Read wanga YEREMIA 48 Bible Online

YEREMIA 48 - wanga bible

YEREMIA 48

¹OMWAMI Nyasaye omwene mahe, Nyasaye wa Isiraeli arumbula khu Moabu ari, “Bali mushilaamo shiobubi abandu abamenyanga mwitookho lia Nebo, okhuba limalile okhusasibwa! Litookho lia Kiriatsaimu libukuulwe, tsingoba tsialio tsiamaani tsilikuluulwe, nabo abamenyamwo bafwimbiibwe omurwe.

²Oluyali lwa Moabu shiluliho khandi ta. Abasuku balio abali Heshiboni, batuta okhuliseera nende okhulisasia nibaboola bari, ‘Yetse khulisasie, lileshe okhubakhwo lihanga khandi ta.’ Nawe Madimeni olaholelesibwa, olukanga lulakhusasia.

³Hulile tsimbungu okhurula Horonaimu, ‘Okhusasibwa nende okhumululwa okhukhongo!’

⁴‘Moabu limuluulwe!’ Abaana balio bekhuula.

⁵Hulila tsimbuungu tsiabwe olwa batikulukha khushisia shia Luhitsi; beekhuula neshibeela nibakholomokha Horonaimu.

⁶Balanjilisia nibaboola bari ‘Mwiyanguyie, yilushe mwihonokosie! Be shinga isishili - nabulimo eyomushitsiimi!’

⁷Iwe Moabu wesikanga tsingobatsio nende emianduchio omwene, niko akachila kata wesi olahulwa. Omunyasayewo Kemoshi alayilwa mubuhambe, halala nende aboluyalibe nende abakhalabanibe boosi.

⁸Omusuku alamulula amatookho koosi, libulaho elilahonokokha kata elala; libanda lilasasibwa, kata eshikuuri shiosi shirio,” nilwo olwa OMWAMI Nyasaye aboola.

⁹“Sinjisilie lihanga lia Moabu eshitsulilo; okhuba toto lilamululwa; amatookho kalio kalakwa amakunda, kata shikalaba nende oukamenyamwo ta.

¹⁰Ali mushilaamo shiobubi oyo outofula okhukhola emilimo echia OMWAMI Nyasaye, kata oyo owikalila olukangalwe oburataatsia eshitsayi ta.”

¹¹OMWAMI aboolile ari, “Okhurula khulusooliililwe, Moabu yelambisia butswa shinga idivai yenjeekhwe; ashili okhutsukhululwakhwo okhurula mundabu ndala okhutsia muyindi, noho okhuyilwakhwo mubuhambe tawe; khulweshio eshimilamilishie shishili shiosi eshitsanzilashie shishili okhusasibwakhwo tawe.

¹²“Kario OMWAMI Nyasaye aboola ari, Ebise bitsanga olwa ndalamurumila abokhumutsukhulula nibamutiinya shinga amalwa, nende okhurabula tsindabutsie ebikonjio.

¹³Nolwa lihanga lia Moabu lilafimbwa omurwe nomunyasaye walio Kemoshi, shinga olwa Isiraeli liafimbwa omurwe nende Betseli, omunyasaye wa liali niliesika.

¹⁴“Mwakheyitsiala murie shinga olwa muli abalulu, abamaani amanji mwihe?

¹⁵OMWAMI Nyasaye omwene mahe aboola ari, Omusuku aseerire lihanga lia Moabu nalimulula, nasinza abaraaka balio abalobole.

¹⁶Amasila ka Moabu kasitile ahambi okhusasibwa khwalio khwitsa bwangu.

¹⁷“Yikhuule litookho elio, inywe abamenyani balio, halala nende bosi abahulilanga ifuma yalio; yikhuule nimuboola muri, ‘Mako indabushi yoburuchi ifiniishe, indabushi yoluyali yamaani shiyishiliho khandi tawe.’

¹⁸Yikha okhurula aholuyali, niwiyikhasia mulufu, iwe omukhaana owechinguula Diboni! Okhuba omusuku wokhumulula Moabu akhubuushiilekhwo; amuluule tsingobatsio.

¹⁹Sinjile hamihanda nimuhenga, inywe abamenyanga mwitookho lia Aroeri! Reebe abasaatsa nabakhasi abelukhanga yabo muri, Eshibii nishi?

²⁰Yikhuule nimulila; Okhuba lihanga lia Moabu lihulilwe, nilifimbwa omurwe! Lanjisilie hamuchela kwa Arinoni, mbu Moabu likwisiibwe likunda.

²¹“Ebibala biomuhololookhwe bikhalachiilwe eshiina, nibihelesibwa eshinyaasio; eshibala shia Holoni, eshia Yasa, Mefaatsi,

²²Diboni, Nebo, Betsi-dibulatsaimu,

²³Kiriatsaimu, Betsi-kamuli, Betsi-meoni,

²⁴Keriotsi nende eshibala shia Bosira. Amatookho koosi komwihanga lia Moabu, akali ahambi nende ehale, koosi kanyoolile eshinyaasio eshio.

²⁵Amaani ka Moabu kahwele, obunyali bwalio nabwo buulile khushiakamo, nolwa OMWAMI abool.”

