Read wanga YEREMIA 9 Bible Online

YEREMIA 9 - wanga bible

YEREMIA 9

¹Shiakhuha omurwe kwanje kwaba amaatsi natsio tsimoni tsianjie tsiaba eshinoko shiamasika! Ndakhalila eshiteere neshilo tulu shichila okhwiirwa khwabandu banje.

²Shiakhuha ndaba neinzu yabachendi yokhwiyalisiamwo mushitsiimi kho mbu enyale okhulekha abandu banje mana ebarulekhwo okhuba bosi nabaheeyi omukanda kwabandu balali abesiikwa ta.

³Bafumba tsinimi tsiabwe shinga obuyingo Batsalikha okhukhola obubatsa, obwatoto tawe. Barulanga okhukhola obwonooni nibatsia okhukhola obundi nasi shibayamanya tawe. Nolwa OMWAMI Nyasaye aboola.

⁴“Mube meeso buli mundu khukowashie murasuubilila omwana wenywe yesi ta, okhuba buli omwana wenywe nomukaati khandi buli owashienywe yesi nomutswanzwani.

⁵Buli mundu akaatinjia owashie ne abulaho ouboolanga akobwatoto beechesiiye tsinimi tsiabwe okhuboola obubatsa bemalanga abeene amaani khulwa okhukhola obumayanu.

⁶Bameetanga obusandi khubusandi bundi khandi obubatsa khubundi nibaloba okhumanya isie.” Nolwa OMWAMI Nyasaye aboola.

⁷Khulwasho isie OMWAMI Nyasaye omwene mahe emboola mbu, “Lola nditsa okhubatsienula, nibateema! Noho ekhole shiina okhushila ako khubandu banje abamayaanu?

⁸Olulimi lwabwe luli shinga eshisele shiobufwisi, luboolanga akobukaati ne buli mundu nomunwakwe yekaatinjia okhuboola akomulembe khuwashie, nebutswa mumwoyokwe amukoneshelanga okhumwira.

⁹OMWAMI Nyasaye areeba mbu, “Endeshe okhubahelesia eshinyasio khulwa amakhuwa kano? Endeshe okhwimalila eshikwoli khwihanga lifwana shinga lino?”

¹⁰Ndalalila nindikhuulila ebikulu, ndalekhuula khulwa obwayilo bwomushitsiimi khulwa okhubeela biosi bimuluulwe pe abulaho omundu ouchendanga habundu yaho. Okhwana khwetsing'ombe shikhuhulilikhangakhwoho ta kata amanyonyi nende tsisolo biosi biilushemwo nibitsia.

¹¹OMWAMI Nyasaye aboola mbu, “Ndalakwisia Yerusalemu amachinjini ndalakhola okhuba eshimenyo shia amabwe ndalakwisia amataala ka Yuda amakunda habundu aha abandu balanyala okhumenya ta.”

¹²Niwiina omundu omuchesi muno ounyala okhumanyilisia amakhuwa kano? Niwiina owa OMWAMI Nyasaye yebaalila mana anyala okhukenoosia? Eshichila shiina eshialo nishisasibwa mana nishitong'a eshikhaya shinga eshitsiimi shiomundu yesi alanyala okhubiramwo ta?

¹³OMWAMI Nyasaye aboola ari, “Kali kario khulwa okhubeela bafukula amalako kanje ka ndabahelesia, shibambulilanga kata okhulonda amalako kanje ta.

¹⁴Nebutswa balondile nibakhola akobukhayi bwemioyo chiabwe, nibalonda khubanyasaye Baali shinga olwa bakuuka babwe babeechesia.”

¹⁵Khulweshio kano niko aka OMWAMI Nyasaye omwene mahe, Nyasaye wa Isiraeli aboola mbu, “Lola ndalakhola abandu bano okhulia ebiokhulia ebilulu pia nende okhunywa amaatsi kalimwo obufwisi.

¹⁶Ndalabasalaasia mumahanga aka balamanyile noho kata abakuuka babwe okhumanya ta. Mana ndalabatafia nolukanga okhuula olwa ndilaba nebeerire boosi.”

¹⁷OMWAMI Nyasaye omwene mahe aboola ari, “Yililisie, nimulanga abakhasi abekhuuli mbu beetse, murume okhulanga abakhasi abali abobusitsa okhwikhuula beetse.

¹⁸Betse bwangu muno bakhwikhuulile ifwe, okhuula olwa tsimoni tsiefwe tsitsulamwo amasika nikaronya nako amaatsi nikarungulukha okhurula mubisiche biefwe.”

¹⁹Okhuba omwoyo kwetsinzikhuulu kuhulilikhanga okhurula Zayuni, nikuboola kuri, “Khusasibwe muno! Khutiililwe netsisoni muno! Okhuula khurule mushialo shiefwe shino okhuba amataala kefwe kakwisibwe amachinjini.

²⁰Inywe abakhasi hulile likhuwa lia OMWAMI Nyasaye. Reche amarwi kenywe khuka OMWAMI Nyasaye aboola, yechesie abaana benywe abakhaana okhwikhuula yechesanie abeene olutselelo.

²¹Lifwa linjiliile mumatirisha kefwe, liinjiile munzu tsiefwe tsiatsingoba, liikaliile abaana befwe elwanyi khutsinjila tsiomumatookho nabo abaraaka bekaliilwe elwanyi ebulafu.”

²²Kano niko ka OMWAMI Nyasaye aboola mbu, “Emilambo chiabandu chilandakalala shinga amasingo mushikuri habulafu. Shinga ebinywa bieimele inyuma womuchesi, ne alabulaho oulachikhung'asia halala.”

²³Kano niko aka OMWAMI Nyasaye aboola mbu, “Omundu omuchesi aleshe okhwiyitsialila abuchesibwe, noho omuyinda okhwiyitsialila obuyindabwe.

²⁴Nebutswa oyo owiyitsiala akhoyeele yeyitsialile kano mbu amanyile eshisina niyamanyilisia isie, mbu endi OMWAMI Nyasaye oukholanga akeshisa, nobukhalachi bwa habwene nende akobulunjishi khushialo okhuba ako niko kesangaalilanga.”

²⁵OMWAMI Nyasaye aboola mbu, “Tsinyanga tsitsanga olwa ndalahelesia kwonyene eshinyasio abo abashebwa omubili, abeene nibo abebialo bino mbu,

²⁶Misiri, Yuda, Edomu, Amoni, Moabu nende abandi boosi abamenya mushitsiimi ehale. Okhuba amahanga kano koosi kashebwa, khandi kata abeinzu yosi ya Isiraeli bashebwa mumwoyo.”