Read wanga EZEKIELI 19 Bible Online

EZEKIELI 19 - wanga bible

EZEKIELI 19

¹OMWAMI Nyasaye yamboolela mbu ndimbile abemilisi babili ba Isiraeli olwimbo lwokhwikhuula endi,

²Nyinenywe yali italanyi imbalaba mutsiashie! Yakonanga hakari wetsitalanyi tsimbuukha, niyinunia abaana bayo.

³Yakhusia mulala khubaana bayo abo, okhuula niyekhola italanyi imbuukha, nayo niyeeka okhuyiima, nende okhulia abandu.

⁴Amahanga kandi kahulila khu keitalanyi eyo, nikakhupa olwika lwokhuchiseera, niyikwa mubuko bwa bali nibarechile. Bachikhwesa netsisako, nibachiyila mubuhambe mushialo shia Misiri.

⁵Olwa nyinamwana italanyi imbuukha eyo yalola mbu yichoonyile okhuliindilila, obunaayi bwayo nibuhwele, yabukula omwana wayo undi, niyimukhola okhuba italanyi imbuukha imbalaba.

⁶Olwa yali niyikhulile niyikaliiye, yachaaka okhusoolooka eyi nende eyi netsiashie. Yosi khandi niyeeka okhuyiima, nende okhulia abandu.

⁷Yalikulula tsingoba tsiabandu, niyisasia amatookho kabwe. Abandu beshialo eshio batiilungwa neindenga, buli olwa bahulilanga okhuhoola khwayo.

⁸Mana abandu bamahanga kandi nibachisanjilila okhurula tsimbeka tsiosi, nibareka emireko chiokhuyitiila, nayo niyikwa mubuko obwa bali nibarechile.

⁹Bachikhwesa netsisako nibachira mundindi, nibachiyila khumuruchi wa Babuloni. Bachira mubulindi obutinyu, mbu kata okhuhoola khwayo khuleshe okhuhulilikhakhwo khandi khubikulu bia Isiraeli tawe.

¹⁰Mamawo yali butswa shinga omutsabibu, okwaraakwa mumukunda kwokhumwalo. Kwalikhwo amasaka amanji khandi nikwetsulakhwo ebiamo, shichila kwali nikwaraakwa khumwalo.

¹¹Amasaka kakwo kali kamaani, nikakaasibwakhwo indabushi yomuruchi. Omutsabibu okwo kwarambiya muno hakari wemisaala chindi chiosi. Buli mundu yalola shinga olwa kwali omutendemu, khandi omurambi muno.

¹²Nebutswa omutsabibu okwo kwasiulwa mwiruma, nikukwisibwa hasi. Kwomibwa nomuyeka okhurula ebukwe, ebiamo biakwo nibibungulukha, amasaka kakwo kamaani nikaniala nikooma, ne nikasambwa nomulilo.

¹³Ne bulaano kwasiulwa nikurakwa mushiangalamwe, mushialo eshiumu eshibulamwo amaatsi.

¹⁴Omulilo kwarubukha mushisina shiakwo, nikusamba amasaka kakwo nende ebiamo biakwo, kho mbu lisaka liamaani liosi liosi lileshe okhutong'akhomwo, kata indabushi yomuruchi okhukaasibwakhwo tawe. Luno nolwimbo lwokhwikhuula, mana lwimbungwa lurio ebisoni nebisoni.