Read wanga TSINZIKHUULO 4 Bible Online

TSINZIKHUULO 4 - wanga bible

TSINZIKHUULO 4

¹Itsahabu yefwe yisaamuushile, itsahabu inzeleleshe yikaluukhaane! Amachina akobukusi ka Ihekalu kasalaasiibwe, kasalaasiibwe khumihanda chiosi pe.

²Ababuukha abalayi ba Zayuni, abobukusi shinga bweitsahabu inzeleleshe, bakaluukhaane bengana tsinyungu tsielitoyi, emilimo chiamakhono komulonji!

³Kata amabwe kayininjia tsimbeele tsiako, nikanuunia abaana bako, nebutswa abandu banje nabalulu, shinga amahuto mushitsiimi.

⁴Tsinimi tsiabaana abatoro, tsihaandile mubitakhuna khulwa obuloho, abaana balila nibasabasaba ebiokhulia nebutswa oubahelesia abulaho.

⁵Abandu abaliitsanga ebiokhulia ebilayi ebitorotoro, bafwa inzala khumihaanda; nabo abakhusilibwa mubulamu obwomuburuchi bulaano batoobelesia ebiokhulia mumakokha.

⁶Eshinyaasio eshia abandu banje shibeele eshikhoongo, shishila eshiali eshia abandu abamwitookho elia Sodomu, eliasaambilwa elala mubwangu, kata owokhubahonokosia shiyaliho ta.

⁷Abasiani abomuburuchi bwa Zayuni balinji abeeleleshe okhushila itsaluchi, abalafu okhushila amabeele; emibili chiabwe chialinji eming'onefu okhushila amachina amakhanyu akomunyanza, abelikondo shinga isapiri.

⁸Bulaano likoondo liabwe nelimali ti shinga ifiro; shibamanyikhana olwa bachenda khumihanda ta. Eshikhoba shiemibili chiabwe shianialila khubikuumba; shioma ka shinga tsikhwi.

⁹Kata abamululwa nolukanga bali obulayi okhushila abafwa khulwa inzala, abobulamu bwabwe bwotoshelelela nibafwa inzala khulwa eshimotso, bang'aha emibili khulwa okhutaamba ebiokhulia.

¹⁰Khulwa tsimbabasi, abakhasi bateekha abaana babwe namakhono kabwe abeene, nibabakhola ebiokhulia olwa abandu bomwami Nyasaye bamalilanwa.

¹¹OMWAMI Nyasaye yasinyikha muno, nasuundula oburumabwe obululu; kho narubula omulilo khwitookho lia Zayuni okwamulula emise chialio chiosi pe.

¹²Abaruchi beshibala shibasuubilila ta, kata yabulaho khubamushialo, owasuubilila mbu abaseeri nende abasuku bakheenjile mubiliibwa bia Yerusalemu.

¹³Ako kekholekha khulwa obwonooni bwabalakusi khandi nende obumayanu bwabeesaaliisi, abaraatsia eshitsayi shiabaana babwe ababula eshikha abomwitookho elo.

¹⁴Batiimatiima eyi nende eyi khumihaanda shinga ababofu, nibeemaalilekhwo bario eshitsayi mbu kata omundu yesi yesi shiyakhanyalile okhutiila khubiifwalo biabwe ta.

¹⁵Nolwa abandu babayibila nibaboola bari, “Mukhurulekhwo! Inywe abandu abonooni!” “Mukhurulekhwo, Mukhurulekhwo, Mulakhutiilekhwo tawe!” Kho nibeekhola abareende khandi abokhutimatima; abandu baboolelana mubialo bari, “Shibalamenyakhwo hano khandi ta.”

¹⁶Omwami waabasalasiye, shiyetsa okhubapaarakhwo mbu neshindu khandi ta; oluyali khubeesaaliisi lwahumaho, abakofu shibalateebwakhwo ta.

¹⁷Khwareenjetsa khwachoonya nikhuliindiililanga ihabini obulanyoola ta; khwaliindiilila nobuha nebutwa liahumaho lihanga eliakhuhonokosia.

¹⁸Abandu bakhulondachilila munyuma nikhukhaywa okhubirira khumihanda chiefwe; Tsinduukho tsiefwe tsiali nitsiulile; tsinyanga tsiefwe tsiali nitsihwele, okhuba omumaliilikho kwefwe kwali nikuulile.

¹⁹Abakhulondachilila bali abangu okhushila tsindutsu; bakhwilukhasia mubikulu, mana nibakhukoneshela mushitsiimi.

²⁰Eshinoko shiobulamu bwefwe, ouli omulobole womwami, bamutiila nibamura mubuko bwabwe omwenoyo owa khwali nikhweesika, mbu yakhakhulinde okhurula khubaseeri beefwe.

²¹Inywe abandu ba Edomu, mwikhoye nimutsatala, inywe abamenyanga mushialo shia Uzi; nebutwa eshinyaasio shienywe shilamwitsila khandi; neenywe mulanywa, nimumeela, nimuchenda eshiechenye.

²²Inywe abaana ba Zayuni, eshinyasio shiobwonooi bwenywe shimalile okhuusibwa, Omwami shialabalekha mumbohe khandi ta; nebutswa inywe abaana ba Edomu, Omwami alabaraakhwo eshinyaasio khulwa obumayanu bwenywe, Omwami alabakala obwonooni bwenywe habulafu.