Read wanga YEREMIA 7 Bible Online

YEREMIA 7 - wanga bible

YEREMIA 7

¹OMWAMI Nyasaye yalachilisia Yeremia mbu atsie asinjile

²hamuliango kweihekalu arumbule amakhuwa kano naboola ari, “Recheresie likhuwa lia OMWAMI Nyasaye, inywe abandu ba Yuda abenjilanga muhekalu muno okhumwinamila.

³OMWAMI Nyasaye omwene mahe, Nyasaye wa Isiraeli aboola mbu mukololosie injenda yenywe nende ebikhole bienywe, nasi ndalamulekha mutsiililile okhumenya habundu hano.

⁴Shimulasuubilila amakhuwa akobubeeyi mbu, ‘Yino neihekalu ya OMWAMI Nyasaye, Ihekalu ya OMWAMI Nyasaye, Ihekalu ya OMWAMI Nyasaye tawe.’

⁵Nimuba toto nimukololosia injenda yenywe nende ebikhole bienywe, nimukhalaka ebiina habwene,

⁶nimuba nimulekha okhusandia abarende, abaana ababisandu nende abakhasi abalekhwa nende okhuratsia eshitsayi shibula eshikha habundu hano, kata okhulonda khubanyasaye bandi, nimwisalisia abeene,

⁷kho ndalamukhola okhumenya hano, eshialo shia ndahelesia abakuuka benywe okhurula khale okhuba obulaame bweinziayo.

⁸Nebutswa, lole, musuubilanga mumakhuwa kobubeeyi akabula inganga.

⁹Mwibanga, nimwira, nimukhola obuheyi, nimwitsuba obubeeyi, nimusambila omunyasaye Baali obubane nende okhwinamila abanyasaye bandi abamulamanyile ta,

¹⁰mana mwitsa imbeli wanje muhekalu muno eyilangungwa eliira lianje nimuboola muri, ‘Khuhonibwe,’ ne nimutsiililila okhukhola akeshisinyo ako.

¹¹Inzu eyilangungwa eliira lianje yino, yikholile imbinga yaabanuuli noho? Lole, manye mbu isie omwene endutsi akamukholanga kano koosi!

¹²Tsie bulano habundu wanje Shiilo, habundu ahandaahula okhwinamilungwaho olwambeli, mulole obusasishi bwa ndakholayo khulwa obumayanu bwabandu banje ba Isiraeli.”

¹³OMWAMI Nyasaye aboola mbu, ndaboola ninenywe akhandi akhanji olwa mwali nimukholanga amakhuwa kano, nebutswa shimwayambulilanga ta. Ndamulanganga, ne kata olwa ndamulanganga, shimwafuchililanga ta.

¹⁴Khulweshio akandakhola khu Shiilo bulano ndalakholela Ihekalu yino eyilangungwa eliira lianje, Ihekalu eya mwisikanga, nende habundu tsana aha ndamuhelesia inywe nende abakuuka benywe.

¹⁵Ndalamulonda muurulekhwo, shinga olwa ndalonda abashienywe abolwibulo lwa Efuraimu.

¹⁶OMWAMI Nyasaye aboola ari, “Iwe Yeremia, olasayilakhwo abandu bano kata okhubahabilakhwo khwisie mushilenje shiabwe ta, shichila shindalakhurecheresia tawe.

¹⁷Iwe shiololangakhwo amakhuwa kabakholanga mumatookho ka Yuda nende mumataala ka Yerusalemu ta?

¹⁸Abaana babwe barenyanga tsikhwi, abasaatsa nabo nibarechekha omulilo, nabo abakhasi nibanyooba obusie okhuteekha emikaate chiomunyasaye omukhasi owa balanganga mbu, omuruchi mukhasi womwikulu. Khandi basundulilanga abanyasaye bandi omusango kweidivai kho mbu baasinyisie isie.”

¹⁹Khulweshio isie OMWAMI Nyasaye ereeba endi, “Kho nisie owa basinyisinjia noho? Tawe, besaalisinjia abeene, nibehafia tsisoni.

