Read wanga YEREMIA 51 Bible Online

YEREMIA 51 - wanga bible

YEREMIA 51

¹Kano niko aka OMWAMI Nyasaye aboola: Ndalayakula omuyeka kwokhumulula kuseere Babuloni nende balia boosi abamenya Kalidayo.

²Ndalaruma abaseesi Babuloni, nabo balamuseesa. Balalekha eshialoshie nishili eshikhaya olwa balamuseera okhurula tsimbeka tsiosi khunyanga eyo eyamasila.

³Omulasi wobuyingo shialanyiila obuyingobwe, kata okhwifwala eshitsengwashie ta. Murahonokosia abaraakabe babe mwoyo tawe; mutibilie elala amaheke koosi.

⁴Balafwa nibalambila mushialo eshia Abakalidayo, abafumiirwe nibakwa khumihandachie.

⁵OMWAMI Nyasaye omwene mahe ashili okhwibala Isiraeli nende Yuda kata olwa bali neshikha imbeliwe, ye Omutakatifu wa Isiraeli, tawe.

⁶Yilushe murule hakari wa Babuloni, mwihonokosie buli mundu obulamubwe! Mulamilishila mukhukuumwakhwe ta, okhuba bino nibio ebise bia OMWAMI okhumala eshikwoli; Babuloni anyoolanga omurungo okumukhoyeele.

⁷Ye yabeelenje eshikombe shieitsahaabu mumukhono kwa OMWAMI, eshia eshialo shiosi shianyweelenje mana shimeela; amahanga kanyweelekhwo khudivai yayo, mana nikatiilwa namalalu.

⁸Yikhuule Babuloni okhuba akwiile metsukhana mana narabukhamwo ebitonye! Reere amalesi mubashe amakonzoke; haundi alasoosa.

⁹Khwateemile okhusilikha Babuloni, nebutswa shiyanyalile okhusoosa tawe. Kho muleshe yaho, buli mulala akalushe mushialoshie omwene; okhuba eshiinashie shiulile khwikulu khandi shichinguulilwe okhuula khumaleesi.

¹⁰OMWAMI alolosiiye obulunjishi bwefwe; chende khurumbule mu Zayuni akebikhole bia OMWAMI Nyasaye wefwe.

¹¹Yiakale ebisele! Bukule ebikhumba bienywe! OMWAMI Nyasaye ayakuule abaruchi ba Abamedi, okhuba tsiyemitsie khu Babuloni nokhulimulula. Shino nishio eshikwoli eshia OMWAMI Nyasaye, eshikwoli khulwa ihekaluye.

¹²Khupe olwika lwelihe okhuseera Babuloni; meete abokhulinda bandi, mubakhole babe namaani amanji; reho abokhuhenjelesia mubwikhalo bwabwe, nimurechekha abakonesheli; okhuba OMWAMI Nyasaye aloosiye mana nakhola, kalia aka yasioma okhukholela Babuloni.

¹³Inywe abamenyanga hamichela emikhongo, abali nobuyinda obunji, induukho yenywe yimalile okhuula, olutsaha olutiilile obulamu bwenywe lukhaliishe.

¹⁴OMWAMI Nyasaye omwene mahe yetsubile naboola ari: Tooto mwene ndalakhuseera nende olumaama lwabelihe shinga tsisiche, nabo balakhupa tsingalakala tsiobuhuli khwiwe.

¹⁵OMWAMI Nyasaye niye owalonga eshibala mubunyalibwe, naralisia eshialo nobuchesibwe, mana nabambula likulu mukhumanyilisiakhwe.

¹⁶Emiyembo chiamaatsi khwikulu chihoolanga olwa achilachilisia, naye akhung'aasinjia ifula okhurula khundulo tsiosi tsieshibala. Ahenusinjia oluhenu mufula, nabuusia omuyeka okhurula mumabiikhoke.

¹⁷Abandu boosi bakwile abasilu ababula obumanyi; aberaanyi bebifwanani nabo bafwimbwa omurwe nebifwanani biabwe; okhuba ebifwanani ebio nebiabutswa, bibulamwo kata omuuya kwonyene.

¹⁸Bikhoyile okhuchaaywa okhuba bibula inganga yosiyosi tawe; bilasikha biosi pe khunyanga yokhukuumwa khwabio.

¹⁹Nebutswa OMWAMI Nyasaye, Nyasaye wa Yakobo shiali shinganabio tawe, okhuba ye niye owalonga buli shindu, mana nalobola lihanga lia Isiraeli okhuba elia obulaamebwe. Ye niye OMWAMI Nyasaye omwene mahe.

²⁰OMWAMI Nyasaye aboola ari: Babuloni, iwe niwe inyoli yanje, eshimanulwa shianje eshia lihe: niwe owa ndikhoonyelanga okhutubulula amahanga; niwe owa ndikhoonyelanga okhukwisia abaruchi.

²¹Ekhwikhoonyelanga okhusasaka ifarasi halala nende ouyichendelangakhwo; likaari halala nende ouliirushilangamwo.

²²Ekhwikhoonyela okhusasaka abandu, omusaatsa kata omukhasi; omukofu kata omwana; okhusasaka omusoliili kata omukhaana omubuukha.

