Read wanga EZEKIELI 17 Bible Online

EZEKIELI 17 - wanga bible

EZEKIELI 17

¹OMWAMI Nyasaye yamboolela ari,

²“Mwana womundu, kaasia oluchelo, mana oboolele aboluyia lwa Isiraeli muluchelo mbu,

³isie OMWAMI Nyasaye emboola mbu, yaliho indutsu yindi ikhoongo muno, yali netsimbaha tsikhongo. Khandi yali namabaha amarambi khandi kobukondo bwahukhane. Indutsu eyo yapulukha niyitsia mubikulu bia Lebanoni, ne niyiyeela khubutenje bwomusaala omusiita.

⁴Yafunaka olusaka lwa namurwe wakwo, niyiluyila mushialo shiabakholi bobukhala, niyilura mwitookho liabwe.

⁵Mana niyibukulakhwo imwo yomushialo omwo, niyiraaka mwiloba linulu lia khumwalo.

⁶Omusaala okwo kwakhula nikwikhola omutsabibu kwarabaala. Amasaka kakwo nikahenga ewa indutsu eyo yali, nachio emisi chiakwo nichiralila mwiloba aha kwali. Kwali namasaka nende amasaafu amanji muno.

⁷“Nebutswa indutsu yindi yikhongo yetsaho, yali netsimbaha tsikhongo nende amabaha amanji muno. Ne lola, omusaala kwomutsabibu okwo kwahenjia emisi chiakwo nende amasaka kakwo aha indutsu eyo yali, mbu kunyoolekhwo amaatsi.

⁸Indutsu eyo niyisiula omutsabibu okwo, niyitsia okhukuraaka mwiloba lilayi aha amaatsi kali amanji, kho mbu kumele amasaka amanji khandi kwame ebiamo nikwikhola omutsabibu omulayi muno muchiosi.

⁹Bulaano, isie OMWAMI Nyasaye ereeba endi, mana omutsabibu okwo kunyala toto okhukhula? Indutsu yambeli eyo shiyilakusiula nende okhurema amasaka kakwo kho mbu kafululushe? Kata shikulenyakhwo amaani amanji noho abandu abanji bokhukusiula tawe.

¹⁰Okhusebukha kulasebukha, nebutswa mana kulakhula? Shikulaniala butswa nikufululukha lwomuyeka kwebukwe kuhutsa nikukusiula okhurula khwiloba lia kwali nikwaraakwakhwo?”

¹¹Mana OMWAMI Nyasaye niyamboolela ari,

¹²“bulaano reeba aboluyia lwabakhayi abo mbu, shimumanyile eshisina shioluchelo olwo ta? Baboolele mbu, omuruchi wa Babuloni yetsa mu Yerusalemu, nabukula omuruchi wamwo nabeemilisibe, nabayila mushialoshie shia Babuloni.

¹³Yabukula mulala khuboluyia lwomuruchi, nakhola indakano ninaye, namulisia eshiitsubo shiokhuba omuhulili. Yabukula abandu boluyali bomushialo omwo nabarusiamwo nabayila ehale mubuhambe,

¹⁴kho mbu oburuchi bweshialo eshio buleshe okhuba namaani nibulechinjimisia ta, ne mbu banyale okhuliinda indakano eya bakhola hakari wabwe ninaye.

¹⁵Nebutswa omuruchi wa Yuda oyo yakhaya, naruma abarume Misiri mbu bahebweyo tsifarasi nende omukanda omukhongo kwabelihe. Mana nanyale? Toto omundu oukhola ario yakhahonokokha okhunyoola eshinyasio? Yakhafunaka indakano mana yahonokokha okhunyoola eshinyasio?

¹⁶Isie OMWAMI Nyasaye nditsuba mbu, olwa emba nendiho mwoyo, omuruchi oyo okhuula afwile mushialo shia Babuloni, shichila yakhaya okhuusia eshitsubo nende indakano yayakhola nende omuruchi wa Babuloni owamwemekha.

¹⁷Kata omuruchi wa Misiri nende omukandakwe kwabelihe bamaani shibalamuhabina mwihe, olwa abandu ba Babuloni babotokhana tsingoba nende amasiisi kabwe okhuseera nibenya okhwira abandu abanji tawe.

¹⁸Toto mwene shialahonokokha eshinyasio ta, okhuba yafwola eshiitsubo shiayanzitsubila ne nafunaka indakano yomwene yali niyakhola hakari wanje ninaye.

¹⁹Khulweshio, isie OMWAMI Nyasaye emboola mbu, olwa emba nendiho mwoyo, eshiitsubo shiayanzitsubila ne nafwola nende indakano yanje eya yafunaka, biakhamubanze omwene.

²⁰Ndalamubaambulakhwo olukhanda lwomureko kwanje, nemuhamba nende okhumuyila Babuloni. Ebweneyo ndalamuhelesia eshinyaasio, khulwa obumayanu bwa yaakholela.

²¹Abelihebe abasitsa balafwila mwihe, nabo abatong'a balasalaasibwa mutsimbeka tsiosi tsieshialo. Nolwa mulamanya mbu, isie, OMWAMI Nyasaye, nisie ouboolile.”

²²OMWAMI Nyasaye naboola ari, “Isie omwene ndalakhalaka enamurwe wolusaka lwomusaala omusiita, ndalakukhalaka enamurwe bwene wa amasaka kashili amatoro, mana omwene ekuraache khubutenje bwolukulu olurambi.

²³Ndalakuraaka khubutenje bwolukulu lwa Isiraeli, kho mbu kumele amasaka nikwama ebiamo, nikwikhola omusaala kwomusiita omulayi omuraabaafu. Tsisolo nabulimo tsietsimbia tsiosi tsilamenyanga hasi wakwo, nako amanyonyi ketsimbia tsiosi kalayeelanga mushinikha shiamasaka kakwo, nikombakhamwo ebitsu biako nikamenyamwo.

²⁴Mana emisaala chiosi chiomubulimo chilamanya mbu, nisie OMWAMI Nyasaye, owimbichitinjia omusaala omurambi, nende okhurambiyia okuli omwimbichiti. Ekholanga omusaala kutendeema okhuniala, khandi ekhola okunialile okhutendeema. Nisie OMWAMI Nyasaye ouboolile, ne ndalakhola endio.”