Read wanga YEREMIA 49 Bible Online

YEREMIA 49 - wanga bible

YEREMIA 49

¹Kano niko aka OMWAMI Nyasaye aboola khubandu ba Amoni: “Isiraeli abulakhwo abaana abasiani noho? Abulakhwo owa anyala okhulaamila obulaame? Ne mbushiina Moleki nanuula obulaame bwa Gadi, abandube nibamenya mumatookho ka Gadi?

²Khulweshio OMWAMI aboola ari, tsinyanga tsitsanga olwa ndalakhupa olwika olwelihe okhuseera Raba, litookho lia Amoni. Lilakwisibwa eshibunjikho shiamachina, amataaala kalio nako nikasambwa nomulilo. Mana Isiraeli alenyoolela khandi obulaamebwe, okhurula khubalia abali nibamunuula,” nolwa OMWAMI aboola.

³“Wikhuule, iwe Heshiboni, okhuba Ayi lilikuluulwe! Khupe tsimbungu, inywe abakhaana ba Raba! Mwifwale ebiifwalo biamakunia, nimutaaba eyi nende eyi nimwikhuula! Okhuba omunyasaye wenywe Moleki alayilwa mubuhambe, halala nabesaaliisibe nende abakhulundube bosi.

⁴Eshichilanga niwiyitsialila amaniko nishiina? Amaniko kahwetseshelelanga, iwe omukhaana wubula obwisiikwa. Wesika emianduchio, noboola ori, ‘Ni wina oulaaseera isie?’

⁵OMWAMI Nyasaye, Nyasaye Wamahe aboola ari, Ndalakhurerera akamariisia, okhurula khubamenyanibo tsimbeka tsiosi, nenywe mulasalaasibwa, buli mulala injilaye, kata shialabaho oukhung'aasia yabo abeelukha tawe.

⁶“Nebutswa olunyuma lwene ndalakalusia tsikhabi tsia Abamoni, nolwa OMWAMI Nyasaye aboola.”

⁷ OMWAMI Nyasaye mwene mahe areeba abeshialo shia Edomu ari, “Obuchesi bwahwa mu Temani noho? Kata obuchetsiyii bwasikha okhurula mubarechelefu? Obuchesi bwabwe bwabakhamakhwo?

⁸Shiukhane mwilushe, mukholomoshe emwalo mutsimbinga, inywe abamenyanga Dedani! Okhuba ndalakhola amasila ka Esau kamukwile, khubise bilia ebia emuhelesia eshinyaasio.

⁹Okhuchesa betsinzabibu nibakhakhwitsila, shibakhalekhakhwo etsiokhufulula? Kata abeebi nibaba nibakhwitsila mushilo, babukula butswa bilia ebia beenya.

¹⁰Nebutswa isie emunaabuule Esau eshiechenye, efuunuule habunduwe ha yebisanga, shianyala okhwibisa khandi ta. Olwibulolwe lumuluulwe, halala nabeekhobe nende abamenyanibe bosi, abulaho ousikaale.

¹¹Ndeshela abaanabo ababisandu, ndalabalinda babe mwoyo; nabo abakhasibo abalekhwa bandisiche isie.”

¹²Okhuba kano niko aka OMWAMI aboola: “Nikakhaba mbu kata balia abalaali nibakwaniile okhunyoola eshinyaasio ta banywa khushikombe eshio, nobe iwe ourakuumwa noho? Shiolahonokokha eshinyaasio ta, okhuula olanywa eshikombe eshio.”

¹³Okhuba ndetsuba khwisie omwene, nilwo olwa OMWAMI aboola ari, “Ltookho lia Bozira lilakwa eliamariisia khandi eliokhutseshelelwa, lilekhola likunda, khandi lilakwa linyeko. Amataala kalio koosi kalakwisibwa amakunda inziayo.”

¹⁴Embuliile amacheni okhurula khu OMWAMI, omurumwa arumilwe khumahanga: “Mwikhung'aasie halala mumuseere, mubuushile khulwa lihe!

¹⁵Okhuba ndalakhutuutuyia mumahanga kandi koosi, nikhukhola okhuchaywa nabandu.

¹⁶Okhuriisia khworiisinjia abandu nende obwichinjimisi bwomwoyokwo bikhukaatiiye, iwe oumenyanga munjengulukho tsietsinyanda, nohanda khubutenje bwebikulu. Kata olwa wumbakha eshitsushio hekulu shinga indutsu, ndalakhukwisia hasi okhurula ebweneyo,” nolwa OMWAMI aboola.

¹⁷“Litookho lia Edomu lilakwa eliamariisia; buli oulibirakhwo alatiilwa noburii, nahuchisibwa namanyakhano kalio.

¹⁸Abulaho oulalimenyamwo khandi, noho kata okhumbakhamwo ta. Lilaba shinga olwa amatookho ka Sodomu nende Gomora, halala nende akakabotokhana kali olwa kakwisibwa,” nolwa OMWAMI aboola.

