Gedalia nali Mizipa. Abetsa okhumulola bali Ishimaeli omusiani wa Netsania, Yohanani nende Yonatsani abasiani ba Karea, Sereya omusiani wa Tanihumetsi, abasiani ba Efai owokhurula Netofa, nende Yezania owokhurula Maaka, bano boosi batsia okhulola Gedalia nali Mizipa nibali nabelihe babwe boosi.

⁹Gedalia yetsuba imbeli wabwe nende imbeli wabelihe babwe naboola ari, “Mularie okhuba hasi wa Babuloni tawe, mumenye mushialo eshio khandi mukhalabanile omuruchi wa Babuloni, mana amakhuwa kenywe kalaba amalayi.

¹⁰Isie ndalamenya Mizipa, ne enzia okhuba omukobosheli wenywe khu aba Babuloni olwa betsa khwifwe. Nebutswa inywe mukhung'asie nende okhwibishila idivai, nende ebiamo ebiengu, nende amafura kemiseituni, mana mumenye mumataala kenywe aka mubukuule.”

¹¹Khandi olwa Abayahudi abali mushialo shia Moabu, nende shia Amoni, nende shia Edomu, nende mubialo bindi biosi bahulilakhwo mbu omuruchi wa Babuloni yali nafuchilile okhulekha abandu bandi khubayahudi okhumenya mushialo shia Yuda, khandi mbu yali niyemeshe Gedalia omusiani wa Ahikamu okhuba omukafuna wabwe,

¹²boosi bachelela mushialo shia Yuda. Mana nibetsa khu Gedalia Mizipa, ne nibakhung'asia idivai inyinji nende ebiamo ebinji.

¹³Olunyuma lwako, Yohana omusiani wa Karea nende abemilisi belihe bandi betsa khu Gedalia nali Mizipa,

¹⁴mana nibamuboolela bari, “Omanyilekhwo mbu, omuruchi Baalisi wa Abamoni urumile Ishimaeli omusiani wa Natsani okhukhwiira iwe?” Nebutswa Gedalia shiyasuubila amakhuwa kabwe tawe.

¹⁵Mana Yohanani namuboolela mumasilisi ari, “Lekha enzie ndiire Ishimaeli, ne shialiho oulamanya tawe. Mbushiina afuchilile okhukhwiira? Ako kalachila Abayahudi boosi abakhung'anile ewa oli basalaane. Khandi kalareera amatinyu khubandu boosi abasikala mu Yuda.”

¹⁶Nebutswa Gedalia yamukalusia ari, “Shiolakholakhwo orio tawe! Aka oboolanga khu Ishimaeli shikali akatoto tawe!”