Read wanga EZEKIELI 13 Bible Online

EZEKIELI 13 - wanga bible

EZEKIELI 13

¹OMWAMI Nyasaye yamboolela ari,

²“Mwana womundu, lakulila abalakusi ba Isiraeli, olakulile abalakulanga okhulondana nende amapaaro kabwe abeene noboola ori, ‘Hulile aka OMWAMI Nyasaye aboola!’

³Isie OMWAMI Nyasaye emboola mbu, abalakusi abasilu abalondanga akabwe abeene, bali mushilaamo shiobubi, shibulaho eshia mulolanga tawe.

⁴Inywe abandu ba Isiraeli, abalakusi benywe bali shinga amabwe kachendachendanga mumayindi kelitookho lialikululwa.

⁵Shibaatikulukha okhutsia okhuliinda ebibanga bietsingoba tsialikululwa ta, kata shibombashilanga Isiraeli khandi tsingoba tsietsinzu tsiabwe, kho mbu baleshe okhumululwa khunyanga yeinduukho eya OMWAMI Nyasaye tawe.

⁶Amalolelo kabwe nikobubeeyi butswa, khandi obulakusi bwabwe shibuli bwobwatoto ta. Beyitsialanga mbu baboolanga aka isie OMWAMI Nyasaye embarumile. Nebutswa isie shindabarumakhwo ta, habula benyanga mbu embe nekholanga aka baboolanga.

⁷Nasi embareebanga endi, ‘Amalolelo kenywe shikali butswa akobubeeyi, kata obulakusi bwenywe shinobwobwikaati butswa? Inywe muboolanga mbu mulakulanga muliira lianje, nebuswa isie shindaboolakhwo ninenywe tawe.’ ”

⁸“Khulweshio, isie OMWAMI Nyasaye emboola mbu, amakhuwa kenywe namakhaya, ne khandi amalolelo kenywe nikobubeeyi butswa. Khulweshio lola, isie emufukuule. Nolwa isie OMWAMI Nyasaye emboola.

⁹Ndalanyiila omukhono kwanje okhufukula abalakusi abalolanga amalolelo kabutswa khandi nibalakula akobubeeyi. Shinababekhwo mumukanda kwa abandu banje olwa bakhung'ana ta, kata okhuhandikwa mulwanzilo lwa aboluyia lwa Isiraeli, noho okhwinjila mushialo shia Isiraeli tawe. Ne balamanya mbu, isie nisie OMWAMI Nyasaye.

¹⁰Abalakusi abo bakosinjia abandu banje nibababoolela bari, ‘Khuli nomulembe,’ olwomulembe kuba nikubulaho. Abandu banje bombakha lisiisi liteshele, nabo abalakusi abo nibalibakha olufuyo.

¹¹Bulano tsia oboolele ababakhanga lisiisi olufuyo abo mbu lisiisi elo lilakwisibwa. Ndalareera ifula yolucheka, yamachina nende imbumbuyeka.

¹²Olwa lisiisi elo liakhakwisibwe, abandu shibakhareebekhwo mbu, olufuyo lwamwabakha khwisiisi tsana luliheena?

¹³Khulweshio, isie OMWAMI Nyasaye emboola mbu, mwiruma lianje ndalareera imbumbuyeka, ifula yolucheka nende amachina okhukwisia lisiisi elo.

¹⁴Ndakhalikululile elala lisiisi liamwabakha olufuyo elo, ne olwanzilo lwalio lwakhatonye olukhaya. Olwa lisiisi elo likwisibwa, mwesi mwakhasishilemwo. Ne mwakhamanye mbu isie nisie OMWAMI Nyasaye.

¹⁵Nolwa ndakhamalile liruma lianje liosi khwisiisi elo halala nende abalakusi abalibakha olufuyo abo. Ne ndakhamuboolele mbu, lisiisi shilishiliho khandi ta, kata abalibakha olufuyo boosi shibashiliho khandi tawe.

¹⁶Abalakusi ba Isiraeli abalakula khu Yerusalemu nende okhulola amalolelo komulembe okulaliho ta shibashiliho khandi tawe. Nolwa isie OMWAMI Nyasaye emboola.”

¹⁷OMWAMI Nyasaye aboola ari, “Bulano, mwana womundu, rakhwo omwoyo okhulakula nofukula abakhasi bomwihangalio, abalakulanga akamapaaro kabwe abeene.

¹⁸Obaboolele mbu, isie OMWAMI Nyasaye emboola mbu, bali mushilaamo shiobubi abakhasi abanabilanga abandu tsiriisi tsiokhuboha khumukhono nende tsiokhubitambaya biokhumirwe okhulondana nende obukhongo bwemirwe chiabwe khulwa okhuhamba obulamu bwabwe. Mupaaranga mbu, mulahamba obulamu bwabandu banje, ne nimuhonokosia obulamu bwabandu bandi khulwa okhwinyoolela abeene inganga?

¹⁹Mwaafwola isie imbeli wabandu banje kho mbu muhebwe ishayiri indutu mufusi nende ebitonye bitutu biomukaate. Mwiranga ababula eshikha nimulekha abakwanile okhwirwa. Mukaatinjia abandu banje abahulilanga obubeeyi bwenywe.

²⁰“Khulweshio, isie OMWAMI Nyasaye emboola mbu, efukula tsiriisi tsienywe tsiamwikhoonyelanga okhuhamba obulamu bwabandu banje. Ndalatsikhalaka tsirule khumikhono chienywe nende okhukhola abandu bamwahamba abo babe abelekhuule shinga amanyonyi.

²¹Khandi ndalarandula ebitambaya bienywe biokhumirwe nekhola abandu banje okhuba abalekhuule, shibakhabekhwo khandi eshioluyitsi khwinywe tawe. Nolwa mulamanya mbu, isie nisie OMWAMI Nyasaye.

²²Okhuba mwafwisia emioyo chiabalunjishi khulwa obubeeyi bwenywe, kata olwa isie ndalaabafwisiakhwo emioyo tawe. Mwatinyisia abamayanu mbu batsililile okhukhola obumayanu bwabwe nibalahonokosia obulamu bwabwe ta.

²³Khulweshio, shimulalolakhwo khandi amalolelo amakhaya ako, kata okhulakulakhwo kobubeeyi ako tawe. Ndalakhola abandu banje okhuba abalekhuule okhurula mumakhono kenywe. Nolwa mulamanya mbu, isie nisie OMWAMI Nyasaye.”