Read wanga EZEKIELI 16 Bible Online

EZEKIELI 16 - wanga bible

EZEKIELI 16

¹Khandi OMWAMI Nyasaye niyamboolela ari,

²“Mwana womundu, boolela abandu belitookho lia Yerusalemu akebisinyo kabakholanga.

³Obaboolele mbu, isie OMWAMI Nyasaye emboola khu Yerusalemu mbu, owoli wolwibulo lwa Abakanani, Papawo yali Omumori, naye mamawo yali Omuhiti.

⁴Inyanga yawebulilwakhwo, shiwakhalakwakhwo olulelalwo, kata okhusingwakhwo namaatsi tawe. Kata shiwabakhwakhwo omunyu kata okhufwalwakhwo tsingubo tsiabaana tawe.

⁵Abulaho owakhulolelakhwo eshisa kata okhukhubeelelela mbu akhukholelekhwo kata elala khumakhuwa ako tawe. Nebutswa wafuubwa butswa mwiswa, okhuba wasinyisia abandu muno inyanga yawebulilwakhwo.

⁶“Ne olwa ndabira aha wali, ndalola nokalakalanga mumatsaayiko, ne nekhuboolela endi, ‘Lamukha,

⁷okhule shinga omusaala mumukunda.’ Mana nokhula noba omurambi niwikhola omukhaana. Nomela tsimbeele, nalio liswilio nilikhula. Nebutswa wali butswa shichula.

⁸“Olwa ndabira aha wali khandi, ndalola nokubuye, ne noshili butswa shichula. Kho nembambula ingubo yanje nefuunikha eshiechenyeshio. Ndakhola ninawe indakano nekhusuubisia mbu ndalakhuteshia obe owanje. Nolwa isie OMWAMI Nyasaye emboola.

⁹Ndakhusinga namaatsi mana nekhwoosia amatsaayi, khandi nekhubakha amafura.

¹⁰Ndakhufwala tsingubo tsindayi tsie ikitani indorotoro, nekhufwala ebilaaro. Khandi ndakhuboha eshitambaya eshing'inang'inu khumurwe.

¹¹Ndakhusiaha nebimili, nekhufwala emikasa khumikhonochio nende tsinyolo mwikosilio.

¹²Ndakhufwala ingaka khumooluko nende ebitati khumarwiko, khandi nikhufwala olusimbi olulayi khumurwekwo.

¹³Khulweshio wasiahwa nebisiaho bieitsahabu, ifetsa nende ingubo yeikitani indorotoro khandi eyang'oonwa obulayi. Walia eshiokhulia eshilayi eshiakasibwa okhurula khubusie obunyushe, obuushi nende amafura. Wakhula niwikhola okhuba owelikondo lilayi muno khandi noba omukhaye oukhoyeele omuruchi.

¹⁴Oluyalilwo lwasalaana mumahanga kandi koosi khulwa likondolio lilayi, shichila nisie owakhukhola okhuba omulayi orio. Nolwa isie OMWAMI Nyasaye emboola.”

¹⁵“Nebutswa wesika likondolio lilayi, ne nokhola obutamba nende buli mundu owabira aha wali.

¹⁶Wabukula khubifwalobio nobiikhoonyela okhusiaha habunduwo hokhwinamila Nyasaye, ne nokholelaho obutamba nende buli omundu. Likhuwa shinga elo lishili okhwikholekhakhwo, ne khandi shiliakhekholeshekhwo kata nahatutu tawe.

¹⁷Wabukula ebimilibio ebing'inang'inu bieitsahabu nende bieifetsa ebia ndali nekhuhelesiye, niwikaasilia ebifwanani bieshisaatsa, ne nokhola obutamba ninabio.

¹⁸Khandi nobukula tsingubo tsiang'oonwa obulayi tsia ndali nekhuhelesiye, nofuunikha ebifwanani ebio. Ne nobukula amafura keshing'ari nende obubane, ebia ndali nekhuhelesiye nohaana khubifwanani ebio.

¹⁹Khandi nobukula eshiokhulia eshilayi, eshiakasibwa okhurula khubusie obunyushe, amafura nende obuushi, eshia ndali nekhuhelesiye okhulia, noshihaana khubifwanani ebio khulwa okhubichamisia. Nolwa isie OMWAMI Nyasaye emboola.

²⁰“Khandi wabukula abaanabo abakhaana nende abasiani ba wali niwanzibulila, nobahaana shinga omusango omusambe khubifwanani ebio. Opaara mbu wali habwene okhukhola obutamba obwo?

²¹Opaara mbu wali habwene okhusinza abaana banje nende okhubahaana shinga omusango omusambe khubifwanani ebio?

²²Khandi mukhukhola kebisinyo ako koosi nende obutambabwo, shiwayetsulilakhwo tsinyanga tsia wali omubuukha, noli shichula, khandi nokalakalanga mumatsayiko tawe.”

