Read wanga YEREMIA 5 Bible Online

YEREMIA 5 - wanga bible

YEREMIA 5

¹Yilushe nimubira buli habundu mwitookho lia Yerusalemu. Runilisie nimwilolela abeene! Khabilisie mubiiro bialio biosi, mulole naba nalikhwomwo omundu oukholanga akobulunjishi khandi oukhabilisinjia akobwatoto, niyakhabakhomwo kata mulala, kho OMWAMI Nyasaye alabeela tsimbabasi litookho lia Yerusalemu.

²Kata olwa betsubanga nibaboola bari, “Shinga olwa OMWAMI Nyasaye aliho mwoyo.” Khane okhwitsuba khwabwe nokhwobubeeyi butswa.

³Iwe OMWAMI Nyasaye, shiokhaabanga obwatoto noho? Wabakhupa, nebutswa shibahulilakhwo obutsuunwi ta, wabamulula nebutswa baloba okhuchetsiya. Boomia emioyo chiabwe okhushila lichina mana nibakhaya okhwikalukhasia.

⁴Mana nimboola mbu, Bano nabandu abamayaanu, khandi abayingwa okhuba shibamanyile ka Nyasaye yenyanga ta, kata amalako ka Nyasaye wabwe tawe.

⁵Ndalatsia khubemilisi babwe mana ebaboolele. Toto mwene bamanyile ka OMWAMI Nyasaye yenyanga. Bamanya amalako aka Nyasaye wabwe, nebutswa boosi bafukuule obunyali bwa Nyasaye mana nibakhaya okhumuhulila.

⁶Niko akachila italanyi yilarula mumutsuru niyibeera, eshisutse shilarula mushitsiimi nishibarandulamwo. Ingwe yilabakoneshela mumataala kabwe. Buli mundu outsiakhwo elwanyi alamaanywa narandulwamwo okhuba obwonooni bwabwe nobunji nabwo obukhayi bwabwe nobukhongo.

⁷OMWAMI Nyasaye areeba ari, “Eshilachila embeele abandu banje obwonooni bwabwe nishiina? Bandekha khandi nebenamila abanyasaye bandi bobubeeyi. Ndalisia abandu banje nibekura, nebutswa bakhola obuheyi nibayilana nende abatamba.

⁸Bali shinga tsisishili etsietsulamwo akobuyilani. Buli mulala niyekomba omukhasi wowashie.

⁹Kho toto mwene endeshe okhubahelesia eshinyasio khumakhuwa ako? Mana ndakhachweya okhwimalila eshikwoli khwihanga shinga lino?

¹⁰Tsie mubire mutsinyaali tsiomumikunda echiemitsabibu nimumulula, nebutswa mulachimulule okhuhwela elala ta. Mukhalacheyo amasaka kachio, okhuba shikali akanje tawe.

¹¹Okhuba abandu ba Isiraeli nende aba Yuda bakhayiile elala okhuba abesiikwa khwisie, nolwa isie OMWAMI Nyasaye emboola.”

¹²Abandu ba Nyasaye baboola akobubeeyi khu OMWAMI Nyasaye, nibaboola bari, “OMWAMI Nyasaye shialakholakhwo eshindu ta! Kata amabi shikalakhwikholekhakhwo ta. Shikhulaseerwakhwo kata inzala okhukhuluma tawe.

¹³Abalakusi shibalikhwo eshindu ta, bali butswa shinga omuyeka. Okhuba likhuwa lia OMWAMI Nyasaye libula mubo.” Khulweshio akenako kabanyoole abeene!

¹⁴Khulweshio, OMWAMI Nyasaye Ounyala biosi aboola ari, “Shichila baboolile amakhuwa ako, bulano ndalakhola amakhuwa kanje ka ndakhuhelesia iwe Yeremia okhuba omulilo, abandu bano balaba tsikhwi, ne omulilo okwo kulabasamba.”

