Read wanga TSINZIKHUULO 2 Bible Online

TSINZIKHUULO 2 - wanga bible

TSINZIKHUULO 2

¹OMWAMI Nyasaye mwirumalie, areere abandu ba Yerusalemu mushiilima. Oluyali lwa Yerusalemu lufuubilwe hasi. Khunyanga ya lirumalie, shiyetsuliile kata Ihekaluye tawe.

²OMWAMI Nyasaye amuluule ebimenyo biosi biabandu ba Yuda, nalalikhwo neshibeela shiosi ta. Mwirumalie afunaache tsingoba tsiamaani tsia Yuda. Oburuchi bwabwe nende abaruchi babwe abeshiye hasi mushifimbwa murwe.

³Afunakasiye amaani ka Yerusalemu koosi mwirumalie. Khandi shiakololosiye omukhonokwe omusaatsa okhubakhoonya olwa baseerirwe nabasuku babwe tawe. Abwanile omulilo mubandu ba Yuda, omulilo okwokhumulula buli shindu eshia bali ninashio.

⁴Akhwesile obuyingobwe shinga oukhwesela omusuku, ne arecheeshe omukhonokwe omusaatsa. Yeerire abandu boosi aba khwekhoyelangakhwo mumaheema kefwe ka Zayuni, khandi asunduule obululubwe khwifwe shinga omulilo.

⁵OMWAMI Nyasaye akwiile omusuku wefwe, asasiye abandu ba Isiraeli, khandi alikulule tsingoba tsiabwe tsiosi; Mana winjiyiyie khubandu ba Yuda amasika nende tsinzikhuulo.

⁶Asambuule Ihekaluye eya khwamwinamilangamwo, asasiye habunduwe hatakatifu. OMWAMI yakamiye tsinyanga tsikhulundu tsiamasabo nende etsia Isabato mu Yuda. Mwirumalie lilulu afwolile omuruchi nende omwisaaliisi.

⁷OMWAMI Nyasaye aleshile eshimaliloshie shiemisango, khandi alobile habunduwe hatakatifu. Afuchilile abasuku okhukwisia tsingoba tsielitookho, bakhupile tsingalakala nibali munzu eya OMWAMI, tsingalakala shinga etsiokhunyanga yelisabo.

⁸OMWAMI Nyasaye areerekhwo omwoyo, okhulikulula tsingoba tsielitookho lia Zayuni, achelile omukoye, ne nakwisia hasi buli shindu, akwisiiye eminaara chialio nende amasiisi kalio koosi hasi, mana nabikhola biosi okhusasikha.

⁹Ebilibwa bialio bikwiile hasi, emiyinjilo chialio afunache chiosi, omuruchi nende abakhuludube boosi bali mubwilushilo mumahanga, Amalako kabulaho, abalakusi shibalolanga amalolelo okhurula khu OMWAMI Nyasaye khandi tawe.

¹⁰Abakofu ba Zayuni bekhaale hasi nibaholelile tsi, bepuuchile likoshe khumirwe chiabwe, khandi bafwalile ebifwalo biamakunia. Abakhaana ba Yerusalemu benamiye emirwe chiabwe hasi.

¹¹Tsimoni tsinje tsiakhanye khulwa okhwikhuula, amala kanje kayile; Omwoyo kwanje kubeleele khulwa obusasishi bwabandu banje, khandi khulwa okhubeela ebirobotona nende abaana abatiiti bakwa hasi nibanyira khumihanda chiomwitookho.

¹²Bahabila abanyina nibaboola bari, “Eshiokhulia nende eshiokhunywa bili heena?” Banyira shinga abasalisibwe mwihe khumihanda chiomwitookho, Bakhalaka omwoyo khumakulu kabanyina.

¹³Nishiina eshia nemboole khwiwe iwe Yerusalemu? Nishiina eshia nekhuchelaasiekhwo? Nishiina eshia nekhufwananisiekhwo iwe Zayuni, kho mbu ekhuhotselesie? Okhuba obusasishibwo nobukhongo shinga inyanza; niwiina ounyala okhukhuhonia?

¹⁴Abalakusibo bakhuloleele amalolelo kobubeeyi; shibabakaale habulafu obumayanubwo, mbu banyale okhukhukololosia ta. Habula bayiniye obulakusi bwobubatsa khandi obushiamu.

¹⁵Boosi ababiri bokhunjila, bakhuupa amakhofi nibahuka, bakhureesilia emirwe chiabwe iwe Yerusalemu nibareebana bari; “Lino nilio litookho elialangungwa mbu, ‘Lilayi mumalayi?’ Litookho eliali eliokhwikhoyela mushialo shiosi?”

¹⁶Abasukubo boosi bakhutsesheelela; bakhufuutsa nibalumaasia ameeno kabwe halala, nibeyitsiala abeene bari: “Khumumalilaniile elala! Ino niyo inyanga eya khwalindililanga muno; ne leelo yulile.”

¹⁷OMWAMI Nyasaye akholile aka yali niyarakhwo omwoyo okhukhola, yosiiye aka yali niyasioma okhukhola; shinga olwa yalachilisia khale, asasiye halali eshibeela shiosi ta; akholile omusuku okhukhutsesheelela, nende okhuchinguula amaani kabasukubo.

¹⁸Lilila OMWAMI Nyasaye nomwoyo omukhongo, iwe Zayuni! Lekha amasika kachetulushe hasi shinga omukhula, eshilo neshiteere! Shiolesimiilisiakhwo, kata okhwihotselesiakhwo ta.

¹⁹Bukha mushilo, khupa oluhungu, khupa oluhungu mushilo hakari! Mulilile OMWAMI Nyasaye nomwoyokwo kwosi, Chinguula amakhonoko ikulu imbeliwe, khulwa obulamu bwabaanabo, abanyiranga nibafwa khulwa inzala, nibakwa khumihanda chiosi echia mwitookho.

²⁰“OMWAMI Nyasaye henga, lola; Niwiina owa wakholelakhwo aka okhukholeele kano? Toto abakhasi bakhalia abaana babwe, aba abeene banuunia? Toto abesaaliisi nende abalakusibo, beriirwe mu Ihekaluyo?

²¹Abaana nende abakofu balaambiile mulufu, bakonile khu emihanda echili mwitookho; Abakhaana nende abasiani abaraaka banje berirwe nolukanga; Obeerire khunyangayo yoburuma, obasinzile nolabalolelakhwo tsimbabasi ta.

²²Winjisiye abasuku banje okhurula tsimbeka tsiosi, betsile shinga abalaanjilwe okhulia lisabo; ne khu inyanga yoburumabwo, abulaho owahonokokha kata mulala ta. Balia aba ndalela nikhusia, omusuku wanje abamuluule boosi pe.”