²⁶OMWAMI aboola ari, “Nywesie Moabu idivai ameere, okhuba yechinjimisiiye niyafukula isie OMWAMI. Lekha akalaakale mumasaleke omwene, nakwa eshindu shiokhutseshelelwa nabandu.

²⁷Moabu, witsulilakhwo shinga olwa watseshelela Isiraeli? Kata lwolamutiila niyebanga ta, waboolelanga khumeno keikulu buli olwa wamuralangakhwo.

²⁸Inywe abamenyanga Moabu, rule mumataala kenywe. Tsie mumenye mutsinyanda! Mube shinga lihusi eliumbakhanga eshitsu habwinjililo bweimbinga.

²⁹Khwahuliile akobwichinjimisi bwa Moabu, ye nowokhwilola muno nowokhwihulila, weisunga, mana khandi weinjinia. Yeyitsialanga mumwoyokwe muno.”

³⁰OMWAMI Nyasaye aboola ari, “Ndamanya shinga olwa yooma omurwe, okhwiyitsialakhwe khubula inganga, akholanga butswa amakhaya.

³¹Niko akachila nindikhuula Moabu; ekhupa tsimbungu khulwa lihanga lia Moabu liosi; ndikhuula abandu ba Kiriheresi.

³²Ekhulilila iwe omutsabibu kwa Sibima, okhushila shinga olwa ndalilila litookho lia Yazeri! Amasakako kambukha inyanza, nikalanda okhuula Yazeri; ne bulano owonooninjia amalile okhukwa khubiamobio biomushimiyu nende khutsinzabibutsio.

³³Obusangaafu nende okhwikhoya biyiiniibweho okhurula mushialo eshinulu shia Moabu; ndakamiye idivai okhurula mubitiinyilo; abulaho oulachitiinya nakhupa tsingalakala ta; kata tsingalakala shitsilaba tsingalakala tsiatoto tawe.

³⁴“Amatookho ka Heshiboni nende Eleale kakhupa tsimbungu, emioyao chiako chihuliliikha okhuula Yahazi, okhurula Zoari okhuula Horonaimu nende Egelatsi-shelishiya. Okhuba kata amaatsi ka Nimurimu kakhamuluushe.”

³⁵OMWAMI aboola ari, “Mana nasi ndalakamia mushialo Moabu boosi abamalilanga emisango habundu ahechiinguukhu nende okhuhaanila abanyasaye babwe ebihaanwa.

³⁶“Niko akachila omwoyo kwanje nikulila shinga lilele khulwa Moabu, khandi omwoyo kwanje kulila shinga lilele khulwa abandu ba Kiriheresi, okhuba emiandu chia bali nibenyoolela chisishile.

³⁷“Shichila buli omurwe kubechilwe khandi buli eshilefu shiosi shibechilwe; emikhono chiosi chilikhwo tsimbala, nabio ebishienje biiboheelwe tsingubo tsiamakunia.”

³⁸OMWAMI aboola ari, “Khubilama bietsinzu tsia Moabu tsiosi, nende mubikuuri nokhwikhuula; okhuba ndaarire Moabu shinga inyungu eyilekombwakhwo khandi ta.

³⁹Makowe, yaatiishe! Makowe, beekhuula! Moabu ashiukhaane nahambilwe tsisoni! Nolwa Moabu akwile eshindu shiokhutseshelelwa, khandi eshiamariisia kabamenyanibe.”

⁴⁰Okhuba kano niko aka OMWAMI aboola: “Lole, aleekha hasi shinga indutsu, nabambula tsimbahatsie okhuyinga Moabu;

⁴¹amatookho kalabukulwa tsingoba natsio nitsihambwa. Khunyanga eyo, emioyo chiabakhupani abalulu ba Moabu chilaba shinga omwoyo kwomukhasi oulumwa inzibula.

⁴²Lihanga lia Moabu lilamululwa okhurula khushialo shichila liekhulumamia nilimufukula OMWAMI.

⁴³Akamariisia, obuko, nende eshikoye bili imbeli wenywe, inywe abamenyanga mu Moabu, nolwa OMWAMI aboola.

⁴⁴Buli owilukha akamariisia ako alakwa mubuko, ne buli ouniina narula mubuko alahambwa mushikoye. Okhuba ndalareera kano koosi khu Moabu mundaalo tsieshinyaasio shiabwe,” nolwa OMWAMI aboola.

⁴⁵“Mushinikha shia Heshiboni abo abelukha okhwihonokokha beema nibaluyile; okhuba omulilo kurulile mu Heshiboni, olumemu lwomulilo okhurula munzu ikhulundu ya Sihoni, lumuluule okhuchaachila mumabanda okhuula mubikulu bia Moabu, abandu beinduli bano.

⁴⁶Oli mushilaamo shiobubi iwe Moabu! Abandu ba Kemoshi basishile, okhuba abaanabo abasiani bahambilwe imbambe, abaanabo abakhaana nabo nibayilwa mubuhambe.

⁴⁷Nebutswa ndalakalusia tsikhabi tsia Moabu mundaalo tsiolunyuma,” nolwa OMWAMI aboola. Hano niho aha eshinyaasio shia Moabu shiakama.