Read wanga EZEKIELI 1 Bible Online

EZEKIELI 1 - wanga bible

EZEKIELI 1

¹Khunyanga yakharano mumwesi kwakhane kwomumuyika kwamakhumi kataru, olwa isie Ezekieli, omwisaaliisi, omwana wa Buzi ndali nendi halala nende Abayahudi abahambe khumwalo kwa Kebari, likulu liekukha ne nendola amalolelo ka Nyasaye.

²Khunyanga yakharano yomumwesi, (omuyika kwakharano omuruchi Yehoyakini nali mubuhambe),

³OMWAMI Nyasaye yaboola ninasi, olwa ndali nendi khumwalo kwa Kebari, mushialo shia Babuloni. Mana obunyali bwa OMWAMI Nyasaye nibunzitsamwo.

⁴Olwa ndahenga, ndalola omuyeka omukhongo kweimbumbuyeka nikuhutsa okhurula olubeka lwemasaba. Ndalola lileesi likhongo nilibotokhaanwe nobulafu, khandi nililumiliile okhukhosia omulilo. Ne hakari womulilo okwo, shialiho eshindu eshing'inang'inu shinga omukasa.

⁵Hakari washio, ndalola ebilonje bine ebili mwoyo, ebialolekha shinga abandu. Ne bialolekha biri nanwa mbu,

⁶buli shilala khubio shiali nobweni eshikhane nende tsimbaha tsine.

⁷Ebilenje biabio biali ebikololofu, nako amalaaro kabio kafwana shinga tsindekeyi tsiebilenje bieshimoosi. Khandi biang'inang'ina shinga omukasa kuruutilwe obulayi.

⁸Hasi wetsimbaha tsiabio tsine etsio biali nemikhono chine shinga chiabandu.

⁹Tsimbaha tsiabio tsiatiilana buli olubaha khulundi. Ne buli olwa biachendanga, biosi biatsitsanga imbeli shilunji obulashiukhanakhwo ta.

¹⁰Obweni bwabio imbeli wabwo, bwafwana shinga bwomundu, ne khulubeka lwomukhono musaatsa, bwafwana shinga bweitalanyi. Khumukhono mukhasi, bwafwana shinga bweing'ombe iheyi, nayo inyuma wabwo, bwafwana shinga bweindutsu.

¹¹Nolwa obweni bwebilonje ebio bwafwana burio. Ne tsimbaha tsiabio tsibili tsiali nitsibambuushe hekulu. Buli eshilonje shiali netsimbaha tsibili etsiatiilana nende tsieshilonje shindi, natsio tsibili tsindi tsiafuunikha emibili chiabio.

¹²Ne buli eshilonje eshio shiatsia imbeli shilunji. Hosi hosi aha roho yatsitsanga biosi biatsitsangayo shilunji obulashiukhanakhwo elubeka tawe.

¹³Hakarikari webilonje bili mwoyo ebio, eshindu shialiho eshiafwana shinga amanda komulilo nikangaale, khandi shiafwana shinga ebichienga biomulilo ebiakhosinjia eyi nende eyi mubilonje bili mwoyo ebio. Ne oluhenu lwahenukha okhurula mumulilo okwo.

¹⁴Ebilonje ebio biatsitsanga eyi nende eyi nibihenukha shinga oluhenu.

¹⁵Olwa ndahenga khubilonje bili mwoyo ebio, ndalola emikurutumu chine nichili hasi, hambi wabuli eshilonje.

¹⁶Emikurutumu echio chiosi chiali nichifwanana; chiang'inang'ina shinga itsahabu, khandi chiafwana shinga omukurutumu nikuli mu kundi.

¹⁷Olwa emikurutumu echio chiabotokhananga, chiachoomanga khutsimbeka tsiachio tsiosi tsine, obulashiukhanakhwo ta.

¹⁸Tsirimu tsiemikurutumu echio tsiali tsirambi muno, khandi tsiosi tsiali netsimoni buli habundu khutsimbeka tsiosi.

¹⁹Buli olwa ebilonje bili mwoyo ebio biasutanga, emikurutumu echio chiosi chiasutanga ninabio halala. Khandi buli olwa biabuukhanga nibisinjila, emikurutumu echio chiosi chiakholanga chirio.

²⁰Hosi hosi aha ebilonje bili mwoyo ebio bienyanga okhutsia niho aha biatsitsanga. Nachio emikurutumu echio chialondananga ninabio buli aha bitsia, okhuba ebilonje bili mwoyo ebio nibio ebiemililanga emikurutumu echio.

²¹Olwa ebilonje bili mwoyo ebio biasutanga, noho nibibuukha, noho nibisinjila, nolwa emikurutumu echio chiosi chiakholanga chirio; okhuba chiemililungwa ninabio.

²²Khumirwe chiebilonje bili mwoyo ebio, khwalikhwo eshindu eshifwana shinga likulu, nishibambuulwe hekulu wemirwe echio, ne shiang'inang'ina shinga eshihoo.

²³Hasi weshindu shinga likulu eshio, ebilonje bili mwoyo ebio biasinjilaho, buli eshiloje nishibambuule tsimbaha tsiashio tsibili nitsihenjile khutsieshindi shili hambi nashio. Khandi buli shilala khubio shiali netsimbaha tsibili nitsifuuniishe omubili kwabio.

²⁴Olwa ebilonje ebio biali nibipulukhanga, ndahulila tsimbaha tsiabio nitsikhola obuyoka shinga obwokhuhoola khweinyanza, shinga obuyoka bwomukanda omukhongo kwabelihe khandi shinga okhukukuma khwomwoyo okwa OMWAMI Nyasaye omwene mahe. Olwa biasinjila, biakalusia tsimbaha tsiabio halala.

²⁵Mana nembulila omwoyo okhurula hekulu weshindu shiali shinga likulu eshio, eshiali hekulu wemirwe chiebilonje ebio.

²⁶Ndalola eshindu shinga eshifumbi shioburuchi, eshifwana shinga isapiri nishili hekulu weshindu shinga likulu eshio, ne khwikulu khwashio, eshindu shiali nishiikhaalekhwo eshiafwana shinga omundu.

²⁷Okhurula mushishienje shiashio okhutsia hekulu womubili kwashio, ndalola eshindu eshing'inang'anu shinga omukasa, khandi shinga omulilo nikwangaale khutsimbeka tsiashio tsiosi. Ne okhurula mushishienje shiashio okhukalukha hasi washio ndalola eshindu shiafwana shinga omulilo okwangaale khutsimbeka tsiashio tsiosi.

²⁸Obung'inang'inu bwashio bwafwana shinga olulindi niluli mwileesi khunyanga yeifula khutsimbeka tsiashio tsiosi. Nolwa obukondo bwoluyali lwa OMWAMI Nyasaye bwafwana burio. Olwa ndalola obulafu obwo, ndakwa hasi mafumama, ne nimbulila omundu naboola.