Read wanga YEREMIA 46 Bible Online

YEREMIA 46 - wanga bible

YEREMIA 46

¹OMWAMI Nyasaye yaboolela omulakusi Yeremia oburume buno okhulondana nende abandu bamahanga.

²Okhulondana nende lihanga lia Misiri nende abelihe ba Neko omuruchi wa Misiri, abali nibali Kakemishi hambi nomwalo kwa Yufurate, abomuruchi Nebukadineza wa Babuloni yali niyaseera nende okhubahula mumuyika kwakhane okwa Yehoyakimu yali omuruchi wa Yuda, OMWAMI Nyasaye yarumbula naboola ari,

³Recheshe ebikhumba bienywe nende tsingabo tsienywe, mana mwimanule mutsie mwihe.

⁴Recheshe tsifarasi tsienywe, mana mutsiniinekhwo. Mwimanule nende okhufwala tsikutwa tsienywe. Yiakale amafumo kenywe, mana mwibohe ebitsengwa bienywe.

⁵Nebutswa endolanga shiina? Abelihe lia Misiri bakalukhanga inyuma muburi. Abalwani babwe abalulu bakhupilwe, mana beluushe bwangu, kata shibakhupakhwo amashemo ta. Oburi bubatiilile tsimbeka tsiosi.

⁶Abetsimbilo shibanyala okhwilukha ta, nabo abalwani abalulu shibanyala okhuhonokokha ta. Elubeka lwemasaba ahambi nende omwalo kwa Yufurate, besichiraale mana nibakwa.

⁷Nelihanga shiina elo elichinguukhanga shinga omwalo kwa Naili? Lichinguukha shinga omwalo kwa Naili olwa amaatsi kakwo ketsula nikayemba.

⁸Misiri nilio elichinguukhanga shinga omwalo kwa Naili, shinga omwalo okwitsula amaatsi nikuyemba. Lihanga lia Misiri liboola liri, “Ndalachinguukha niyemba khushialo shiosi, ndalasasia amatookho halala nende abamenyangamwo.

⁹Tsie inywe tsifarasi! Nenyu amakaari aketsifarasi museere. Leshe abalwani abalulu barule. Abasaatsa okhurula Etsiopia nende abokhurula Libia barule nibachinjile ebikhumba biabwe, nabo abasitsa bokhulasa obuyingo okhurula Ludi betse.

¹⁰Nebutswa inyanga eyo neinyanga eya OMWAMI Nyasaye omwene mahe, inyanga yokhurunga eshikwoli, inyanga yokhuhana eshinyasio khubasukube. Olukangalwe lwitsa okhubalia okhuula olwa lwikura, khandi lunywe amatsayi kabwe okhuula olwa lwikura. Okhuba inyanga yino OMWAMI Nyasaye omwene mahe yetsa okhuhaana abasukube shinga omusango mushialo shielubeka lwemasaba.

¹¹Inywe abandu Abamisiri tikulushe mutsie Giliadi, mukhaabeyo indesi. Tsindesi tsienywe tsiosi netsiabutswa; shibulaho eshinyala okhumuhonia.

¹²Amahanga kahulile akeshifimbwa murwe kenywe, eshialo shitsulemwo tsimbungu tsienywe; okhuba omulwani mulala yetuyanga khu undi, mana boosi babili bakwa hasi”.

¹³Olwa omuruchi Nebukadineza wa Babuloni yetsa okhuseera eshialo shia Misiri, OMWAMI Nyasaye yaboolela omulakusi Yeremia ari,

¹⁴“Orumbule mumataala ka Misiri, elia Migidoli, elia Mefisi, nende elia Tapanihesi. Oboole mbu, mwirecheshe okhwilinda abeene, okhuba ebindu biosi ebia muli ninabio bilasasibwa mwihe.

¹⁵Shichila shiina omunyasaye wenywe wamaani Apisi yelushe? OMWAMI niye oumukhupile hasi.

¹⁶Abalwani benywe besichirala nibakwa hasi, baboolanga mbu, chende khutsie bwangu ingo khubandu befwe, khwihonokosie okhurula khulukanga lwa abasuku befwe.

¹⁷Helesie omuruchi wa Misiri eliira liyia, mumulanje mbu, ‘Owobuyoka butswa,’ owakosia butswa obwiyangu.

¹⁸Isie OMWAMI Nyasaye omwene mahe, nisie omuruchi ouli mwoyo, shinga butswa olwa eshikulu shia Tabori shili eshirambi mubikulu biosi, khandi shinga olwa eshikulu shia Karimeli shisinjila hanyanza, nolwa amaani ka oyo oukhuseeranga kali.

¹⁹Inywe abandu ba Misiri, mwirecheshe okhuyilwa mubuhambe. Mefisi nalikholwe eshitsiimi, nalikwe likunda, habundu aha omundu alanyala okhumenyaho ta.

²⁰Misiri shifwana shinga ing'ombe indayi, nebutswa eyiseerirwe nelibuko liokhurula emasaba.

²¹Kata abalwani ba Misiri bokhurungwa babula eshiabanyala, bali butswa shinga ebimoosi ebianera. Boosi bashiukhana nibelukha, shibasinjila okhulwana tawe. Okhuba inyanga yabwe yokhumululwa yulile, inyanga yabwe eyokhuhebwa eshinyasio.

²²Misiri shilukha nishinyololokha shinga inzokha; okhuba abalwani abasukube bachenda nibasita ahambi, bashiseera netsihaywa shinga abandu abaremanga emisaala.

²³Balashisasia shinga olwa emisaala eminji chisasibwa mumutsuru OMWAMI aboola ario, abasaatsa babwe nabanji abalanyala okhubalwa ta, abalwani babwe nabanji okhushila tsisiche.

²⁴Abandu ba Misiri balafimbibwa emirwe, okhuba balahulwa nabandu bemasaba”.

²⁵OMWAMI Nyasaye omwene mahe, Nyasaye wa Isiraeli emboola endi, “Endi ahambi okhuhaana eshinyasio khu Amoni omunyasaye wa Tsebezi halala nende abanyasaye bandi abeshialo shia Misiri. Ndalahaana eshinyasio khu baruchi ba Misiri, abandu ba Misiri nende khu bandu boosi abesikanga mubunyali bwa Misiri.

²⁶Ndalabahaana mumakhono ka abo abakhaabanga okhubeera. Ndalabahaana khumuruchi Nebukadineza nende abelihebe. Nebutswa olunyuma abandu balimenya mushialo shia Misiri khandi, shinga olwa bamenyangayo mumiyika chiabira. Isie OMWAMI emalile okhuboola.”

²⁷“Nebutswa inywe abandu banje mularie ta, inywe abandu ba Isiraeli mulafwa omwoyo tawe, okhuba ndalamuhonia okhurula mushialo shiehale, ndalahonia abolwibulo lwenywe okhurula mushialo shia mulimwo ababohe. Mulakalukha ingo wenywe ewa mulimenya mumulembe, muliba nomulembe ne abulaho owakhamurisie.

²⁸Iwe Yakobo omukhalabani wanje olaria ta, okhuba endi ninawe, isie OMWAMI nolwa emboola, ndalamulula amahanga koosi aka ndamusalasiamwo, nebutswa inywe shindalamusasilia elala tawe. Ne kata kario shindalalekha okhumuhelesia eshinyasio tawe, nebutswa olwa emuhelesia eshinyasio, ndakhabe netsimbabasi, Isie OMWAMI nolwa emboola”.