²³Ekhwikhoonyela okhusasaka abaayi halala nende amatuuli kabwe; abalimi halala nende tsichurushi tsiabwe tsiokhulima. Ekhwikhoonyela okhusasaka abakafuna halala nende abalondi babwe.

²⁴Nebutswa OMWAMI Nyasaye aboola ari: Ndalakalusilia Babuloni nende boosi abamenyanga mushialo eshia Abakalidayo nolola amabi kalia koosi aka bakholela Zayuni.

²⁵“Lola ekhufukula, iwe eshikulu eshionooninjia,” nolwa OMWAMI Nyasaye aboola, “Eshionooninjia eshibala shiosi. Ndalanyiila omukhono kwanje okhukhulwana, nikhusindikha hasi okhurula khunjengulukho, ndalakhulekha nofululusiibwe nomulilo.

²⁶Shililabakhwoho khwiwe khandi lichina eliakhasinjisibwa shinga isiilo yomukoona noho elinyala okhumbashilwa khandi tawe. Iwe olalikululwa nokwisibwa likunda inziayo,” nolwa OMWAMI aboola.

²⁷“Khupe olwika lwokhuseera, khupe olwika hakari mumahanga, kerecheshe okhuseera Babuloni. Khung'aasie abaami baseere Babuloni, obwami bwa Ararati, Mini nende Ashikenazi. Lobole omuseesia welihe abemilile, tsifarasi tsiabwe tsimaamile Babuloni shinga tsisiche.

²⁸Recheshe amahanga okhumuseera, abaruchi ba Abamedi nibakhonyelelwa nabakafuna nende abasinjilili babwe, halala nende ebialo biosi ebia Abamedi barukanga.

²⁹Eshialo shiosi shitechela nishirenga, khulwa okhubela tsiyemi tsia OMWAMI Nyasaye khu Babuloni netsimbi, okhulimulula likwe likunda, elia omundu alamenyilemwo ta.

³⁰Abelihe ba Babuloni baleshile okhulasana, bekhaale mungoba tsiabwe; amaani kabwe kahwele, belekhulile shinga abakhasi; tsinzu tsiabwe tsisambwa nomulilo, ebilibwa biabwe nibifunakwa.

³¹Abarumwa benjila okhurula tsimbeka tsiosi okhumanyia omuruchi wa Babuloni mbu litookholie libukuulwe tsimbeka tsiosi.

³²Omusuku abukuule tsinyambukho tsiosi, nasamba tsingoba tsiabwe nomulilo, ne abalasani ba Babuloni batiililwe neindenga.

³³Okhuba kano niko aka OMWAMI Nyasaye omwene mahe, Nyasaye wa Isiraeli aboola: Omukhaana wa Babuloni yengana shinga olwanyi olwa bahuula imele; shishiilikhwo eshise shituutu butswa ne induukhoye yuula.”

³⁴Nolwa abandu abamenya Zayuni bakhaboole bari: “Omuruchi wa Babuloni mbu Nebukadineza wayamila, wayandubulula, niyakhola shinga inyungu eyibulamwo eshindu. Wayamila bukala shinga lwokuyokha kumilanga; niyetsusia indaye nende ebilibwa biefwe ebinulu, nebutswa niyafuutsa ebulafu.

³⁵Shiakhuha eshikwoli shiamalwa khu Babuloni khulwa obusaalisi obwa yaasaalisia. Shiakhuha eshitsayi shianje shiabanzwa balia abamenya Kalidayo,” nolwa Yerusalemu yakhaboole.

³⁶Khulweshio kano niko aka OMWAMI Nyasaye aboola: “Ndalakhuterera mushiina nekhumalila eshikwoli. Ndalakhamia inyanza ya Babuloni, nende okhumia tsisebeletsie.

³⁷Babuloni lilakwa likunda, lilaba eshimenyo shiamabwe, habundu ahariisia okhubiraho, eshibala eshibula oumenyamwo.

³⁸Abababuloni balahoolela halala shinga tsitalanyi; balakhaasa shinga abaana betsitalanyi.

³⁹Olwa balaba nibashihalaashe, ndalabahelesia eshiokhunywa shiabwe; ndalabameesia okhuula basangaaale, mana bakone tsindoolo etsinziayo etsia balanyala okhusumulukukhamwo ta, nolwa OMWAMI Nyasaye aboola.

⁴⁰Ndalabakholomosia shinga ebimeeme biamakondi ebiyilwa okhusinzwa, shinga amamiiku netsikhole.

⁴¹Mawe, litookho lia Babuloni libukuulwe, litookho lieshibala shiosi shiyitsialilanga lihambilwe! Lole shinga olwa likwile eliokhuhukanwa hakari wamahanga kandi!

⁴²Inyanza yibuushile okhuseera Babuloni; amarunda kayo kalifuuniiishe.

⁴³Amataala kalio kakwile akokhuriisia, liikholile eshihangalamwe, eshibala shieshimiyu, eshiomundu yesi alamenyangamwo, kata okhukhalasiamwo ta.

