Read wanga EZEKIELI 14 Bible Online

EZEKIELI 14 - wanga bible

EZEKIELI 14

¹Olundi balala khubemilisi ba Isiraeli betsa okhuureeba mbu bamanye akokhwenya khwa Nyasaye.

²Mana OMWAMI Nyasaye niyamboolela ari,

³“Mwana womundu, abandu bano bareere emioyo chiabwe khukhwinamila ebifwanani, nibara eshisichirasio shiobumayanu bwabwe imbeli wabwe. Opaara mbu isie enyala okhufuchilila okhubahelesia likalusio?

⁴Khulweshio baboolele mbu, isie OMWAMI Nyasaye emboola mbu, omundu yesi yesi khuboluyia lwa Isiraeli, oura omwoyokwe khukhwinamila ebifwanani, nara eshisichirasio shiobumayanubwe imbeliwe, ne niyetsa khumulakusi okhureeba mbu amanye akokhwenya khwanje, isie omwene ndalamuhelesia likalusio, okhulondana nende obunji bwebifwanani bia ali ninabio.

⁵Ndalakhola aboluyia lwa Isiraeli abo boosi, abashiama nibaarulakhwo khulwa okhwinamila ebifwanani bangalushile.

⁶“Khulweshio boolela aboluyia lwa Isiraeli mbu, isie OMWAMI Nyasaye emboola mbu, mwikalukhasie muleshe okhwinamila ebifwanani bienywe ebio. Khandi muleshe kebisinyo kenywe ako.

⁷Okhuba omundu yesi yesi khu aboluyia lwa Isiraeli, noho khubarende abamenyanga mushialo shia Isiraeli, oushiukhana niyarulakhwo, nara omwoyokwe khu khwinamila ebifwanani nende okhura eshisichirasio imbeliwe, ne niyetsa khumulakusi mbu amanye akokhwenya khwanje, isie omwene ndalamuhelesia likalusio.

⁸Isie ndalamufukula, nimukhola okhuba eshilolelo khandi owokhutseshelelwa nende okhumusishia okhurula mubandu banje. Nolwa mulamanya mbu isie nisie OMWAMI Nyasaye.

⁹Ne omulakusi oyo naba nakaatibwa ne naboola likhuwa, kho isie ndalaba nengatiiye omulakusi oyo. Ndalanyiila omukhono kwanje nimumalilana nende okhumurusia mubandu banje ba Isiraeli.

¹⁰Bosi babili, omulakusi oyo nende ouba niyetsile okhureeba mbu amanye akokhwenya khwanje, balahebwa eshinyasio shilala eshio.

¹¹Ndalakhola endio kho mbu aboluyia lwa Isiraeli baleshe khandi okhushiama nibaarulakhwo, kata okhwifwabia abeene khandi nobumayanu bwabwe. Nebutswa ndalakhola endio kho mbu, babe abandu abanje, nasi embe Nyasaye wabwe. Nolwa isie OMWAMI Nyasaye emboola.”

¹²Khandi OMWAMI Nyasaye niyamboolela ari,

¹³“Mwana womundu, lihanga niliba nilionoona khulwa okhubula obwisiikwa khwisie, ndalanyiila omukhono kwanje nelihelesia eshinyasio. Ndalasasia ebiachi bialio biosi nelireerera inzala, nende okhumulula abandu balio nende tsisolo tsialio tsiosi.

¹⁴Kata bataru bano, Nuwa, Danieli nende Ayubu nibakhabeele mbu bosi balimwo, bakhahonokosiye obulamu bwabwe abeene khulwa obulunjishi bwabwe. Nolwa isie OMWAMI Nyasaye emboola.

¹⁵Ne nimba nendeera tsisolo nabulimo mwihanga liabwe elo okhumulula abandu balio, nende okhulikwisia likunda, kho mbu omundu yesi yesi aleshe okhubiramwo khulwa okhuria tsisolo nabulimo etsio,

¹⁶kata bataru abo nibakhabeele mbu bali mwihanga elo, shinga olwa endiho mwoyo, shibakhahonokosiyekhwo abaana babwe abasiani kata abakhaana tawe. Bakhehonokosiye butswa abeene bonyene. Nebutswa eshialo shiabwe shiakhakwisibwe likunda.

¹⁷“Ne nemba nindeera lihe mushialo eshio nende okhumulula nolukanga abandu nende tsisolo,

¹⁸kata bataru abo nibakhabeele mbu bali mwihanga elo, shinga olwa endiho mwoyo, shibakhahonokosiyekhwo abaana babwe abasiani kata abakhaana tawe. Bakhahonokosiye butswa obulamu bwabwe abeene bonyene.

¹⁹Ne khandi nimba nindeera olumbe mushialo eshio, mana emulule abandu nende tsisolo mwiruma lianje,

²⁰kata Nuwa, Danieli nende Ayubu nibakhabeele mbu bali mwihanga elo, shinga olwa endiho mwoyo, shibakhahonokosiyekhwo abaana babwe abasiani kata abakhaana tawe. Bakhahonokosiye butswa obulamu bwabwe abeene khulwa obulinjishi bwabwe.

²¹“Okhuba isie OMWAMI Nyasaye emboola mbu, kakhabe akokhuchenyia muno, olwa ndakhareere eshinyasio eshilulu shia amasila kane kano, lihe, inzala, tsisolo tsimbalaba, nende olumbe khwitookho lia Yerusalemu, khulwa okhumulula abandu nende tsisolo!

²²Ne kata kario, nibaba nibakhatonyekhomwo abehonokoshe nibareera abaana babwe abasiani nabakhaana khwiwe, iwe Ezekieli wakhalole shinga olwa abaana babwe abo bosi bali abamayanu muno. Nawe wakhafuchilile mbu, eshinyaasio shianje khwitookho lia Yerusalemu shiali shia habwene.

²³Injenda yabwe nende ebikhole biabwe ebibi ebio biakhachile wafuchilila mbu, amatinyu ka ndareera khwitookho elo, kali akakhoyele. Nolwa isie OMWAMI Nyasaye emboola.”