¹⁹“Ndaleelusia abandu ba Edomu okhurula mushialo shiabwe, shinga olwa italanyi yilondungwa okhurula mumutsuru kwa Yorodani niyimaala mubwayilo bwamakondi obunulu. Ne ndaleemekha yesi yesi owa ndaahula okhumusinjilila. Okhuba niwiina ouhelana ninasi? Kata niwiina ounyala okhuyingana ninasi mushiina? Ali heena omwayi ounyala okhwema imbeli wanje?”

²⁰Khulweshio hulile aka OMWAMI achoomile okhukholela Edomu, tsiyemitsie okhuyinga abamenyanga Temani: “Toto kata tsindaana tsiabwe tsilarusibwaho; toto abamenyani babwe bosi balahuchisibwa nende kalia akalakwila Edomu.

²¹Okhukwa khwa Edomu khulatechesia eshialo shiosi; tsimbungu tsiabwe tsilahulilwa nende kata abamenyile khundulo weinyanza inzakhanyu.

²²Lola, alapulukha niyekha hasi shinga indutsu. Alabambula tsimbahatsie okhufukula Bozira, ne emioyo chiabalulu ba Edomu chilayenguha shinga omwoyo kwomukhasi oulumwa inzibula.”

²³Kano niko aka OMWAMI aboola khu Damasiko: “Abandu bamatookho ka Hamatsi nende Aripadi baheenda, okhuba bahuliile amakhuwa kokhuriisia; khulwa oburi, batechela shinga inyanza yirundanga, eyilehotselesia ta.

²⁴Abandu ba Damasiko batubuushe, khulwa indenga yibahambile, kho bashiukhaane nibelukha. Emioyo chiabwe chinyakhana nibasaalila, shinga omukhasi oulumwa inzibula.

²⁵Makowe, litookho lifumanga lileshilwe, litookho liakutsamwo obusaangaafu!

²⁶Kho abaraaka balio balakwa nibandakalala khumihanda, nabo abopani balio balamalilanwa bosi khunyanga eyo,” nolwa OMWAMI Nyasaye omwene mahe aboola.

²⁷“Mana ndalahaafia amasiisi ka Damasiko omulilo, nakwo kulasamba tsingoba tsia Benihadadi.”

²⁸Khuboluyia lwa Kedari nende khubibala bia Hazori arukanga, OMWAMI Nyasaye aboola ari, “Bukha, seera Kedari! Mulula abandu bebukwe bano!

²⁹Wikhwasie amaheema kabwe halala nemiruko chiabwe, tsingubo tsinzeleesia nende emiandu chiabwe; niwibukulila tsingamia tsiabwe. Alanjilisibwe naboolelwa ari: ‘Amasila kakhufuumbiile tsimbeka tsiosi!’

³⁰“Yilushe mutsie ehale, mwibise, inywe abamenyanga Hazori, nolwa OMWAMI aboola. Okhuba Nebukadineza omuruchi wa Babuloni yerecheeshe okhukhuyinga tsiyemitsie netsiokhumufukula inywe.

³¹‘Bukha, oseere lihanga lielambisia butswa lino, lihanga lirateebanga shiosi ta, nolwa OMWAMI aboola. Nilihanga libula ebilibwa kata emiyinjiilo tawe, limenyanga shisale.’

³²“Tsingamia tsiabwe tsilaba ebiyaayo, emiruko chiabwe nachio chiosi chirio. Ndalasalaasia tsimbeka tsiosi balia abatiitanga liswi liabwe khulwa abanyasaye bandi, ndalabareerera amasira okhurula tsimbeka tsiosi, nolwa OMWAMI aboola.

³³“Hazori lilakwa eshimenyo shiamabwe, lilaba likunda inziayo; alabulaho oulamenyamwo kata okhumbakhamwo tawe.”

³⁴Olunyuma lwa Zedekia okhuchaaka okhuruka eshialo shia Elamu, OMWAMI Nyasaye yaboolela lietsela omulakusi Yeremia ari,

³⁵Kano niko aka OMWAMI Nyasaye omwene mahe aboola: “Ndalafunaka obuyingo bwa Elamu, obuli isiilo yamani kabwe;

³⁶nekhola emiyeka okhuhuutsa mu Elamu okhurula tsimbeka tsiosi tsielikulu. Ndalasalaasia abamenyamwo buli habundu, kata shililabaho lihanga liosi liosi liabahambe ba Elamu balachweya okhuyilwamwo tawe.

³⁷Ndalalia Elamu indenga imbeli wabasuku babwe, imbeli wa balia ababaseeranga. Ndalabareerira amasila nende oburuma bwanje obululu, nolwa OMWAMI aboola. Ndalabalondachila nolukanga, okhuula olwa bamululwa bosi.

³⁸Mana ndalasimikha eshifumbi shianje shioburuchi mu Elamu, nimulula omuruchi nende abakhulundu bosi, nolwa OMWAMI aboola.

³⁹Nebutswa mundaalo tsiokhumalilikha, ndalachelesia tsikhabi tsia Elamu, nolwa OMWAMI aboola.”