⁴⁴Ndalahelesia omunyasaye Beli owa Babuloni eshinyaasio, ndalamukhola okhusala ebindu bilia ebia amilile. Amahanga shikalaruuba nikamuyilila ebihaanwa khandi tawe; toto olukoba lwa Babuloni lukwiile.

⁴⁵Rule hakariwe inywe abandu banje! Buli mulala khwinywe yehonokosie, noburuma obululu obwa OMWAMI Nyasaye!

⁴⁶Shimuafwa omwoyo kata okhuria khulwa amakhuwa kabutswa aka muhulila tawe. Leelo luno mulahulila lino, olwitsa namuhulile elindi. Mulahulila akeindiri mushialo, kata kabaruchi okhuseerana lihe.

⁴⁷Toto mwene eshise shitsanga olwa ndalakuuma ebifwanani biabanyasaye bia Babuloni; eshibala shiabwe shiosi shilafwimbwa omurwe, abafuube nabo nibandakalala hakariwe.

⁴⁸Nolwa likulu nende eshibala, halala nende biosi ebilimwo bilekhoyela akakwiliile Babuloni; okhuba abonooninjia balakholomokha okhurula emasaba okhuliseera,” nilwo olwa OMWAMI Nyasaye aboola.

⁴⁹Okhuula litookho lia Babuloni likwisibwe khulwa abandu ba Isiraeli ba liera, shinga butswa olwa lieranga abandu mubialo biahukhaane.

⁵⁰Inywe abehokokha olukanga, “Rule mutsie obulachelewa tawe! Musuubile mu OMWAMI Nyasaye kata olwa muba nimuli mushialo eshicheni, nimwitsulila Yerusalemu.

⁵¹Mwafwimbiibwe omurwe nimunyekwa, ‘Mwachaayilwe po olwa abarende beenjiile habundu hatakatifu muhekalu eya OMWAMI Nyasaye.’

⁵²Khulweshio OMWAMI Nyasaye aboola ari, Eshise shitsanga olwa ndalakuuma ebifwanani biabanyasaye bia Babuloni. Mushibalashie shiosi abafumiirwe balahonga nibabindanga.

⁵³Kata Babuloni niliakhaniina okhuula khwikulu, niliyumbashilayo tsingoba tsiamaani, ndalalirumila abokhulionoonia,” nolwa OMWAMI Nyasaye aboola.

⁵⁴“Hulile tsimbuungu okhurula Babuloni! Obuyoka bwobumululwi obukhongo okhurula mushialo shia Abakalidayo!

⁵⁵Okhuba OMWAMI Nyasaye amulula Babuloni nalikwisia likunda, aliholelesilia elala. Wulia oulionoonia yetsa nahoola shinga amaatsi amanji, emiyindirichie chihulilikha.

⁵⁶Okhuba owonooninjia yetsile, yetsile okhuseera litookho lia Babuloni. Abalasani balio bahambilwe, obuyingo bwabwe nibufunakwa; shichila OMWAMI Nyasaye ni Nyasaye wokhumala eshikwoli, alabahelesia omurungo okwitsuule.

⁵⁷Ndalameesia abakhulundu halala nabachesibe idivai. Abakafunabe, abasinjilili halala nende abalulube belihe, balakona tsindoolo tsiinziayo obulasumulukukha ta,” nolwa Omuruchi, oweliralie lili OMWAMI Nyasaye omwene mahe aboola.

⁵⁸OMWAMI Nyasaye omwene mahe aboola ari: “Olukoba olubambalifu lwa Babuloni lulalikululilwa elala, nabio ebiliibwabie ebirambi bilasambwa nomulilo. Abandu yabo benyakhasinjia butswa, amahanga nako kechoonyinjia eshikhaya khushindu eshilasambwa nomulilo.”

⁵⁹Likhuwa lino nilio elia omulakusi Yeremia yalachilisia Seraya wa Neria omwana wa Maseya, olwa yatsia nende Zedekia omuruchi wa Yuda Babuloni, mumuyika okwa khane kwa oburuchibwe. Seraya niye owakaasinjia aha omuruchi ahuluushila.

⁶⁰Seraya nashili okhurula nomuruchi, Yeremia yamuhandichila mushitabu amabi koosi akakhakwiliile Babuloni, kalia amakhuwa akali nikahandiikwa khu Babuloni.

⁶¹Yamuboolela ari: “Niwulile Babuloni, olachweya okhusooma amakhuwa kano koosi ta.

⁶²Mana oboole ori, ‘Iwe OMWAMI Nyasaye, iwe omwene wasioma okhusasia eshibala shino noshikhola likunda inziayo, mbu omundu yesi kata isolo nabulimo yikhaywe okhumenyamwo.’

⁶³Nomalile okhukasooma, oshibohekhwo lichina mana oshisukune mumwalo kwa Yufurate,

⁶⁴noboola ori, ‘Shinga olwa eshitabu shino shiyinikha mumaatsi, nolwa litookho lia Babuloni lileyinikha obulabuukha khandi ta, khulwa eshibii eshia ndalalikhupiakhwo.’ ” Amakhuwa ka Yeremia kola hano.