Read wanga EZEKIELI 11 Bible Online

EZEKIELI 11 - wanga bible

EZEKIELI 11

¹Roho wa Nyasaye niyanjinga hekulu, niyambila khushiliibwa eshili elubeka lwebukwe we Ihekalu ya OMWAMI Nyasaye. Ne habwinjililo yaho ndalolaho abasaatsa amakhumi kabili nabarano. Mubasaatsa abo balimwo, Yaazania omusiani wa Azuri, nende Pelatia omusiani wa Benaya, abali abemislisi ba Isiraeli.

²Mana Nyasaye niyamboolela ari, “Mwana womundu, bano nibo abakholanga obumayanu khandi abahananga ameebalo kalali kahabwene ta mwitookho lino.

³Nibo ababoolanga bari, ‘Ebise biokhumbakha tsinzu bishili okhuula. Litookho lino lili shinga inunjilo, nefu khuli shinga inyama, nebutswa likhutetsanga okhurula khumulilo.’

⁴Khulweshio iwe mwana womundu, rumbula obulakusi nobafukula.”

⁵Mana Roho owa OMWAMI Nyasaye niyanzitsamwo niyamboolela mbu ebaboolele endi, “Inywe abandu ba Isaraeli, emanyile akamupaaraanga khandi akamuloosinjia okhukhola.

⁶Inywe mwayerire abandu abanji muno mwitookho lino, nimwitsusia emilambo khumihanda chialio.

⁷Khulweshio isie OMWAMI Nyasaye emboola mbu, eshitsayi shiamwaratsia mwitookho lino nishio inyama, nalio litookho lino nilio inunjilo. Nebutswa inywe mularusibwamwo nemura mumakhono kabamahanga kandi.

⁸Inywe mwaria okhumululwa nolukanga, nebutswa ndalareera olunga okhubamulula. Nolwa isie OMWAMI Nyasaye emboola.

⁹Khandi ndalabarusia mwitookho elo, nebara mumakhono kabamahanga kandi. Ebakhalachiile eshiina shiokhufwa.

¹⁰Mulamululwa mwihe, mushialo shienywe shiene. Mana buli mundu alamanya mbu isie nisie OMWAMI Nyasaye.

¹¹Litookho lino shililabakhwo khandi inunjilo yenywe ta, nenywe shimulabakhwo inyama mulio ta. Ndalabakhalachila eshiina khulwakho lwa Isiraeli.

¹²Nenyu mulamanya mbu isie nisie OMWAMI Nyasaye, okhuba shimwaloonda amalako kanje tawe. Nebutswa mwaloonda amalako kamahanga kandi akamubotokhana.”

¹³Ne olwa ndali nerumbulanga obulakusi, Pelatia, omusiani wa Benaya yafwa. Nasi nengwa hasi mafumama, nehabila OMWAMI Nyasaye nomwoyo omukhongo nemboola endi, “OMWAMI Nyasaye, nokhamalile elala abandu boosi abasikala mu Isiraeli noho?”

¹⁴OMWAMI Nyasaye niyamboolela ari,

¹⁵“Mwana womundu, abo abamenya mu Yerusalemu baboolanga khubaana benywe, abaana benywe beene, abahambe bashio, khandi aboluyia lwa Isiraeli boosi bari, ‘Abahambe bali ehale muno, shibanyala okhumwinamila OMWAMI Nyasaye tawe. OMWAMI Nyasaye yakhuha eshialo shino mbu shibe obulaame bwefwe.’

¹⁶Khulweshio obaboolele mbu, OMWAMI Nyasaye aboola ari: ‘Kata nemba nindababukula nebayila ehale mumahanga kandi, nende okhubasalaasia mubialo bindi, eshili butswa ninabo ewa bali eyo.’

¹⁷Khulweshio baboolele mbu, isie OMWAMI Nyasaye emboola mbu, ndakhamukhung'asie inywe okhurula mumahanga, nebareera halala okhurula mubialo bia mwasalaasibwamwo, ne ndakhamukalusilie eshialo shienywe shia Isiraeli.

¹⁸Ne olwa bakhachelesibwemwo, bakharusiemwo akobumayanu nende akebisinyo kosi aka balinyoolamwo.

¹⁹Khandi ndakhabaremwo omwoyo omuyiakha nende amapaaro amayiakha. Ndakhabarusiemwo omwoyo omuumilanu okuli shinga lichina, nebahelesia omwoyo kwobuhulili.

²⁰Mana bakhalonde amalako kanje nende okhutiila amalachilisio kanje. Bakhabe abandu banje nasi ndakhabe Nyasaye wabwe.

²¹Nebutswa abo abenamilanga ebifwanani ebimayanu khandi bieshisinyo, ndakhabahelesie eshinyasio okhulondana nende ebikhole biabwe. Nolwa isie OMWAMI Nyasaye emboola.”

²²Mana ebilonje ebio nibichinguula tsimbaha tsiabio, nako amakurutumu nikeleela mumbafu mwabio. Oluyali olwa OMWAMI Nyasaye wa Isiraeli lwali khubio.

²³Mana oluyali olwa OMWAMI Nyasaye niluchinguukha hekulu okhurula hakari welitookho, nilutsia nilusinjila khushikulu eshiali ebukwe welitookho.

²⁴Nendi mwilolelo elo, Roho wa OMWAMI Nyasaye yanjinguula hekulu, niyambila mushialo shia Babuloni khubandu bali nibaliyo mubuhambe. Mana amalolelo ako nikakhamiukha.

²⁵Mana nemboolela abahambe koosi aka OMWAMI Nyasaye yali niyamanyiye.