Read wanga YEREMIA 6 Bible Online

YEREMIA 6 - wanga bible

YEREMIA 6

¹Inywe abandu ba Benjamini rule mu Yerusalemu, mwilushe nimwihonokosia, khupe olwika mwitookho lia Tekoa, khole eshilolelo mu Betsihakeremu, okhuba amasila nende obusasishi obukhongo, birulanga elubeka lwemasaba nibitsa.

²Litookho lia Zayuni nelilayi khandi eliobukondo obulayi, nebutswa lilasasibwa.

³Abaayi nibali nemiruko chiabwe baletsa okhuliseera, balasinjisia amaheema kabwe nikabotokhana litookho elo, ne buli mulala alaaya ebiayobie habundu aha yenya.

⁴Balaboola bari, “Mwirecheshe okhuseera Zayuni. Khulachaaka okhuliseera mushiteere!” Nebutswa balaboola bari, “Ikhabi imbi eliuba liyelanga! Ebiinikha biokhungoolobe birambiyanga.

⁵Kho khulaliseera mushilo, khulasasia tsingoba tsialitookho elo.”

⁶OMWAMI Nyasaye omwene mahe aboola ari, “Reme emisaala chialio, mana musiire obutinyu nimwikalila litookho lia Yerusalemu. Litookho lino okhuula lihebwe eshinyasio, okhuba lietsulamwo amakhuwa kokhusandia abandu.

⁷Shinga liyabo libiikhanga amaatsi nikatong'a ameleleshe, nolwa Yerusalemu nalio litong'a nobumayanu bwalio lirio. Amaraba nende obumululi bihulilikhanga mulio buli lwosi. Buli lwosi endolanga amalwale nende amafumire.

⁸Iwe Yerusalemu ochetsihale, nebutswa ndalakhurulakhwo nikhukwisia likunda ewa abandu balanyala okhumenya ta.”

⁹OMWAMI Nyasaye omwene mahe aboola ari, “Khung'asie abandu ba Isiraeli boosi abatong'a, shinga olwa abandu babunjelesinjia emitsabibu chiosi shinga omunochi wemitsabibu abunjelesinjia. Khandi bisie emikhono chienywe mumasaka kalio.”

¹⁰Niwiina ounyala okhuboola ninaye abachetsiyie kho bambulile? Lola, amarwi kabwe kekala, shibanyala okhuhulila ta. Likhuwalio khubo lili shinga omubayo butswa, shibalisangalilanga kata nahatuutu ta.

¹¹Oburumabwo khubo iwe OMWAMI Nyasaye buusambanga muno, ekhayilwe okhubwikalila mwisie. OMWAMI Nyasaye, niyamboolela ari, “Suundulila abaana abali khunjila liruma elo, nende ababuukha abekhung'asiye mumikanda. Abasaatsa nende abakhasi babwe balabukulwa nibayinibwaho, kata abakofula muno shibalalekhwakhwo ta.

¹²Tsinzu tsiabwe tsilahebwa abandu bandi, kata emikunda chiabwe nende abakhasi babwe, okhuba ndalanyiila omukhono kwanje, okhuhelesia abandu abamenya mushialo shino eshinyasio.” Isie OMWAMI Nyasaye nolwa emboola.

¹³“Okhuba okhuchaachila khumutuutu okhuula khumukofu, buli mundu ateemanga okhwinyoolela inganga munjila yobubeeyi, okhuchaachila khumulakusi okhuula khumwisaaliisi buli mundu nomubeeyi.

¹⁴Basilikhanga amafimire kabandu banje khwikulu butswa, shinga akalenjiile munyama mukari ta, nibaboola bari, ‘koosi kali obulayi olwa omulembe kuba nikubulaho.’

¹⁵Mana bafwimbwakhwo omurwe olwa bakhola amakhuwa akeshisinyo kano? Tawe, shibafwimbwakhwo omurwe ta, kata shibanyalakhwo okhufwimbwa omurwe tawe. Niko akachila balakwisibwa shinga olwa abandi bakwisibwa. Olwa nditsa okhubahelesia eshinyasio ndalabamululila elala. Isie OMWAMI Nyasaye nolwa emboolile.”

¹⁶OMWAMI Nyasaye aboola ari, “Sinjile mumasanganjila mulole. Runilisie mumanye amakhuwa kekholekha khale. Khabilisie habundu aha injila indayi yili, mulondelekhwo mana mulamenya mumulembe. Nebutswa nabo baboola bari, ‘Shikhulalondakhwo injila eyo ta.’

¹⁷Ndaahula abalindi bokhumulinda, nemboola endi, ‘Murecheresie olwa olwika lukhupwa.’ Nabo nibaboola bari, ‘Shikhularechelesiakhwo ta.’

¹⁸Khulweshio inywe amahanga, muhulile, nimumanyilisia, inywe abomukhung'ano kwosi mulole aketsa okhubakwila.

¹⁹Hulile inywe abeshialo shiosi endeereranga abandu bano amanyakhano, akali ebiamo biebikhole biabwe ebibi, okhuba shibahulilanga amakhuwa kanje, kata okhulonda amalako kanje tawe.

²⁰Khulwa shiina nimundeerera obubane okhurula mushialo shia Sheba? Khulwa shiina nimundeerera eshiuya shieshing'ari okhurula mushialo shiehale? Emisango chienywe emisambe shichifuchilulungwa ta, khandi emisango chindi shichinjamisinjia tawe.”

²¹Khulweshio isie OMWAMI Nyasaye emboola endi, “Lola, ndalara ebisichirasio khubandu bano ebitsa okhubesicharasia, nibibakwisia hasi. Abaana beshisiani nende basabwe balasikha, halala nende abekho babwe nende abetsa babwe.”

²²OMWAMI Nyasaye aboola ari, “Lole, abandu betsanga nibarula mushialo shiemasaba, lihanga likhongo lirechekhanga okhurula ehale.

²³Bemanule obuyingo nende amafumo nabalulu khandi babula tsimbabasi. Olukhu lwabwe luhoolanga shinga inyanza baninile nibachendela khutsifarasi nibeeyanzile shinga abatsia mwihe okhuseera iwe Zayuni.”

²⁴Abaisiraeli nabo baboola bari, “Khwahuliile akeifuma yabwe emikhono chiefu chitubushe khutiililwe nobutinyu nende obutsunwi, shinga omukhasi oulumwa inzibula.

²⁵Shikhunyala okhutsiakhwo mumukunda noho kata okhuchenda khunjila ta, okhuba abasuku bemanule ebimanulwa mumikhono oburi buli habundu.

²⁶Inywe abandu banje mwifwale ebifwalo biamakunia, mwikalakasie mwikoshe, mwikhuule obululu shinga omukhasi owikhuula omwanawe omuteelwa. Okhuba omumululi aletsa nabaseera masundusia.

²⁷Iwe Yeremia, ndakhureereho obe omurunilisi khandi omuchetsiyi wabandu banje, kho mbu orunilisie nomanyilisia tsinjila tsiabwe.

²⁸Boosi nabakhayi khandi abamakosi amoomu, nabandu abachendachendanga nibaboola akobubeeyi, naboomu shinga omukasa noho eshibia, boosi bakholanga obumayanu.

²⁹Omulilo kwelirumbi kusamba obululu, nebutswa ebibia shibisalulukhanga nibihwa ta. Okhutsiililila okhusiiya abandu banje nokhwa butswa, shichila abalimwo abamayanu shibarusibungwamwo nibahwa tawe.

³⁰Balalangwa mbu, ifeetsa imbi, okhuba isie OMWAMI Nyasaye ndabaloba.”