Read wanga EZEKIELI 18 Bible Online

EZEKIELI 18 - wanga bible

EZEKIELI 18

¹OMWAMI Nyasaye niyareeba ari,

²“Mbushiina nimukalushilanga okhuchela oluchelo luboolungwa khubandu beshialo shia Isiraeli muri, ‘Basamwana abaana balia emitsabibu emichiishi, nebutswa ameeno kabaana babwe niko akafwa?’

³Isie OMWAMI Nyasaye emboola mbu, shinga olwa endiho mwoyo, inywe abandu ba Isiraeli shimwakhachelekhwo khandi oluchelo olwo tawe.

⁴Lola, obulamu bwabandu boosi nobwanje. Obulamu bwa samwana omwana nende bwomwanawe bwosi nobwanje. Omundu oukhola obwonooni niye oulafwa.

⁵“Omundu naba nali omulunjishi, ne nakholanga kamalako kenya, khandi akali ka habwene,

⁶naba naleenamilangakhwo ebifwanani ebia aboluyia lwa Isiraeli, noho okhuliakhwo khubiokhulia biemisango chikholelungwa ebifwanani tsana khubikulu ta, naba nalaheyangakhwo nomukhasi wabeene ta, noho okhuba nomukhasi ouli mutsinyangatsie ta,

⁷naba nalasandinjiakhwo owashie ta, nebutswa nakalusilinjia omundu owahola omusingokwe, naba nalanuulangakhwo omundu yesi yesi eshindushie ta, ne habula ahelesinjia abali inzala ebiokhulia, nafwala ouli eshiechenye,

⁸naba nali omundu oulahosinjia khulwa okhunyoolelakhwo injelesio ta, noho okhunyoola ebili ebinji tawe, owihanyanga okhurula khubumayanu, nebutswa akhalachilanga abandu eshiina munjila ya habwene,

⁹naba nali omundu oukholanga akokhwenya khwanje nalinda amalako kanje khandi nali omulunjishi, okhuula omundu oyo alaba mwoyo. Nolwa isie OMWAMI Nyasaye emboola.

¹⁰“Naba niyebula omwana omusiani ouli omunuuli khandi omwiri,

¹¹omwana oyo oukholanga obumayanu bwa samwana alaakholakhwo ta, nebutswa alitsanga ebiokhulia biemisango chikholeelwe ebifwanani mubikulu, nakhola akeshifwabi nende abakhasi babeene,

¹²asandinjia abamanani nende abatakha, nomunuuli khandi shiakalusinjia ebindu bia yeholile ta, yenamilanga ebifwanani nende okhukhola keshisinyo,

¹³ahosinjia khulwa injelesio khandi ameetanga inganga, kho, omwana shinga oyo mana yakhaba mwoyo? Shianyala okhuba mwoyo tawe, okhuba yakhola akeshisinyo ako koosi. Toto mwene okhuula afwe, ne amatsayike kakhabe khuye omwene.

¹⁴Nebutswa omundu oyo naba niyebula omwana oulola obwonooni bwosi obwa samwana yakhola, ne naria nalakalushila okhukhola ario ta,

¹⁵naba nalaliakhwo khu biokhulia biemisango kata okhwinamilakhwo ebifwanani biaboluyia lwa Isiraeli, noho okhufwabia omukhasi wabeene tawe,

¹⁶naloonoonelangakhwo omundu yesi yesi ta, kata okhuhosia ebieinjelesio, noho okhunuula omundu eshindu shishie ta, habula ahananga ebiokhulia khubali neinzala nende okhufwala abali eshiechenye,

¹⁷yehanyanga okhurula khu kobumayanu, khandi shiyehosinjiakhwo ebindu khulwa okhunyoola injelesio noho okhunyoola inganga ta, nebutswa alondanga amalako nende amebaalo kanje, omweneyo shialafwa khulwa obwonooni bwa samwana ta, okhuula alaba moyo.

