Read wanga YEREMIA 44 Bible Online

YEREMIA 44 - wanga bible

YEREMIA 44

¹OMWAMI Nyasaye yaboolela Yeremia amakhuwa kano okhulondana khu Abaisiraeli boosi abali nibamenya mushialo shia Misiri, mumatookho ka Migidoli, Tapanihesi, Mefisi nende mutsingongo tsia Patsirosi.

²OMWAMI Nyasaye omwene mahe, Nyasaye wa Isiraeli aboola ari, “Inywe abeene mwalola obusasishi bwa ndareera khwitookho lia Yerusalemu nende khumatookho kandi ka Yuda. Lole, kata leelo luno, amatookho ako namakunda butswa, abulaho oumenyangamwo.

³Katong'a amakunda khulwa okhubeela abandu ba Yuda baasinyisia khulwa okhwinamila abanyasaye bandi nende okhubasambila obubane; bakhalabanilanga abanyasaye aba bo beene noho inywe noho abakuuka babwe balamanyakhwo ta.

⁴Ne kata kario, akhandi akhanji ndamurumila abakhalabani banje abalakusi, bamuchetsiyia nibaboola bari, ‘Mulakhole eshindu eshibii shino ta, shilaasinyisia.’

⁵Nebutswa shibahulila kata okhureka amarwi kabwe tawe. Shibalekha obumayanu bwabwe bwokhusambila abanyasaye bandi obubane tawe.

⁶Khulweshio, liruma lianje lilulu nende okhusinyikha khwanje biasundushila amatookho ka Yuda nende emihanda chia Yerusalemu shinga omulilo. Mana nikasikala amakunda amakhaya butswa shinga olwa kali leelo.”

⁷Khulwako, OMWAMI Nyasaye, Nyasaye wa Isiraeli areeba ari, “Mbushiina mukholanga obubi obukhongo buno, nimwireerera obusasishi khwinywe abeene, abasaatsa khubakhasi, abaana khutsindaana, kho mbu aleshe okhusikakhwoho omundu kata mulala ta?

⁸Mbushiina musinyisinjia khulwa okhwinamila abanyasaye bandi nende okhusamba obubane khubifwanani biabanyasaye ebili mushialo shia Misiri, eshia mwitsile okhumenyamwo? Abeene muleesasia butswa nimwikhola eshindu shieshisinyo khandi eshieshilaamo shiobubi khubandu bamahanga koosi khushialo.

⁹Kho mwakhebilila obumayanu bwabakuuka benywe bakhola, obwa abaruchi ba Yuda, obwa abakhaye babwe nende obumayanu bwenywe abeene, nende obwa abakhasi benywe bakhola olwa bali mushialo shia Yuda nende mumihanda chia Yerusalemu?

¹⁰Nebutswa okhuula olwa leelo mushili okhwitutuyiakhwo kata okhumbelesiakhwo oluyali, kata okhulonda amalako kanje ka ndahelesia abakuuka benywe tawe.

¹¹Khulweshio, isie OMWAMI Nyasaye omwene mahe, Nyasaye wa Isiraeli emboola mbu, ndalamukalukhanakhwo nende okhumusasia inywe mwesi okhurula mu Yuda.

¹²Ndalabukula abasikala khubandu ba Yuda, abarakhwo omwoyo okhwitsa okhumenya mushialo shia Misiri, ndalabamulula boosi pe, baleerwa khulwa olukanga nende khulwa inzala mushialo shia Misiri. Boosi okhurula khumutiiti okhuula khumukhongo balafwa khulwa olukanga nende khulwa inzala. Balaba eshindu shieshisinyo, eshiokhurisia, eshielinyeko khandi eshiokhutseshelelwa.

¹³Ndalahelesia abamenya Misiri eshinyasio shinga butswa olwa ndahaana eshianyasio khwitookho lia Yerusalemu khulwa olukanga, inzala nende olumbe.

¹⁴Abulaho khubandu ba Yuda abeetsa okhumenya Misiri abalahonokokha, noho abalikalukha mushialo eshia Yuda, eshia bekombanga okhukalukha okhumenyamwo khandi tawe. Abulaho oulakalukhayo ta, habula batuutu butswa khwinywe abelukha okhurula mushialo eshio.”

¹⁵Mana abasaatsa boosi abamanya mbu abakhasi babwe bali nibasambile obubane khulwa abanyasaye bandi halala nende abomukanda boosi nende Abaisiraeli abali nibamenya mu Patsirosi mushialo shia Misiri, nibaboolela Yeremia bari,

¹⁶“Shikhulakholakhwo likhuwa liokhubooleele muliira lia OMWAMI Nyasaye tawe.

