Read wanga TSINZIKHUULO 3 Bible Online

TSINZIKHUULO 3 - wanga bible

TSINZIKHUULO 3

¹Isie nisie owasandibwa neindabushi yoburuma bwa Nyasaye;

²Yambukuule niyayira mushiilima, mushiilima hasi wobulafu bubula;

³toto mwene yangalukhanekhwo, yasandiye eshiteere tulu.

⁴Akholile omubili kwanje nende likhoba lianje okhuhwelelela, khandi afunache amakumba kanje;

⁵yambotokhane niyanzikalila nobululu nende obusandibwi;

⁶Yakholile okhumenya mushiilima shinga abo abafwa khale.

⁷Yanzikalile mwisisi mbu ekhaywe okhwilukha; yamboyile neminyololo emisiro;

⁸Kata nendila nende okhuhaba mbu yakhoonye, yekalilanga amasaayo kanje.

⁹Yekaliile tsinjila tsianje namachina, ashiamiye tsinjila tsianje.

¹⁰Ali shinga lifunyisi elikoneshele shioluyitsi, shinga italanyi eyifisile;

¹¹yanoondile okhurula khunjila yanje niyarandulamwo ebitonye; ne niyandekha nimbula wokhuhabina.

¹²Akhwesile obuyingobwe niyakhola isie okhuba weshiseleshie shichoomilekhwo.

¹³Yafumiire nebiselebie, ebisele okhurula mu imotiaye;

¹⁴Engwire eshindu shiokhutseshelelwa nabandu boosi, nenganwa muminwa chiabwe eshiteere tulu.

¹⁵Yanzitsusiyemwo obululu, niyanzikusia nende obwanya mumunwa kwanje.

¹⁶Atubuliile ameeno kanje khutsimbaale, niyangalakasia mwikoshe;

¹⁷omwoyo kwanje kubula omulembe, ndibiliile mbu obutsaatsahafu bwosibwosi nishi;

¹⁸nakachira nimboola, “Oluyali lwanje lwosi luhweele, halala nende linayo lianje okhurula khu OMWAMI.”

¹⁹Obusandibwi nende obuboyaboyi bwanje

²⁰Omwoyo kwanje kubipaarangakhwo khasootso nikubuunama mukari mwanje.

²¹Halali olwa nditsulilanga kano, linaya licheleelanga mwisie:

²²Mbu obuheeli oburalilu obwa OMWAMI bubula indukho, tsimbabasitsie shitsihwetsangaho tawe;

²³tsishilaana mubuyia buli obushia; obwisikwabwo nobukhongo muno.

²⁴Omwoyo kwanje kuboola kuri, “OMWAMI niye omukabo kwanje, khulweshio ndalasuubila muye.”

²⁵OMWAMI nomwisikwa khu balia abamwileetangakhwo, khumwoyo kulia okumukhaabanga.

²⁶Nelilayi okhwihotselesia nolindilila obuhonia obwa OMWAMI.

²⁷Nobulayi omundu okhweka obwisimilisi okhurula muluraakalwe,

²⁸okhwikhala yenyene naholeelile olwa Omwami aba namutuushile obusiro nalebe,

²⁹okhubuunama hasi niyetuutuyia kho linaya haundi lishiliyo

³⁰okhumuheelesia oumusaalisia oluseya mbu akhupe, nabuumbwakhwo amaseyo.

³¹Okhubeela Omwami shialafukula inziayo tawe,

³²okhuba kata naba nasaalisia, alatiilwa neshisa okhulondokhana nende obunji bwobuheelibwe oburalilu;

³³okhuba shiasaalisinjia noho okhubeeelesia omundu yesiyesi nachamile tawe.

³⁴Omwami shiafuchililanga okhutubanjila hasi webilenje ababisandu beshibala,

³⁵noho okhushiula omukabo kwabwe imbeli ewa OMWAMI Nyasaye Omukhongo Muno,

³⁶kata okhushiamia eshiina shiabwe, olwa bafunaanibwa ta.

³⁷Niwiina owalachilisiakhwo mana nilikholekha, nalali Omwami ouloosiye mbu libe lirio?

³⁸Amalayi nende amabi karulanga heena nimulali mumunwa kwa Omwami ouli Omukhongo Muno?

³⁹Eshiakhachila omundu namundu abuuluule olwa aheebwa eshinyaasio khulwa obwonoonibwe nishi?

⁴⁰Lekha khwirunilisie nikhuhenjelesia tsinjila tsiefwe, mana khumukalushile OMWAMI!

⁴¹Khuchinguule emioyo chiefwe nikhumukalishila amakhono Nyasaye ouli mwikulu:

⁴²Khushiamile okhurula khunjila nikhukhola induli, nawe shiokhulesheele tawe.

⁴³Wiboyeele oburuma nokhwambachila nomulula nolukanga halali eshisa shiosi tawe.

⁴⁴Wifuunishe lileesi lisiro mbu amasaayo kosikosi kaleshe okhukhuulakhwo.

⁴⁵Okhukholile okhuba amakhumbiri nende obuchafu hakari wabaana ba abandu.

⁴⁶Abasuku befwe boosi bakhuupa amakhofi,

⁴⁷indenga nende oburi bikhwitsiile okhumululwa okhumeeta khukhumululwa;

⁴⁸tsimoni tsianje tsinyululukha emichela chiamasika khulwa abandu banje abamalilanungwa.

⁴⁹Amasika kanje kalanyululukha nikalakhalikha ta.

⁵⁰Okhuula OMWAMI aheenje okhurula mwikulu nalola;

⁵¹tsimoni tsianje tsili neshibeela eshinji olwa tsilolanga akabakwiliile abakhasi bomwitookho lianje.

⁵²Eyiimilwe shielinyonyi nende balia abangiya harali eshikha;

⁵³baasukuna mubuko neshili mwoyo nibaambumbakhwo amachina;

⁵⁴ndeyinikha mumaatsi okhuula khumurwe; nimboola, “Esie kho endibile.”

⁵⁵Ndalilila eliiralio iwe OMWAMI, okhurula mubwiyinikhu bwobuko;

⁵⁶wahulila amasaayo kanje, “Shioleekala amarwiko khukhusaaya khwanje ta, halali umbelesie obusoosi.”

⁵⁷Wasita ahambi olwa ndakhusaaya; niwumboolela, “Shiolaria tawe.”

⁵⁸Wufunaniliiye omuse kwanje, iwe Omwami ohonokosiiye obulamu bwanje.

⁵⁹Olutsi amabi kekholeelwe, iwe OMWAMI; wukhalachile omuse kwanje.

⁶⁰Olutsi obukiiyi bwabwe bwosi khwisie, nende emipango chiabwe chiokhusaalisia.

⁶¹Owuliile okhwiyitsiala khwabwe, iwe OMWAMI, emipango chiabwe chiokhusaalisia.

⁶²Amakhuwa nende amapaaro kabasuku banje kaafukula eshiteere tulu.

⁶³Olwa beekhala hasi kata okhubuukha lola, nisie owa barumbula muminwa chiabwe.

⁶⁴Obarunje khubikhole biabwe, iwe OMWAMI, okhulondokhana nende emilimo chiamakhono kabwe!

⁶⁵Saalisia emioyo chiabwe; eshilaamoshio shiobubii shibakwiile!

⁶⁶Obalondachilile muburuma nobamulula boosi okhurula khushibala.