²³“Isie OMWAMI Nyasaye emboola mbu, iwe Yerusalemu, oli mushilaamo shiobubi! Oli mushilaamo shiobubi! Olunyuma lwokhukhola kobumayanu ako koosi,

²⁴weyumbashila ebimalilo biemisango buli habundu hachinguukhu nokhola obutamba mu buli olwanyi.

²⁵Buli hamasanganjira weyumbashilaho eshimalilo shiemisango, nofwola likondolio lilayi khulwa okhukhola obutamba nende buli mundu owabiraho.

²⁶Khandi wakhola obutamba nende abandu beshialo shia Misiri, abamenyanibo bobwikombi, nomeeta okhukhola obutamba ninabo, nobuusia liruma lianje.

²⁷Khulweshio, ndanyiila omukhono kwanje okhukhuhelesia eshinyasio. Ndatutuyia omukabo kweshiokhuliashio, nekhwibala mumakhono kabasukubo, aboluyia lwa Abafilisiti, abasinyisibwa nebikholebio ebimayanu.

²⁸Khandi wakhola obutamba nende abandu ba Asiria, nebutswa shiwanyalikha ta.

²⁹Wameeta okhukhola obutamba nende abokholi bobukhala beshialo shia Babuloni, kata kario shiwanyalikha khandi tawe.

³⁰“Isie OMWAMI Nyasaye emboola mbu, toto mwene oli omutamba. Shiofwimbungwakhwo omurwe okhukhola obutamba kata nahatutu tawe.

³¹Weyumbashila eshimalilo shiemisango buli hamasanganjira nokhola obutamba mu buli olwanyi. Kata kario shiwali shinga omutamba ta, shichila waloba omurungo kwobutamba.

³²Wali omukhasi omutamba owaheya nabasaatsa bandi, nolekha okhuba omwisiikwa khumusaatsawo.

³³Buli lwosi abasaatsa nibo abarunganga abatamba, nebutswa iwe niwe ourunganga abatiabo boosi, nobahelesia ebiomufuusi kho mbu betse khwiwe okhurula tsimbeka tsiosi nokhola ninabo obutamba.

³⁴Kho obutambabwo bwahukhanekhwo nende bwabakhasi bandi. Okhuba abulaho kata mulala owakhuhombelesia okhukhola ninaye obutamba ta, habula iwe wabahelesia omurungo mushilenje shiokhurungwa, niko akachila niwahukhane ninabo.”

³⁵“Kho bulano, iwe Yerusalemu, iwe omutamba! Hulila aka isie OMWAMI Nyasaye emboola.

³⁶Isie OMWAMI Nyasaye emboola mbu, khulwokhuba wefwalula tsingubotsio, niwihaana khubatiabo nende khubifwanani shinga omutamba, khandi khulwa okhuba weera abaanabo noraatsia amatsayi kabwe khulwa okhukholela ebifwanani ebio omusango,

³⁷khulweshio, isie ndalakhung'asia halala abatiabo bakhale, aba wesangasia ninabo, boosi aba wali niwachama nende aba wali niwasila. Ndalabakhung'asia bakhuseere okhurula tsimbeka tsiosi. Khandi ndalakhubakala habulafu mbu balole eshiechenyeshio.

³⁸Mana ndalakhukhalachila eshiina shinga olwa abakhasi abafunakanga ebiitsubo bieindeekho yabwe nibaratsia eshitsayi shiababula eshikha bakhalachilungwa. Khandi mwiruma lianje, ndalakhukhalachila eshinyasio shiokhufwa.

³⁹Ndalakhuhana mumakhono kabatiabo, nabo balalikulula habunduho ahokholelanga obutamba nende okhwinamilaho ebifwanani. Balakhufwalula tsingubotsio, nibakhunuula ebisiayobio nende okhukhulekha shichula.

⁴⁰Balabuusia omukanda kwabandu okhukhuseera nibakhulasa amachina nende okhukhutonyatonyamwo ebitonye netsinganga tsiabwe.

⁴¹Balasamba tsinzutsio nende okhukhuhelesia eshinyasio imbeli wabakhasi abanji. Ndalakhukhola okhulekha obutamba nende okhurunga ebihanwa khubatiabo.

⁴²Nolwa ndalamalila liruma lianje khwiwe nende okhumala imbalikha yanje khwiwe.

⁴³Ne shichila webilila aka ndakhukholela mutsinyanga tsioburaakabwo, ne niwusinyisia namakhuwa kano koosi, ndalakhurunga okhulondokhana nende amabi kawakhola. Nolwa isie OMWAMI Nyasaye emboola. Eshiachila nomeeta eshifwabwi shiobutamba khukebisinyo kawakhola nishiina?”

⁴⁴OMWAMI Nyasaye aboola ari, “Abandu bakhekhoonyele oluchelo luno khwiwe Yerusalemu nibaboola bari, ‘Omwana welikhanga nilikhanga.’

