Read wanga YEREMIA 50 Bible Online

YEREMIA 50 - wanga bible

YEREMIA 50

¹Kano niko aka OMWAMI Nyasaye yaboola khu Babuloni, eshialo shia Abakalidayo, okhuburira mumunwa kwomulakusi Yeremia:

²“Tangasia mumahanga nolanjisia, handika oburume buno obuhaandie habulafu, shiolaholeela ta lanjisia noboola ori: ‘Litookho lia Babuloni libukuulwe, omunyasaye walio Beli afimbilwe omurwe, Merodaki aliilwe ling'ang'a. Abanyasaye ba Babuloni bahambiibwe tsisoni, ebifwanani biabwe bitubuluulwe. Bifimbilwe omurwe, nibitong'a nibing'ang'aalile.’ ”

³Okhuba lihanga lirulile Emasaba okhuseera Babuloni, lilakwisia eshibala eshio likunda; abulaho oulamenyamwo ta. Abandu balashiilukha, halala nemiruko chiosi.

⁴OMWAMI Nyasaye aboola ari, “Mutsinyanga etsio, khandi khubise ebio, Abaisiraeli bakhacherere, halala nende abandu ba Yuda. Bakhetse nibekhuulanga, nibamukhaabanga OMWAMI Nyasaye wabwe.

⁵Bakhareebe injila yokhwitsa Zayuni nibachoomiyeyo obweni. Bakhamukalushile OMWAMI nibakhola ninaye indakano yeinziayo eyiletsa okhwibililwa tawe.

⁶“Abandu banje bafwana shinga amakondi akakora, abaayi babwe babakosia injila nibababotokhasia mubikulu, okhurula khulukulu luno okhutsia khushikulu shilia, okhuula nibebilila amataala kabwe.

⁷Boosi ababaakananga babeeranga, abasuku babwe nabo bababoolela bari, ‘Ifwe shikhuli neshikha ta, okhuba bo bamwonoonela OMWAMI Nyasaye, obwayilo bwatoto, OMWAMI ouli obunaayi bwabakuuka babwe.’

⁸“Yilushe okhurula Babuloni, rule mushialo shia Abakalidayo, mube shinga tsikhole etsimiliile ebiayo.

⁹Okhuba ndalayakula omukhung'aano kwamahanga amakhongo okhurula mushialo shiemasaba, okhwiyanza imbeliwe nikumuseera. Ne okhurulaho, Babuloni lilabukulwa. Ebisele biabwe bifwana shinga ebiomukhupani omusitsa, oulakalukhanga amakhono amakhaya tawe.

¹⁰Eshialo shia Kalidayo shilayaaywa, ne abo bosi abashiyaaya balekura,” nolwa OMWAMI aboola.

¹¹“Kata nikaba mbu musangaala, kata nikaba mbu mwikhoya, Iwe inywe abayaaya obulaame bwanje, kata olwa musola shinga imoosi mubwayilo, nimukhumula shinga tsifarasi tsisaatsa,

¹²nyinenywe alafimbilwa omurwe elala, owamwibula alahambibwa tsisoni. Lole, alaba inyuma wa boosi mumahanga, alaba eshitsiimi, eshibala eshihangalamwe, eshikhaya.

¹³Khulwa okhubeela oburuma obwa OMWAMI, shialamenywamwo ta, alakwa likunda lieshihungu shiliile; buli oubura khu Babuloni alahuchisibwa, alareesia omurwe nachenyelanga amafumire kalio.

¹⁴Mwirecheshe nimubotokhana Babuloni, inywe mwesi abakhweesanga obuyingo; mulase, nimulatembelesia ebisele ta, okhuba amwonooneele OMWAMI.

¹⁵Chinje olukhu okhumufukula tsimbeka tsiosi nimulanjisia muri: ‘Amalile okhwiyama; tsingobatsie tsikwile, nako amasisike kalikuluulwe.’ Okhuba shino nishio eshikwoli eshia OMWAMI khuye: mumalilekhwo eshikwoli, mukholele shinga olwa akholelanga abandi.