²⁰Khulweshio isie OMWAMI Nyasaye emboola mbu, ndalasundula oburuma bwanje nende obululu bwanje habundu hano khubandu nende tsisolo, khumisaala mumikunda nende ebiamo biosi ebieshialo. Bulakha shiomulilo, ne shibulasimibwakhwo tawe.”

²¹OMWAMI Nyasaye omwene mahe, Nyasaye wa Isiraeli aboola mbu, bulano meetekhwo emisango chienywe emisambe khumisango chindi mana abeene mulie inyama yachio.

²²Okhuba olwa ndarusia abakuuka benywe Misiri mana nemboola ninabo, shindabahelesia amalako akemisango emisambe nende ebihaanwa tawe.

²³Nebutswa ndabahelesia lilako lino mbu, mumbulile, mana nasi ndalaba Nyasaye wenywe, nenyu mulaba abandu banje. Mumenye shinga olwa ndamulachilisia kho mbu, amakhuwa koosi kabetsenje amalayi khwinywe.

²⁴Nebutswa shibahulila kata okhurechelesia ta, habula balonda amachesi kabwe abeene nende obukhayi bwomumioyo chiabwe, nibakalukha inyuma mushilenje shiokhutsia imbeli.

²⁵Okhurula khunyanga eyo, olwa bakuuka benywe barula mushialo shia Misiri okhuula olwa leelo, buli nyanga, akhandi akhanji ndamurumiilenje abakhalabani banje abalakusi.

²⁶Nebutswa shimwayambulila kata okhuurechelesia tawe. Mwabele abamakosi amoomu khandi nimukhola obumayanu okhushilakhwo kata abakuuka benywe.

²⁷Nawe Yeremia olababoolela amakhuwa kano koosi, nebutswa shibalakhurecheresia tawe, olabalanga nebutswa shibalafuchilila tawe.

²⁸Olababoolela ori, ninywe lihanga elialoba okhuhulila OMWAMI Nyasaye, Nyasaye wenywe, kata okhufuchilila obuchetsiyibwe. Khulweshio obwisikwa shibuli mwinywe khandi ta, bwahwela elala okhurula mumakhuwa kenywe.

²⁹OMWAMI Nyasaye aboola ari, “Beche liswi lienywe inywe abamenya mu Yerusalemu, mulisukune, mwikhuule khubutenje bwebikulu, okhuba isie OMWAMI Nyasaye emulobile inywe, abolwibulo olwareera liruma lianje!

³⁰“Abandu ba Yuda bakholile obumayanu imbeli wanje. Bareerire ebifwanani biabwe bieshisinyo muhekalu yino eyilangungwa eliira lianje nibachikhola okhuba eyomusilo.

³¹Khandi boombashe ebimalilo biemisango mbu, Tofetsi mwibanda liomwana wa Hinomu khulwa okhusambilakhwo abaana babwe abasiani nende abakhaana, eshili eshindu shia isie ndalaalakakhwo kata okhuyililisiakhwo mumakani kanje tawe.

³²OMWAMI Nyasaye aboola mbu, tsinyanga tsitsanga olwa abandu belibanda elo balibula okhulilanga mbu Tofetsi noho mbu, libanda liomwana wa Hinomu, ta, habula liakhalangwe mbu, libanda liokhusinzilamwo abandu, okhuba baliyabila abafu mu Tofetsi okhuula olwa obwiyangu bwosi bwakhabe nibuhwelemwo.

³³Emilambo chiabandu abo chiakhabe ebiokhulia biamanyonyi nende tsisolo, kata shialibakhwoho omundu yesi outsilonda okhurulamwo tawe.

³⁴Eshialo shiakhabe eshitsiimi, ne ndakhakamie mumatokho ka Yuda nende mumataala ka Yerusalemu amayoosi kokhwikhoya nende tsingalakala tsiamasabo keshiselelo.”