Read wanga YEREMIA 43 Bible Online

YEREMIA 43 - wanga bible

YEREMIA 43

¹Olwa Yeremia yamala okhuboolela abandu amakhuwa koosi aka OMWAMI Nyasaye wabwe yali namulachile okhubaboolela,

²Azaria omusiani wa Hoshaya nende Yohanani omusiani wa Karea halala nende abandu bandi abeinjinia baboolela Yeremia bari, “Iwe okhukatanga. OMWAMI Nyasaye, Nyasaye wefwe shiakhurumilekhwo mbu okhuboolele khuleshe okhutsia mushialo shia Misiri tawe.”

³Habula Baruku omusiani wa Nerea niye oukhutsuubanga okhuboola amakhuwa amabi khwifwe, kho mbu Abababuloni betse bakhutiile, bakhwiire noho bakhuyile mubuhambe mushialo shiabwe.

⁴Kho Yohanani nende abemilisi belihe nabandu boosi nibaloba okhulonda lilako lia OMWAMI Nyasaye, liokhusikala mushialo shia Yuda.

⁵Mana Yohanani nende abakhongo abelihe nibabukula abandu boosi nibabayila mushialo shia Misiri. Babukula abandu boosi abali nibacheleele okhurula mubialo bia bali nibasalasibwamwo.

⁶Bali abasaatsa, abakhasi, abaana nende abakhaana abomuruchi. Babukula buli mundu wa Nebuzaradani omukhongo wamahe yali niyalekha mumakhono ka Gedalia, nibabukula omulakusi Yeremia halala nende Baruku nibabayila Misiri.

⁷Abandu abo baloba okhulonda lilako elia OMWAMI Nyasaye, mana nibatsia mushialo shia Misiri, niboola mwitookho elia Tapanihesi.

⁸Mana nibali Tapanihesi yaho, OMWAMI Nyasaye yaboola nende Yeremia ari,

⁹“Bukula amachina amakhongo mana akayabile mwitoyi elialongwa mulwanyi oluli habwinjililo bweinzu yomuruchi Faraho eyili Tapanihesi, ne okhole orio Abaisiraeli nibalolanga.

¹⁰Mana oboolele abandu mbu, Isie OMWAMI Nyasaye omwene mahe, Nyasaye wa Isiraeli, ndalareera omukhalabani wanje Nebukadineza omuruchi wa Babuloni mushialo shia Misiri shino. Ne alarenjekha eshifumbishie shioburuchi khumachina aka eyabile hano kano, mana alabaambuula liheemalie lioburuchi khubo.

¹¹Ne olwa yetsa alasasia eshialo shia Misiri. Abo abakhalachilwa okhwiirwa khulwa olumbe balafwa khulwa olumbe, nabo abakhalachilwa okhufwa khulwa okhuyilwa mubuhambe balafwa khulwa okhuyilwa mubuhambe, nabo abakhalachilwa okhufwa khulwa olukanga balafwa khulwa olukanga mwihe.

¹²Alahafia omulilo khu tsihekalu tsia abanyasaye aba Misiri, mana omuruchi wa Babuloni oyo alasamba abanyasaye echio nende okhuchibukula okhuchiyila mubuhambe. Shinga lwomwayi atoolanga tsinda okhurula mushifwaloshie nolwa omuruchi owa Babuloni yetsa okhutoola mushialo shia Misiri ne narulayo nobuhuli.

¹³Yetsa okhusasaka emichina emikhongo chieminara echili Heliopolisi mu Misiri nende okhusamba tsihekalu tsiabanyasaye chia Misiri.”