¹⁷Nebutswa khulakhola buli shindu shia khwetsuba okhukhola, khulasamba obubane khulwa omunyasaye omuruchi omukhasi womwikulu khandi khulamutsushilila emisango chiokhutsukha shinga olwa ifwe, abakuuka befwe nende abemilisi befwe khwakholanga olwa khwali nikhushimenyile mumatookho ka Yuda nende khumihanda chia Yerusalemu. Olwa khwakholanga khurio mutsinyanga etsio khwalinji nebiokhulia ebinji, khwalinji obulayi, ne shikhwalinjikhwo nobutinyu bwosi bwosi tawe.

¹⁸Nebutswa okhurula olwa khwalekha okhusamba obubane khulwa omunyasaye omuruchi mukhasi womwikulu nende okhumutsushilila omusango omutsukha, khwatamba buli shindu khandi khufwitsanga khulwa olukanga nende inzala”.

¹⁹Nabo abakhasi nibaboola bari, “Olwa khwasambanga obubane khulwa omunyasaye omuruchi weshikhasi womwikulu nende okhumutsushilila omusango omutsukha nende okhumuteshela emikaate chilikhwo eshifwananishie, abasaatsa befwe bamanya khandi nibakafuchilila.”

²⁰Mana Yeremia naboolela abandu boosi abasaatsa nende abakhasi nende boosi abali nibamukalusiye bario ari,

²¹“Okhulondana nende obubane bwenywe, nende abakuuka benywe, abaruchi benywe, abemilisi benywe nende abandu boosi mwasamba nimuli mumatookho ka Yuda nende khumihanda chia Yerusalemu, mupaaranga mbu, OMWAMI Nyasaye yebilila noho shiyetsulilanga ta?

²²OMWAMI Nyasaye yakhaywa okhutsiililila okhwisimilisilia obumayanu bwenywe nende obubi bwebikhole bienywe, ne niko akachila eshialo shienywe nishikwa likunda, nishitseshelelwa khandi nishikwa linyeko, eshiomundu yesi alanyala okhumenyamwo, shinga butswa olwa shili olwa leelo tawe.

²³Amakhuwa amabi kano kamwitsiile leelo shichila mwasamba obubane khulwa abanyasaye bandi khandi nimwonoonela OMWAMI Nyasaye khulwa okhulekha okhulonda amalakoke”.

²⁴Mana khandi Yeremia nameeta okhuboolela abandu boosi abakhasi nibalimwo ari, “Recheresie amakhuwa aka OMWAMI Nyasaye aboola, inywe abandu beshialo shia Yuda abamenyile mu Misiri.

²⁵OMWAMI Nyasaye omwene mahe, Nyasaye wa Isiraeli aboola mbu, inywe nende abakhasi benywe mumalile okhwitsuba mbu shimulachweya okhuusia aka mwetsuba okhukhola ta, mbu okhusamba obubane nende okhutsushilila emisango echiokhutsukha khulwa omunyasaye omukhasi omuruchi womwikulu. Kho khole butswa aka mwetsuba okhumukholela.

²⁶Nebutswa recheresie aka isie OMWAMI Nyasaye emboola inywe abandu beshialo shia Yuda abamenyanga mushialo shia Misiri, emboola mbu, isie ndamala okhwitsuba khulwa eliira lianje likhongo mbu, eliira lianje shiliakhekhonyelwekhwo nabandu ba Yuda, abamenyile mushialo shia Misiri tawe. Abulaho khwinywe oulikhoonyela eliira lianje khulwa ekhwitsuba naboola ari, ‘Nditsuba muliira elia OMWAMI Nyasaye ouliho mwoyo.’

²⁷Okhuba emuhenjelesinjia khulwa okhumureerera amabi halali amalayi tawe. Inywe mwesi abali mushialo shia Misiri mulamululwa khulwa olukanga nende inzala okhuula olwa mufwa mwesi pe.

²⁸Nebutswa batiiti khwinywe balihonokokha mana nibakalukha mushialo shia Yuda. Abasikala khubandu abeetsa okhumenya Misiri balimanyilisia mbu, nakawina akaliba akatoto, akanje noho akabwe.

²⁹Isie OMWAMI Nyasaye esuubisia mbu, enzia okhumuhelesia eshinyasio hano butswa mushialo shia Misiri, kho mumanye mbu, obusuubusie bwanje bwokhumuhelesia eshinyasio bwakhosibwe. Ne shino nishio eshilaba eshimanyisio,

³⁰Ndakhare omuruchi Hofura wa Misiri mumakhono ka abo abakhabanga okhumwiira, shinga butswa olwa ndahaana omuruchi Zedekia wa Yuda mumakhono komuruchi Nebukadineza wa Babuloni, owali omusukuwe khandi owakhabanga okhumwiira”.