¹⁶Khalache omuraachi arule Babuloni, kata oweinjeso yesi tsinyanga tsielichesa. Bosi balelukha okhukalukha mushialo shiabwe, bosi balelukha okhukalushila abandu babwe shichila olukanga olumululanga.

¹⁷“Isiraeli ali shinga likondi eliyiimwa nilitafibwa netsitalanyi. Olweimbeli omuruchi wa Ashuru yamurindula, ne olunyuma lwene Nebukadineza Omuruchi wa Babuloni ameneene ebikumbabie.”

¹⁸Khulweshio kano niko aka OMWAMI Nyasaye omwene mahe, OMWAMI Nyasaye wa Isiraeli aboola ari, “Ndalahelesia omuruchi wa Babuloni halala nende eshialoshie eshinyaasio, shinga olwa ndahelesia omuruchi wa Ashuru.

¹⁹Ndalakalusia Isiraeli mubwayilobwe, naye alaaya Karimeli nende Bashani; inzalaye yilekusibwa khutsingulu tsia Efuraimu nende mu Giliadi.”

²⁰OMWAMI Nyasaye aboola ari, “Mutsinyanga omwo khandi khubise ebio, obumayanu bwa Isiraeli bulakhaabwa ne bulabulaho; obwonooni bwa Yuda shibulanyoolekha ta; okhuba ndalaleshela abo aba ndalekha mwoyo okhuba omusikalo.”

²¹“Tikulushe mutsie mushialo shia Meratsaimu; tikulushe mushiseere, tikulushe museere abamenyanga Tekodi mubamululile elala,” nolwa OMWAMI aboola. “Khole koosi aka emulachilisia.

²²Obuyoka bwelihe nobumululwi obukhongo, buhulilikha mushialo!

²³Mako, ikhomako yeshialo shiosi yiremaakwe niyitubulwa! Mako, lihanga lia Babuloni likwiile eliokhuhukanwa mumahanga!

²⁴Ndakhurechela eshikoye mana nohambwa, iwe Babuloni. Shiwali nomanyile ta; nebutswa wanyoolekha mana nohambwa, shichila wayingana nende OMWAMI Nyasaye.

²⁵OMWAMI yekuule libishilo liebimanulwabie, narusiamwo ebimanulwa bioburumabwe, okhuba OMWAMI Nyasaye omwene mahe ali nomulimo kwokhukhola mushialo shia Abakalidayo.

²⁶Mwitsile nimumuseera okhurula tsimbeka tsiosi, yikule ebiachibie; mumubunjishe ebituuli shinga imele, nimumumalilanila elala; shilatong'akhwo kata eshitonye tawe.

²⁷Yire tsisurusitsie tsiosi, tsikholomoshe mushisinzilo. Wowe khutsio, induukho yitsiuuliile, eshise shiatsio okhunyoola eshinyaasio!

²⁸“Recheresie! Yabo abeelukha okhwihonokokha okhurula Babulonia betsa okhurumbula mu Zayuni akeshikwoli eshia OMWAMI Nyasaye wefwe, eshikwoli khulwa ihekaluye.

²⁹“Lanje abalasani, balia bosi abafumbanga obuyingo, betse baseere Babuloni. Mufumbile mumubotokhane; abuleho kata mulala ouhonokokha. Murunje okhulondokhana nende ebikholebie; shinga olwa yakholela abashie, yesi akholelwe ario, okhuba yechinjimisia nafukula OMWAMI Nyasaye, Omutakatifu wa Isiraeli.

³⁰Khulweshio abaraakabe balakwa khumihandachie, abelihe nabo nibamalilanwa bosi khunyanga eyo,” nolwa OMWAMI aboola.

