Read wanga YEREMIA 52 Bible Online

YEREMIA 52 - wanga bible

YEREMIA 52

¹Zedekia yali nemiyika amakhumi kabili nende mulala olwa yachaaka okhuruka, yaruka nali Yerusalemu emiyika ekhumi nende mulala. Nyinamwana yalaangwa Hamutali, omukhaana wa Yeremia okhurula Libina.

²Ne yakhola akeshisinyo mumoni tsia OMWAMI Nyasaye, shinga butswa olwa Yehoyakimu yali niyakhola.

³Ebikhole bia Yerusalemu nende Yuda biamusinya OMWAMI Nyasaye muno, okhuula nabalekha bayinibwe imbeliwe nibayilwa mubuhambe. Zedekia yakholela omuruchi wa Babuloni induli.

⁴Mana mumuyika kwa shienda khumwesi kwekhumi khunyanga yekhumi Nebukadineza nali omuruchi wa Babuloni, yetsa nende abelihebe bosi nibaseera litookho lia Yerusalemu. Yalikoneshela niyombakha emiyinjiilo okhulibotokhana.

⁵Kho litookho elio liafumbilwa lirio okhuula khumuyika kwekhumi nalulala kwoburuchi bwa Zedekia.

⁶Khunyanga yashienda eyomuyika kwakhane, yaliho inzala ikhongo mwitookho; kata shishialiho eshiokhulia khubandu tawe.

⁷Kho eshibanga shiarabulwa mwisisi eliabotokhana litookho, mana abelihe bosi nibehonokokha. Kata olwa Abakalidayo bali nibafuumbiile litookho elio, abelihe abo beelukha mushilo nibalonda injila yali hakari wamasisi kabili khundulo womukunda kwomuruchi. Bachooma elubeka lwa Araba.

⁸Nebutswa abelihe lia Abakalidayo babalondachila, nibakhalilisilia omuruchi Zedekia mubikuuri bia Yeriko; abelihebe bosi basalaana nibamwilukha.

⁹Bamuhamba nibamureera ewa omuruchi wa Babuloni yali Ribila, mushialo shia Hamatsi, naye namukhalachila eshiina.

¹⁰Omuruchi wa Babuloni yeera abaana ba Zedekia abasiani, Zedekia mwene nalolanga. Khandi yametakhwo niyeera abakhulundu ba Yuda Ribila.

¹¹Yakhuula tsimoni tsia Zedekia okhurula mubikochi biatsio, mana namuboha nebitiili. Yamuyila Babuloni, namura mumbohe okhuula olwa Zedekia yafwa.

¹²Khunyanga yekhumi yomwesi kwa kharano okwali omuyika kwekhumi nashienda Nebukadineza nali omuruchi wa Babuloni, Nebuzaradani, omusinjilili wabalindi bomuruchi wa Babuloni, yenjila Yerusalemu.

¹³Yasamba inzu eya OMWAMI Nyasaye, inzu yomuruchi halala nende tsinzu tsiosi etsiali Yerusalemu; yasamba buli inzu indayi nomulilo.

¹⁴Abelihe lia Abakalidayo, abali nibetsile halala ninaye balikulula amasiisi akali nikabotokhana Yerusalemu koosi.

¹⁵Nebuzaradani omusinjilili wabalindi bomuruchi wa Babuloni yayila mubuhambe balala khubatakha abayanyoola Yerusalemu. Yameetakhwo abali nibasikala mwitookho, nende balia abahunzukha nibeelushila womuruchi wa Babuloni, halala nende abachesi bemilimo chiahukhaane, abali nibatong'ayo.

¹⁶Nebutswa yalekhakhwo abatakha bandi inyuma khulwa okhwachilanga emitsabibu nokhulima emikunda.

¹⁷Abakalidayo bafunaka tsisiilo tsiomukasa halala nende obwalo bweinyanza yomukasa, ebiali munzu eya OMWAMI Nyasaye, mana nibachinga omukasa kwa biali nibiakasilibwa nibayila Babuloni.

¹⁸Khandi bachinga tsinyungu, emiikho, amahana kokhusimilia omulilo, ebikaye, ebichiiko, nebikaye tsiomukasa etsia beekhoonyelanga mubukhalabani bwa mu Hekalu, nibatsia ninabio.

