Read wanga YEREMIA 41 Bible Online

YEREMIA 41 - wanga bible

YEREMIA 41

¹Mana mumwesi kwomusafu kwomumuyika okwo, Ishimaeli omusiani wa Netsania omwitsukhulu wa Elishama, mulala khubeinzu yoburuchi khandi mulala khubemilisi abakhongo bomuruchi yetsa Mizipa nali nabandube ekhumi okhulola Gedalia. Olwa bali nibaliitsanga ebiokhulia,

²Ishimaeli nende abandube ekhumi abo barusia tsinganga tsiabwe mana nibeera Gedalia, owa omuruchi wa Babuloni yali niyemekha okhuba omukafuna wa Yuda.

³Mana khandi nibeera Abayahudi boosi nende abelihe boosi abali nibali nende Gedalia Mizipa.

⁴Inyanga yaloondakhwo, omundu yesi nashili okhumanyakhwo akokhwiirwa khwa Gedalia,

⁵abasaatsa amakhumi munane betsa okhurula Shekemu, Shilo nende Samaria. Bali nibabechile tsindefu tsiabwe, nibarandule tsingubo tsiabwe khandi nibesalaache emibili chiabwe shichila bali nibekhuulanga. Bali nibayilanga imele nende obubane khulwa okhuhaana shinga omusango muhekalu.

⁶Mana Ishimaeli narula elwanyi welitookho lia Mizipa okhutsia okhubaakaanila, ne yatsia niyekhulanga. Olwa yoola ewa bali yababoolela ari, “Chame mwinjile mulolekhwo Gedalia omusiani wa Ahikamu.”

⁷Ne olwa benjila mwitookho, Ishimaeli halala nabandube nibabeera, ne nibasukuna emibili chiabwe mwiyabo liamatsi.

⁸Nebutswa abandi ekhumi khubomukanda okwo baboolela Ishimaeli bari, “Nochama olakhwira tawe, khulikhwo nende ingano ishayiri, amafura kemiseituni nende obuushi ebia khubisile mubulimo.” Kho shiyamala abeere tawe.

⁹Ne liyabo elia Ishimaeli yafuubamwo emilambo echio nilio eliali likhongo muno, liomuruchi Asa yayaba khulwa okhuria omuruchi Baasha wa Isiraeli. Ishimaeli yetsusiamwo emilambo.

¹⁰Mana Ishimaeli nabahamba boosi abali nibasikale e Mizipa, abakhaana bomuruchi nende abandu bandi boosi aba Nebuzaradani omukhongo wa abelihe yali niyabalekha okhuba hasi wa Gedalia omusiani wa Ahikamu. Ishimaeli yababukula boosi okhuba abahambe ne nisumukha ninabo khunjila eyihenjile mushialo shia Amoni.

¹¹Nebutswa Yohanani omusiani wa Karea nende abemilisi abelihebe boosi olwa bahulilakhwo amakhuwa amabi ka Ishimaeli yali nakholile,

¹²babukula abelihe babwe boosi mana nibalondachila Ishimaeli khulwa okhumuseera. Bamunyolelesia ahambi nende liyembo liamaatsi elili Gibeoni.

¹³Ne olwa abahambe aba Ishimaeli yali natiilile balola Yohanani halala nende abemilisi abelihe abali ninaye boosi basangaala

¹⁴mana nibashiukhana nibakalukha ewa Yohanani yali.

¹⁵Nebutswa Ishimaeli halala nende abandube munane baswekha okhurula khu Yohanani nibatsia mushialo shia Amoni.

¹⁶Mana Yohanani halala nende abemilisi abelihe abali ninaye nibabukula abandu boosi abasikala, aba Ishimaeli omusiani wa Netsania yali natiilile shinga abahambe okhurula Mizipa olunyuma lwokhwira Gedalia omusiani wa Ahikamu nibo, abelihe, abakhasi, abaana nende abalate. Yohanani yabachelesia boosi okhurula Gibeoni.

¹⁷Batsiililila noluchendo mana nibasinjila habundu ahalangwa mbu Gerutsi-kimuhamu ahambi nende Betselehemu niberechekhanga okhutsia Misiri,

¹⁸khulwa okhuria aba Babuloni. Bali noburi shichila Ishimaeli yali niyeerire Gedalia, owa omuruchi wa Babuloni yali niyemekha okhuba omukafuna weshialo eshio.