¹⁸Nebutswa khulwokhuba samwana yakaatinjia abandu, nanuula nyinamwana ebindu khandi buli lwosi nakhola amakhuwa amabi mubandube, lola, alafwa khulwobumayanubwe.

¹⁹Nenyu mureebanga muri, ‘Mbushiina omwana nalasaandakhwo khulwa obumayanu bwa samwana?’ Omwana naba nakhola akakwanile nende aka habwene, khandi naba narakhwo omwoyo okhukhola shinga olwa ameebaalo koosi kenya, toto mwene okhuula alaba mwoyo.

²⁰Omundu oukhola obwonooni niye oulafwa. Omwana shialahelesibwakhwo eshinyasio khulwobumayanu bwa samwana ta, kata samwana omwana shialahelesibwakhwo eshinyasio khulwobumayanu bwomwanawe tawe. Omundu omulunjishi yakhanyoole akakwaniile abalunjishi, naye omumayanu yakhetuushe obumayanubwe omwene.

²¹“Nebutswa omundu omumayanu naba niyekalukhasia nalekha obumayanubwe bwosi, ne nakhola kobulunjishi nende okhulonda ameebaalo kanje koosi, toto mwene alaba mwoyo, shialafwa tawe.

²²Obumayanubwe bwosi obwa yakhola shibwakhetsulilwekhwo khandi ta. Nebustwa yakhabe mwoyo khulwa kobulunjishibwe bwa yakhola.

²³Isie OMWAMI Nyasaye ereeba mbu, toto mwene ndakhachamisibwa nokhufwa khwomundu omumayanu? Kata nahatutu ta. Habula enjamisibungwa nomundu omumayanu owikalukhasia nalekha obwonoonibwe, ne naba mwoyo.

²⁴Nebutswa omundu omulunjishi nalekha okhukhola kobulunjishibwe, ne nakhola kobumayanu nende kebisinyo kabamayanu bakholanga, mana yakhaba mwoyo noho? Kata nahatutu ta. Akobulunjishi kayakhola ako shikakhetsulilwekhwo khandi tawe. Yakhafwe khulwa obubatsa nende obwonooni bwa yakhola.

²⁵“Nenyu muboolanga mbu, aka OMWAMI Nyasaye akholanga shikali habwene tawe. Bulano hulile inywe aboluyia lwa Isiraeli, mulolanga mbu akekholanga shikali habwene ta? Shikali akamukholanga akalali habwene ta?

²⁶Omundu omulunjishi nalekha okhukhola akobulunjishi, ne nakhola akobumayanu, alafwa khulwa obumayanubwe omwene.

²⁷Khandi omundu omumayanu nalekha akhukhola akobumayanu, ne nalonda amalako khandi nakhola akobulunjishi, omwenoyo yakhahonokosie obulamubwe.

²⁸Shichila yayililisia ne nalola akobumayanubwe ne niyekalukhasia nalekha akobumayanu obwo, toto mwene, yakhabe mwoyo, shiyakhafwe tawe.

²⁹Kata kario, aboluyia lwa Isiraeli baboolanga bari, ‘Aka OMWAMI Nyasaye akholanga shikali habwene tawe.’ Inywe aboluyia lwa Isiraeli, toto mwene aka isie ekholanga shikali habwene ta? Shikali aka inywe mukholanga akalali aka habwene?

³⁰“Khulweshio, isie OMWAMI Nyasaye emboola mbu, ndalamuhelesia eshinyasio, inywe aboluyia lwa Isiraeli, buli mundu okhulondokhana nende ebikholebie omwene. Mwikalukhasie, muleshe okhukhola kobumayanu bwenywe bwosi, nebustwa, bulamusishia.

³¹Mwihanye okhurula khubumayanu bwenywe bwosi obwa mwakholela isie. Mube namapaaro amayia nende omwoyo omuyia. Inywe aboluyia lwa Isiraeli, mbushiina musishe?

³²Isie OMWAMI Nyasaye, shienjamisibungwa nokhufwa khwomundu yesi yesi tawe. Kho mwikalukhasie mube mwoyo.”