Read wanga YEREMIA 8 Bible Online

YEREMIA 8 - wanga bible

YEREMIA 8

¹OMWAMI Nyasaye aboola ari, munyanga etsio, amakumba akabaruchi ba Yuda nende akabemilisi, nende akabesaaliisi nende abalakusi, nende akabandu ba Yerusalemu koosi kaliyabululwa okhurula mubilindwa biabwe.

²Balikabakala habulafu imbeli weliuba, omwesi, netsing'ining'ini tsiomwikulu, ebia baheelanga nibabikhalabanila khandi ebia balondangakhwo nibareeba okhurula khubio nende okhubinamila. Amakumba ako shikalibunjelesibwa halala kata okhuyabilwa ta, habula kaliba shinga amasingo.

³Abandu boosi abehonokokha aboluyia olumayaanu luno, balikomba okhufwa okhushila okhubaho mwoyo. Nolwa isie OMWAMI Nyasaye omwene mahe emboola.

⁴Iwe Yeremia, obaboolele mbu isie, OMWAMI Nyasaye ereeba endi, “Omundu naba nakwa hasi, shiabuukhangaho? Ne omundu naba nakora injila, shiachelelanga noho?

⁵Ne eshichila abandu banje, nibarulakhwo, nibalangalushila ta nishiina? Bahandanga khubifwanani biabwe nibaloba okhungalushila.

⁶Isie ndarecheresiye obulayi bwene nebutswa shibaboola obwatieli bwosi tawe. Abulaho omundu owikalukhasia okhulekha obumayanubwe, kata omwene okhwireeba mbu ‘Nishiina eshia ndakhola eshibi?’ Buli mulala khubo alondanga khunjilaye omwene shinga ifarasi olwa yilukhanga shilunji niyitsia mwihe.

⁷Kata likuyi limanyile eshise shialio shiokhuhuya, lihusi, iminyi neliwang'i bimanyile ebise biabio biokhuhuya, nebutswa abandu banje shibamanyile amalako kanje isie OMWAMI Nyasaye wabwe tawe.

⁸Mwakhaboola murie muri, ‘Khuli abachesi, khuli namalako aka OMWAMI Nyasaye?’ Olwa abahandichi bamalako bashiamiye amalako kanje.

⁹Abachesi benywe balafwimbibwa omurwe, nibafwa omwoyo khandi nibahambwa. Okhuba balobile amechesio ka OMWAMI Nyasaye. Kho nobuchesi shiina obwa bali ninabwo?

¹⁰Niko akachila ndalahelesia abandu bandi abakhasi babwe, nachio emikunda chiabwe khubandu abacheni. Okhuba buli mundu okhurula khumutiiti okhuula khumukhongo, yenyoolelanga inganga munjila yobunuuli. Kata abesaaliisi nende abalakusi bakaatinjia abandu.

¹¹Basilikhanga amafimire kabandu banje khwikulu butswa shinga akalenjiile munyama mukari ta, nibaboola bari, “Amakhuwa koosi kali butswa obulayi,” Olwa omulembe kuba nikulaliho ta.

¹²Inywe abandu banje, mwafwimbwakhwo murwe olwa mwakhola akeshisinyo ako? Tawe! Shimwafwimbwakhwo omurwe kata nahatiiti tawe. Kata shimwalikhwo neshifwimbwa omurwe tawe. Niko akachila mulamululwa shinga abandu bandi abo bamululwa. Olwa ebahelesia eshinyasio, bamululwa boosi pe. Isie OMWAMI Nyasaye nolwa emboola.

¹³“Isie OMWAMI Nyasaye emboola mbu, Olwa ndenya okhukhung'asia halala abandu banje, shinga olwa omundu akhung'asinjia ebichesebie, shindanyoolakhwo tsinzabibu tawe. Shindanyoolakhwo amakhuyu khumikhuyu chiabwe tawe; Amasafu kachio kali nikanialile. Ebia ndali nindabahelesia biali nibibarulilekhwo.”

¹⁴Abandu bareebana mbu, mbushiina nikhwikhale butswa hano? Chende khukhung 'ane khwinjile mumataala kombakhwa netsingoba mana khusishilemwo. Okhuba OMWAMI Nyasaye wefwe yakhusishiye yakhuhelesiiye amaatsi akalimwo obufila mbu khunywe, okhuba khwonoonela OMWAMI Nyasaye.

¹⁵Khwasuubilila okhunyoola omulembe, nebutswa libulaho lilayi elietsa tawe. Khwasuubilila okhuba neshise shiokhuhonibwa, mushilenje shiako, khwonyoola amarisia.

¹⁶Okhwana khwetsifarasi tsiabasuku khuhulilikhanga okhurula mushialo shia Dani, oluyoka lwokhwana khwetsifarasi tsisaatsa lutechesinjia eshialo shiosi. Okhuba tsitsile okhusasia eshialo shiosi nende biosi ebilimwo, litookho nende abamenyangamwo.

¹⁷“Okhuba ndalaruma hakari wenywe tsinzokha, ebilikoma ebia mulanyala okhusilikha obufwisi bwabio tawe. Mana tsinzokha etsio tsilamuluma inywe.” Nolwa isie OMWAMI Nyasaye emboola.

¹⁸Eshibeela shianje shishinyala okhuhwa ta, omwoyo kwanje kuhwelemwo amaani.

¹⁹Hulila okhuhaba khwa abandu banje okhurula mushialo shiehale muno. Kho OMWAMI Nyasaye shiali mu Zayuni ta noho? Omuruchi walio shiashilikhomwo ta noho? Ne mbushiina nibasinyisiyie nebifwanani biabwe ebibatse nende ebifwanani biabwe ebicheni ebilalikhwo neinganga ta?

²⁰Lichesa lihwele, natsio tsinyanga tsieshimiyu tsiabirire, nefu shikhuhonokosibwe tawe.

²¹Omwoyo kwanje kutsuunwa muno, okhuba abandu banje basalisibwe muno, ndikhuula khandi endi noburi obunji.

²²Omusilishi shialikhwoho mu Giliadi ta? Indesi shiyilikhwoho ta? Kho eshichila obulamu bwabandu banje nibulahonibwa ta nishiina?