⁴⁵Iwe oli butswa shinga mamawo. Mamawo yasinyisia omusaatsawe nende abaanabe. Nawe oli omukhaana wabwe abakhaana benywe, abasinyisia abasaatsa babwe nabaana babwe. Mamawo yali omu Hiti naye papawo yali omu Amori.

⁴⁶Omukhaana wenywe omukhulundu niye Samaria, owali niyamenya khulubekalwo lwemasaba halala nabakhaanabe. Naye omukhaana wenywe omushe niye Sodomu, owali niyamenya khulubekalwo lwemulambo halala nabakhaanabe.

⁴⁷Ne kata kario, shikakhuhela okhulonda injenda yabwe kata okhukhola akebisinyo kabwe ta, habula mubise bitutu, wali omumayanu muno mubikholebio biosi okhushila bo.

⁴⁸Isie shinga olwa eshiliho mwoyo, toto mwene, eshili okhulolakhwo omukhaana wenywe Sodomu nabakhaanabe nibakhola aka iwe nabakhaanabo mwakhola.

⁴⁹Lola, obubi bwomukhaana wenywe Sodomu yakhola mbwobuno, ye halala nabakhaanabe beyitsiala olwa bali neinzikura khandi nibarabaala obulayi, ne nibebilila okhukhoonya abamanani nende abatakha.

⁵⁰Beyitsiala nibakhola kebisinyo imbeli wanje. Khulweshio ndabasasia olwa ndalola amakhuwa ako.

⁵¹Nabo abandu ba Samaria shibaakholakhwo kata inusu yobwonooni bwa inywe mwakhola tawe. Inywe mwakhola obwonooni obunji okhushila abakhaana benywe. Inywe mwakhola bo okhulolekha abalunjishi khulwa obwonooni bwa mwakhola.

⁵²Khulweshio, inywe beene muletuukha eshifimbwa murwe shienywe, okhuba obwonooni bwenywe nobubi muno okhushila bwabakhaana benywe. Bubakholile bo nende obwonooni bwabwe okhulolekha shinga abalalikhwo neshikha shiosi shiosi tawe. Kho mufwimbwe omurwe, okhuba mukholile abakhaana benywe okhulolekha shinga ababula eshikha.”

⁵³OMWAMI Nyasaye aboola ari, “Ndakhakalusilie litookho lia Sodomu netsingongo tsialio tsikhabi tsiabwe. Khandi ndakhakalusilie litookho lia Samaria netsingongo tsialio tsikhabi tsiabwe. Khandi ndakhakhukalusilie iwe Yerusalemu tsikhabitsio imbeli wako.

⁵⁴Omwene wakhetuushe obumayanubwo nofwimbwa omurwe khulwa ebikholebio. Eshifwimbwa murweshio shiakhachile abakhaana benywe baloleshe shinga abalikhwo obulayi okhushila iwe.

⁵⁵Abakhaana benywe, Sodomu nende Samaria halala nabakhaana babwe, bakhakalusibwe shinga olwa balinji khale. Nawe wesi halala nabakhaana benywe mwakhakalusibwe shinga olwa mwalinji khale.

⁵⁶Olwa obumayanubwo bwali nibushili okhubakalwa habulafu, wachaaya omukhaana wenywe Sodomu, niwichinjimisia imbeliwe.

⁵⁷Bulaano iwe wamalile okhukwa inzekho khubakhaana beshialo shia Edomu nende abamenyani babwe boosi. Khandi abakhaana beshialo eshia Abafilisiti, abamenyanibo bakhutseshelelanga.

⁵⁸Okhuula iwe omwene onyakhane khulwa injendayo imbi nende obumayanubwo bwa wakhola. Nolwa isie OMWAMI Nyasaye emboola.”

⁵⁹OMWAMI Nyasaye aboola ari, “Ndakhakhukholele iwe Yerusalemu, shinga lwokhoyile okhukholelwa, okhuba iwe wachaaya ebiitsubobio, nofunaka indakano yanje.

⁶⁰Nebutswa isie ndakhetsulile indakano ya khwakhola ninawe noshili omuraaka. Khandi ndakhakhole ninawe indakano yeinziayo.

⁶¹Mana wakhetsulile injendayo, nende okhufwimbwa omurwe olwa ndakhabukule abakhaana benywe abakhulundu nende abashe, nekhuhelesia okhuba shinga abakhaanabo. Nebutswa shindakhakhuhelesie abakhaana abo khulwa okhubeela indakano ya ndakhola ninawe tawe.

⁶²Ndakharalisie indakano yanje ninawe, mana wakhamanye mbu, isie nisie OMWAMI Nyasaye.

⁶³Ndakhakhubeele tsimbabasi nende okhukhuleshela obwonoonibwo bwosi. Ne olwa wakhetsulile aka wakhola koosi, wakhafwimbwe omurwe, kata shiwakhaboolekhwo likhuwa liosi liosi tawe. Nolwa isie OMWAMI Nyasaye emboola.”