¹⁵Isie OMWAMI Nyasaye emboola khwinywe Isiraeli mbu, “Isie endeerire lihanga elala okhurula ehale litse limuseere. Lihanga eliaralila khandi liakhale, elia mulanyala okhumanyilisia olulimi lwalio kata okhuhulila amakhuwa kalio ta.

¹⁶Obuyingo bwabwe buli shinga ing'ani yasaame, boosi nabalasani abalulu.

¹⁷Balasasia ebirache bienywe nende ebiokhulia bienywe. Baleera abaana benywe abasiani nende abakhaana, balasinza emiruko chienywe nende ebiayo bienywe, nibasasia emitsabibu chienywe nende emisaala chienywe chiamakhuyu. Abelihe babwe balakwisia amatookho kenywe ketsingoba ka mwisikanga.”

¹⁸OMWAMI Nyasaye aboola ari, “Kata kario, munyanga etsio shindilimumululila elala mwesi ta.

¹⁹Ne olwa abandu balakhureeba bari, ‘Eshichila OMWAMI Nyasaye, Nyasaye wefwe nakhukholela kano koosi nishiina?’ Nawe obaboolele ori, ‘Shinga mwandoba mana nimwinamila abanyasaye bandi, mushialo shienywe abeene, nolwa bulano mulakhalabanila abandu abacheni mushialo shilali eshienywe ta.’ ”

²⁰OMWAMI Nyasaye aboola ari, “Boolela abolwibulo lwa Yakobo, rumbulila abolwibulo lwa Yuda;

²¹ulile kano, inywe abandu abayingwa khandi ababula obuchesi, inywe abali netsimoni nebutswa shimulolanga ta, abali namarwi nebutswa shimuhulilanga ta.

²²Shimunyala okhuuriakhwo ta? Shimunyala okhutechelakhwo imbeli wanje ta? Ndaraho omuyeshe okhuba olukuku lweinyanza, olukuku olulibaho inziayo lweinyanza yilanyala okhubirakhwo ta. Amarunda kekhupakhwo nebutswa shikanyala okhulukhalasia ta, kanyala okhuhoola, nebutswa shikanyala okhubirakhwo tawe.

²³Nebutswa abandu bano bali nemioyo emiumilanu khandi chiobukhayi, baarulilekhwo nibandekha.

²⁴Kata shibapaarangakhwo abeene mumioyo chiabwe bari, ‘Chende khurie OMWAMI Nyasaye, Nyasaye wefwe, oukhukwisilinjia ifula mutsinyanga tsieshilumbi nende tsieirotso, oukhuhelesinjia ebise bielichesa,’ tawe.

²⁵Obumayaanu bwenywe bushiukhasiiye niburusiaho tsikhabi etsio, nabwo obwonooni bwenywe bumwikaliile okhunyoola amalayi ako.

²⁶Okhuba abamayaanu bali mubandu banje, abakoneshelanga shinga abenya okhutiila linyonyi, nebutswa bakoneshelanga okhutiila abandu.

²⁷Tsinzu tsiabwe tsitsuulemwo obubatsa, shinga eshimwelo eshitsulemwo amanyonyi kahambilwe. Niko akachila nibali abandu boluyali khandi abayinda.

²⁸Bakhomela nibanera emibili chiabwe. Shibalikhwo neshiakamo mukhukhola amabi tawe. Shibakhalakanga ebiina habwene ta, shibakhoonyanga ababisandu okhutsiililila ta, kata shibatereranga habwene abatakha mushiina tawe.

²⁹Kho isie OMWAMI Nyasaye ndakhachweya okhubahelesia eshinyasio khumakhuwa ako? Mana ndakhachweya okhwimalila eshikwoli khwihanga shinga lino?

³⁰Likhuwa liamakana khandi elieshisinyo likholeeshe mushialo mbu,

³¹abalakusi balakulanga akobubeeyi, abesaaliisi nabo barukanga abandu nobunyali bwabwe abeene, nabo abandu banje bachama bario.

³²Nebutswa mulakhola shiina khushihesi?”