Read wanga EZEKIELI 10 Bible Online

EZEKIELI 10 - wanga bible

EZEKIELI 10

¹Mana nehenga hekulu wemirwe chiebilonje bietsimbaha ebio, nendola eshindu shiafwana shinga lichina lieisapiri, khandi shinga eshifumbi shioburuchi.

²Mana Nyasaye naboolela omundu wali nafwalile tsingubo tsiekitani oyo ari, “Tsia hakari wamakurutumu, kabootokhananga kali hasi webilonje ebio ako, okhanye amanda komulilo okhurula hakari webilonje tsana, mana okasalaasie mwitookho.” Kho omundu oyo niyenjilamwo nendeerekhwo tsimoni.

³Olwa omundu oyo yenjilamwo, ebilonje ebio biali nibisinjiile khulubeka lwemulambo weihekalu, nalio lileesi nilitsuule mulwanyi lwomukari weihekalu.

⁴Oluyali lwa OMWAMI Nyasaye niluchinguukha hekulu okhurula khubilonje ebio okhuula khushilama shie Ihekalu, ne Ihekalu niyitsulamwo lileesi, nalwo olwanyi nilwitsulamwo obulafu bwoluyali lwa OMWAMI Nyasaye.

⁵Khandi okhukukuma khwetsimbaha tsiebilonje ebio khwahulilikha okhuula mulwanyi lwelwanyi, okhukukuma okhwo khwali shinga omwoyo kwa Nyasaye Owobunyali Bwosi.

⁶Ne olwa yalaka omundu wali nafwalile tsingubo tsieikitani oyo ari, “Bukula omulilo okhurula hakari wamakurutumu kabotokhananga ako, hakari webilonje bili netsimbaha ebio,” yatsia mukari, nasinjila mulubafu olwali khumakurutumu ako.

⁷Eshilonje eshio nishinyiila omukhono kwashio okhurula hakari webilonje bindi okhuula khumulilo okwali hakari webilonje ebio. Kho nishibukulakhwo omulilo mutiiti, nishira mumukhono kwomundu wali niyefwalile tsingubo tsieikitani oyo. Naye nakubukula, ne narula elwanyi.

⁸Ebilonje ebio bifwana shinga omukhono kwomundu hasi wetsimbaha tsiabio.

⁹Mana nehenga, ne lola, amakurutumu kane kali mumbafu webilonje ebio. Buli eshilonje shiali nelikurutumu elala mumbafu washio. Amakurutumu ako kafwana shinga oruchina orung'inang'inu rwobukusi.

¹⁰Amakurutumu ako kane kali kobukondo bulala koosi, ne buli likurutumu lialolekha shinga elili mulindi.

¹¹Amakurutumu ako olwa kabotokhananga, kabotokhananga nikatsia tsimbeka tsiosi halali okhushiukhana ta. Hosi hosi aha eliambeli liatsitsanga akandi koosi kalondangakhwo shilunji.

¹²Emibili chiebilonje ebio, nende emikongo chiabio, nende emikhono chiabio, nende tsimbaha tsiabio, nende emikurutumu chiabio, biosi biali biitsulekhwo tsimoni.

¹³Ndahulila omwoyo nikulanjilisinjia nikumboolela mbu amakurutumu kalangwa mbu amakurutumu akabotokhananga.

¹⁴Buli eshilonje eshio shiali nobweni bune. Obweni bwambeli bwali bweisurusi, obwakhabili bwali bwomundu, obwakhataru bwali bweitalanyi, nabwo bwakhane bwali bweindutsu.

¹⁵Mana ebilonje biali netsimbaha ebio nibichinguukha ikulu, (ebilonje ebio nebia ndali ninduutsi khumwalo kwa Kebari).

¹⁶Ne olwa biachendanga nibitsia, amakurutumu ako koosi katsitsanga ninabio. Buli olwa biabambulanga tsimbaha tsiabio okhupulukha ikulu, amakurutumu ako koosi katsitsanga ninabio.

¹⁷Buli olwa ebilonje ebio biasinjilanga, amakurutumu ako koosi kasinjilanga. Ne buli olwa biapulukhanga, amakurutumu ako kalondananga ninabio, okhuba roho yebilonje bili mwoyo ebio yali muko.

¹⁸Mana oluyali olwa OMWAMI Nyasaye nilurula khushitsafu shieihekalu, nilusinjila khubilonje ebio.

¹⁹Ebilonje ebio nibibambula tsimbaha tsiabio, nibipulukha okhurula hasi nibitsia mwikulu nenderekhwo tsimoni, amakurutumu nako koosi kaloondakhwo nikelelile mumbafu mwabio. Mana nibisinjila habwinjililo weshiliibwa shiebukwe weihekalu eya OMWAMI Nyasaye. Nalwo oluyali lwa Nyasaye wa Isiraeli lwali khubio.

²⁰Mana nemanyilisia mbu, ebio nibio ebilonje bili mwoyo, ebia ndali ninduutsi hasi wa Nyasaye wa Isiraeli, khumwalo kwa Kebari.

²¹Buli eshilonje shiali nobweni bune nende tsimbaha tsine. Ne hasi wa buli olubaha, shialiho eshiafwana shinga amakhono komundu.

²²Ne obweni bwabio bwafwana butswa shinga obwa ndali ninduutsinji khumwalo kwa Kebari. Buli eshilonje shiatsia imbeli shilunji.