³¹OMWAMI Nyasaye omwene mahe aboola ari, “Ekhufukula iwe omwichinjimisi, okhuba inyangayo yulile, ebise ebia nditsa okhukhuhelesiliakhwo eshinyaasio.

³²Omwichinjimisi alatandaamila nakwa, alabula oumubuusia; nasi ndalahaafia omulilo mumatookhoke, okulamulula buli shindu eshimubotokhaane.”

³³Kano niko aka OMWAMI Nyasaye omwene mahe aboola: “Abandu ba Isiraeli halala nende abandu ba Yuda basandibungwa. Balia ababahamba babatinyakhwo, baloba okhubalekhuula.

³⁴Nebutswa Omununuli wabwe, oweliralie lili OMWAMI Nyasaye omwene mahe, nowamaani. Toto alafunaana eshiina shiabwe, mbu ahelesie eshibala obuhuluushi, nabwo obukoyaanu khu balia abamenyanga Babuloni.”

³⁵OMWAMI Nyasaye aboola ari, “Olukanga luseere Abakalidayo, khandi luseere balia abamenyanga Babuloni, lube khubakhulundube, nende khubachesibe bosi!

³⁶Olukanga lube khubafumu, mbu bakwe abasilu! Olukanga lube khubalulu babwe, mbu baliibwe ling'ang'a!

³⁷Olukanga lube khufarasi tsiabwe nokhumakaari kabwe, nende khubopani abacheni abali hakari wabwe, mbu bakwe shinga abakhasi! Olukanga lube khumabiikhoke, mbu kanyoole okhuyaaywa!

³⁸Eshimiyu shikwe khumaatsike, mbu kakhame! Okhuba shio neshibala eshinamilanga ebifwanani ebibaatse, bibakholanga shinga abamalalu.

³⁹“Khulweshio tsisolo nabulimo, amabwe, halala nende amahuto kalamenya mu Babuloni; abandu shibalabakhwomwo, kata okhumenyamwo inziayo ta.

⁴⁰Shinga olwa Nyasaye yakwisia amatookho ka Sodomu nende Gomora, halala namataala akakabotokhana, abulaho oulamenya mu Babuloni, kata okhwiyumbakhamwo ta,” nolwa OMWAMI Nyasaye aboola.

⁴¹“Lole, abandu bakholomokhanga okhurula emasaba; lihanga liamaani nende abaruchi abanji okhurula mubialo biehale berechekhanga.

⁴²Bachinjile obuyingo nende amafumo, nabelifuunyi, khandi babula tsimbabasi. Emiyindiri chiabwe chingana okhuhoola khweinyanza; bachendela khufarasi, etsiiyanzile shinga abelihe, okhukhuseera iwe, omukhaana wa Babuloni!

⁴³Olwa omuruchi wa Babuloni ahuliilekhwo akeifuma yabwe, amakhonoke katubuushe; asaaliile, shinga omukhasi wulumwa inzibula.

⁴⁴“Mubwangu ndalabelusia bamurulekhwo, shinga italanyi eyitikulukha okhurula mumutsuru kwa Yorodani okhuseera amakondi. Mana ndaleemekha wulia owa ndalalobola okhumusinjilila. Okhuba ali heena ounyala okhwichelaasia ninasi? Ni wina ounyala okhufunaana ninasi omuse? Nomwayi shiina owakhanzikalila elia enjomile okhukhola?”

⁴⁵Khulweshio hulile aka OMWAMI Nyasaye achoomile okhukholela Babuloni, tsiyemi tsiali ninatsio okhuyinga eshibala shia Abakalidayo: tooto ebimeeme biamakondi bilakhweswa okhurulaho, tooto obwayilo bwabio bulang'ang'aasibwa namasila akalabikwiila.

⁴⁶Eshialo shilatechela khulwa obuyoka bwokhuhambwa khwa Babuloni, tsimbungutsie tsilahulilikha mumahanga.