Read wanga YEREMIA 42 Bible Online

YEREMIA 42 - wanga bible

YEREMIA 42

¹Mana abemilisi abelihe boosi nibalimwo Yohanani omusiani wa Karea, Azaria omusiani wa Hoshaya nabandu boosi abakhongo nabatuutu nibetsa,

²nibaboolela omulakusi Yeremia bari, “Nochama recheresia aka khwenya okhukhureeba, mana okhuusaayile khu OMWAMI Nyasaye, Nyasayewo, okhusaayile ifwe fwesi abasikaale mushialo. Okhuba khwali abanji nebutswa khusikaale butswa batuutu abololanga butswa bano.

³Khusaayile kho mbu OMWAMI Nyasaye, Nyasayewo okhumanyie injila ya khunyala okhuloondakhwo nende akakhukhoyile okhukhola.”

⁴Mana Yeremia nabakalusia ari, “Embuliile amakhuwa kenywe, kho enzia okhusaaya khu OMWAMI Nyasaye, Nyasaye wanje shinga olwa mureebile, ne liosi elialangalusia ndalamuboolela, shindalamubisakhwo likhuwa liosi liosi tawe.”

⁵Mana abandu nibaboolela Yeremia bari, “OMWAMI Nyasaye abe omuloli wefwe owatoto khandi omwisiikwa nikhuba nikhulakhola ako aka OMWAMI Nyasayewo akhulaka ifwe okhubirira mwiwe ta.

⁶Kata kabe amalayi noho amabi, ifwe khulakhola aka OMWAMI Nyasayewo aboola. Koosi kalaba amalayi khwifwe nikhuba nikhumuhulila.”

⁷Mana olunyuma lwetsinyanga ekhumi, OMWAMI Nyasaye yaboola nende Yeremia.

⁸Mana Yeremia nalanga Yohanani halala nabemilisi abelihe abali ninaye, halala nende abandu boosi okhurula khumukhongo okhuula khumutuutu,

⁹nababoolela ari, “OMWAMI Nyasaye, Nyasaye wa Isiraeli, owamwayarumilekhwo okhura amasaayo kenywe imbeliwe aboola ari,

¹⁰‘Nimuba nimutsiililila okhumenya mushialo shino, kho ndalamumbakha, ne shindalamulikulula ta, ndalamuraaka, ne shindalamusiula ta, Amabi kandamureerera kambelesiye muno.

¹¹Mularie omuruchi wa Babuloni tawe. Isie endi ninenywe, ne ndalamuhonokosia okhurula mumakhonoke.

¹²Ndalamubeela tsimbabasi kho mbu yesi khandi alamubeela tsimbabasi, ne alamufuchilila inywe okhukalukha mushialo shienywe. Isie OMWAMI Nyasaye nolwa emboola.’

¹³“Nebutswa nimuba nimutsiililila okhuboola muri, ‘Shikhwenya okhumenya mushialo shino ta,’ ne nimuloba okhulonda amakhuwa aka OMWAMI Nyasaye, Nyasaye wenywe,

¹⁴khandi nimuboola muri, ‘Khwenya okhutsia okhumenya Misiri, ewa lihe, inzala nende tsimbungu tsiokhuseerwa tsibula.’

¹⁵Kho kano niko aka OMWAMI Nyasaye omwene mahe aboola khwinywe abasikala mu Yuda ari, ‘Nimuba nimutsaalikha okhutsia Misiri,

¹⁶kho lihe lia muriitsanga lilabanyoolelesia ebweneyo, khandi inzala yamuriitsanga yilamulondakhwo okhuula ebweneyo, khandi ebweneyo niyo ewa mulafwila.

¹⁷Ako niko amasila akalakwila omundu yesi outsaliikha okhuboola mbu yenya oukhutsia okhumenya Misiri. Toto mwene mulafwa khulwa olukanga, khulwa inzala khandi khulwa olumbe. Abulaho khwinywe oulahonokokha okhurula khumasila kenzia okhumureerera ebweneyo.’

¹⁸“Okhuba isie OMWAMI Nyasaye omwene mahe, Nyasaye wa Isiraeli emboola endi, ‘Shinga olwa liruma lianje lilulu liabuushila khubandu ba Yerusalemu, khandi nolwa obululu bwanje bulasundushila khwinywe olwa mutsia Misiri. Mwakhabe abeshisinyo mutsimoni tsiabandu, abokhutseshelelwa, khandi abokhunyekwa. Shimwakhalolekhwo habundu hano khandi tawe.’ ”

¹⁹Mana Yeremia nameeta okhubaboolela ari, “Inywe Abayahudi abasikala, OMWAMI Nyasaye umukayile mbu mulatsia mushialo shia Misiri tawe. Kho siesi khandi emuchetsiyia leelo nimuboolela mbu,

²⁰mukorire khandi muretsanga obulamu bwenywe mumasila, okhuba mwaruma khu OMWAMI Nyasaye wenywe, nimuboola muri, ‘Okhureebele khu OMWAMI Nyasaye wefwe, ne liosi liosi eliaboola khulalikhola.’

²¹Kho nasi inyanga yino emubooleele amakhuwa ako, nebutswa inywe shimuhulilanga aka OMWAMI Nyasaye wefwe yaruma okhumuboolela tawe.

²²Khulwako mumanye toto mbu, muleerwa khulwa olukanga, inzala nende olumbe mushialo shia Misiri eshia mwenyanga okhutsiamwo eshio.”