Read wanga EZEKIELI 12 Bible Online

EZEKIELI 12 - wanga bible

EZEKIELI 12

¹OMWAMI Nyasaye yamboolela ari,

²“Mwana womundu, wamenya mubandu abakhayi, abali netsimoni, ne shibalolanga ta, bali namarwi kokhuhulila, ne shibahulilanga ta,

³okhuba naboluyia lwobukhayi. Khulweshio, mwana womundu, rechekha emisikochio shinga omundu outsia mubuhambe. Mana orule eshiteere abandu nibareerekhwo tsimoni, otsie shinga outsia mubuhambe. Kata nibali abakhayi, haundi balahulila.

⁴Obohe emisikochio mushiteere nibalola, mana khungoloobe orule notsia shinga outsia mubuhambe.

⁵Ofutule eshibanga mwisiisi lieinzuyo nibalolanga, mana obiriremwo norula elwanyi.

⁶Wituushe emisiikochio khwibeka mushilo, mana ochirusie elwanyi nibalola. Wifuunishe obwenibwo oleshe okhulolakhwo ewotsitsanga. Okhuba ekhukholile iwe okhuba eshilolelo khubandu boluyia lwa Isiraeli.”

⁷Mana nekhola shinga olwa OMWAMI Nyasaye yali niyandachilisiye. Ndarusia emisiiko chianje elwanyi eshiteere shinga outsia mubuhambe, ne khungoloobe neyaba eshibanga mwisiisi namakhono kanje omwene. Mana rerula elwanyi mushiilima nenjinjile emisiiko chianje khumabeka kanje abandu nibareerekhwo tsimoni.

⁸Inyanga yalondakhwo mumabwibwi, OMWAMI Nyasaye yamboolela ari,

⁹“Mwana womundu, abandu ba Isiraeli, abakhayi abo, olwa bakhureeba mbu, eshiokholanga shino nishiina?

¹⁰Obaboolele mbu, isie OMWAMI Nyasaye emboola mbu, oburume buno nobwomuruchi welitookho lia Yerusalemu nende abandu boosi boluyia lwa Isiraeli abamenyangamwo.

¹¹Baboolele mbu, iwe oli eshilolelo khubo, okhuba shinga lwokholile, nolwa kalaba kario khubo. Balatiilwa nibayilwa mubuhambe.

¹²Omuruchi wabwe welitookho aletuukha emisiikochie khumabekake mushiilima. Alafutula eshibanga mwisiisi mana arulilemwo natsia elwanyi. Alefuunikha obwenibwe mbu aleshe okhulolakhwo eshialo shiatsitsangamwo tawe.

¹³Nasi ndalabaambula olukhanda lwanje, naye alatiilwa nomureko kwanje. Ndalamuyila mushialo shia abandu ba Babuloni, ewa alafwila nashili okhushilolakhwo tawe.

¹⁴Ndalasalaasia abalondibe boosi, abachetsiyibe nende abalindibe boosi mutsimbeka tsiosi. Khandi ndalabamulula nolukanga boosi pe.

¹⁵Ne olwa embasalaasia mumahanga kandi nende mubialo bindi, nolwa balamanya mbu, isie nisie OMWAMI Nyasaye.

¹⁶Nebutswa ndalahonokosiakhwo batiiti khubo baleshe okhumululwa nolukanga, noho inzala noho olumbe, kho mbu bakhakhole obuloli khubamahanga kabatsiamwo, khukebisinyo kabakhola. Mana bakhamanye mbu isie nisie OMWAMI Nyasaye.”

¹⁷Khandi OMWAMI Nyasaye niyamboolela ari,

¹⁸“Mwana womundu, lia eshiokhuliashio notechela, khandi onywe amaatsi norenga khulwoburii.

¹⁹Oboolele abandu belihanga elo boosi mbu, aka OMWAMI Nyasaye aboola khubandu beshialo shia Isiraeli, abamenyanga mwitookho lia Yerusalemu ngakano mbu, balalia eshiokhulia shiabwe nibatechela, khandi balanywa amaatsi kabwe nibarenga khulwa oburi. Eshialo shiabwe shilarusibwamwo buli shindu shilimwo, khulwa okhubeela akeinduli kabandu boosi abamenyangamwo bakhola.

²⁰Khandi amatookho kabandu bamenyangamwo kalalikululwa, nashio eshialo shiabwe shilakwisibwa likunda. Nolwa mulamanya mbu, isie nisie OMWAMI Nyasaye.”

²¹OMWAMI Nyasaye niyareeba ari,

²²“Mwana womundu, shichila shiina abandu ba Isiraeli baboolanga oluchelo luno nibakalushila bari, ‘Tsinyanga tsitsanga nitsibira, nebutswa amalolelo komulakusi shikoosibungwa ta?’

²³Kho baboolele mbu, OMWAMI Nyasaye aboola mbu, alaakamia oluchelo olwo, ne shilularumbulwakhwo khandi mushialo shia Isiraeli tawe. Nebutswa obaboolele mbu, tsinyanga tsiulile, ne buli lilolelo liloosibwa.

²⁴Okhuba shikhulabakhwoho namalolelo kobubeeyi kata obufumu bwobubeeyi muboluyia lwa Isiraeli khandi tawe.

²⁵Nebutswa aka isie OMWAMI Nysaye ndakharumbule, niko kakhekholeshe. Ne shikalashiindakhwo khandi okhwikholekha tawe. Inywe aboluyia lwobukhayi, mwakhalole netsimoni tsienywe akandakharumbule nikekholekha. Nolwa isie OMWAMI Nyasaye emboola.”

²⁶Khandi OMWAMI Nyasaye niyamboolela ari,

²⁷“Mwana womundu, lola, aboluyia lwa Isiraeli baboolanga bari, ‘Lilolelo liomulakusi alolanga neliemiyika echitsanga, khandi arumbulanga obulakusi obwakhoosibwe mutsinyanga tsiakhetse khale muno.’

²⁸Khulweshio obaboolele mbu, isie OMWAMI Nyasaye emboola mbu, libulaho kata elala khumakhuwa kanje elilashiinda okhuusibwa. Nebutswa buli likhuwa liemboola liloosibwa. Nolwa isie OMWAMI Nyasaye emboola.”