¹⁹Khandi omusinjilili wabalindi oyo yachinga ebirobotobo tsinduutu, ebirobotobo tsiomulilo, ebikaye, netsinyungu, ebichibi bietsitaha, emiikho nende orubakuli; buli shindu eshiali shieitsahaabu, yashibukula khulwa itsahabu yashio; ne buli shindu eshiali shieifeetsa, yashibukula khulwa ifeetsa yashio.

²⁰Nebutswa obusiro bwomukasa kwa Solomoni yekhoonyela okhukaasia tsisiilo tsia Ihekalu, inyanza yomukasa, tsisurusi ekhumi natsibili tsieinyanza tsana yali niyekhalakhwo, halala nende obwala bwayo, shibwakhachelilwe ta.

²¹Tsisiilo etsio tsiafwanana; oburambi obwa buli ndala bwali tsimita munane, nabwo obukhomefu bwali tsimita tsiraano nende eshitonye shituutu. Tsialimwo omuluhu mukari, obukhomefu bwelibati eliekhonyelwa okhutsikaasia bwahela tsinzala tsine.

²²Ne yalikhwo ikofia yomukasa; oburambi bweikofia tsana bwali tsimita tsibili nende eshitonye moro; ikofia eyo yali niyang'oonwa netsikhanda namakomamanga biomukasa tsimbeka tsiosi. Nayo isiilo yakhabili yosi yafwana yirio, namakomamanga.

²³Kaliho amakomamanga amakhumi shienda tsimbeka tsiosi; amakomamanga akabotokhana tsikhanda tsiosi halala kali eshikhumi shilala.

²⁴Khandi omusinjilili wabalindi oyo yatiila Omwisaaliisi Omukhulundu Seraiya, omwisaaliisi omulondiwe Zefania, nende abalindi bomuliango bataru.

²⁵Okhurula mwitookho, yametakhwo omukali owasinjilila abelihe halala nende abasaatsa musaafu abomushiina shiomuruchi, abanyoolwa nibali mwitookho, mbu omuhandiichi womuseesia welihe owakhung'aasinjia abandu beshibala eshio; nende abandi amakhumi kasasaba abokhubandu beshialo eshio abanyoolwa nibali mwitookho.

²⁶Mana Nebuzaradani omusinjilili wabalindi nababukula nabayila ewa omuruchi wa Babuloni Ribila.

²⁷Naye omuruchi wa Babuloni nabeerera Ribila, mushialo shia Hamatsi. Nolwa Yuda yayilwa mubuhambe okhurula mushialo shiabwe.

²⁸Buno nibwo obunji bwabandu ba Nebukadineza yayila mubuhambe: khumuyika kwa musaafu, abandu ebikhumila bitaru namakhumi kabili nabataru okhurula Yuda;

²⁹khumuyika kwekhumi namunane kwoburuchibwe, abandu ebikhumi munane nende amakhumi kataru nababili.

³⁰Ne khumuyika kwamakhumi kabili nende khataru Nebukadineza nali omuruchi, Nebuzaradani omusinjilili wabalindi yayila abandu ebikhumi musaafu amakhumi kane nabarano mubuhambe okhurula Yuda. Abandu bano halala bali ebikhumila bine nende ebikhumi bisasaba.

³¹Khumuyika kwa Ewili-merodaki yachaaka okhuruka Babuloni, yakholela Yehoyiakini aketsimbabasi, namulekhuula okhurula mumbohe. Kano kekholekha khunyanga yamakhumi kabili nakharano eyomwesi kwekhumi nakhabili, khumwaka kwamakhumi kataru nende musaafu olunyuma lwa Yehoyiakini okhuyilwa mumbohe.

³²Evilimeloradaki yamukholela amalayi, namuhelesia eshifumbi ikulu wabaruchi bandi abali halala ninaye Babuloni.

³³Kho Yehoyiakini yakaluukhasia tsingubotsie tsiobubohe, mana buli lwosi yaliilanga eshiokhulia halala nomuruchi.

³⁴Omuruchi wa Babuloni yamukabanga omukabo kwa buli lwosi okwa yekhoonyelanga okhuula khunyanga yokhufwakhwe.