Read wanga EZEKIELI 21 Bible Online

EZEKIELI 21 - wanga bible

EZEKIELI 21

¹OMWAMI Nyasaye yamboolela ari,

²“Mwana womundu, shiukhana ohenje litookho lia Yerusalemu, mana ofukule habundu wabwe hatakatifu, orumbule akobulakusi khwihanga lia Isiraeli,

³noboolela abandu ba Isiraeli mbu, isie OMWAMI Nyasaye emboola mbu, emufukuule inywe. Ndalatsomola olukanga lwanje okhurula muluula lwalwo nende okhwira abandu, abalunjishi nende abamayanu.

⁴Okhurula emasaba okhuula emulambo ndalamulula abandu boosi nolukanga lwanje, abalunjishi nende abamayanu.

⁵Mana abandu boosi balamanya mbu, isie OMWAMI Nyasaye nisie outsomoole olukanga okhurula muluula lwalwo, ne shilulakalusibwamwo khandi ta.

⁶“Nawe, mwana womundu, wikhuule, wikhuule obululu neshibeela shinga omundu oubula obunaayi buli omundu nalola.

⁷Ne olwa bakhureeba bari, Wikhuulanga mbushiina? Obakalusie ori, Ndikhuulanga khulwa amakhuwa ketsanga. Olwa ketsa, buli mundu alafwa omwoyo, amakhono koosi kalafwokoya, emioyo chiosi chilafwililila nako amasikamo koosi kalatechela. Toto amakhuwa ako kaletsa, ne kaleekholekha. Nolwa isie OMWAMI Nyasaye emboola.”

⁸Khandi OMWAMI Nyasaye niyamboolela ari,

⁹“Mwana womundu, rumbula obulakusi noboola mbu, OMWAMI Nyasaye aboola mbu, olukanga, olukanga luyiakaalwe, mana lurutilwe,

¹⁰luyiakaalwe khulwa okhwira, lurutilwe lung'inang'ina nilumwesukha shinga oluhenu! Mulekhoye ta, eshinyasio shitsanga, okhuba inywe mwesi mwalechelesia obuchetsiyi bwanje.

¹¹Olukanga luhanilwe mbu lurutwe, mbu lurechekhwe khulwa okhwikhoonyelwa. Luyiakaalwe khandi lurutilwe, mbu luhelesibwe omwiiri.

¹²Mwana womundu, haaba niwikhuula, okhuba olukanga olwo nolwokhwiira abandu banje, nolwokhwiira abemilisi ba Isiraeli boosi. Abemisilisi nende abandu banje boosi baleerwa nolukanga. Mwifumbelele mushilifu khulwa eshibeela.

¹³Isie emuteemanga, nimuba nimulekalukhasia ta, amakhuwa ako koosi kalamwitsila.[1]

¹⁴Khulweshio mwana womundu, rumbula akobulakusi. Khupa tsikhofi, mbu olukanga lureme khabili, kata khataru. Olukanga nolwokhwiira. Olukanga lwokhusinza abandu abanji lubabotokhaane.

¹⁵Khulweshio, abandu banje bafwile emioyo, khandi abanji besichiralanga nibakwa habilibwa biabwe biosi. Erisiinjia litookho liabwe nolukanga, olukanga olung'inang'inanga nilumwesukha shinga oluhenu, olurecheekhwe khulwa okhwira.

¹⁶Rema abali khumukhono mukhasi, nende abali khumukhono musaatsa! Rema tsimbeka tsiosi.

¹⁷Siesi khandi ndalakhupa tsikhofi, liruma lianje lilahwa. Nolwa isie OMWAMI Nyasaye emboola.”

¹⁸OMWAMI Nyasaye yamboolela ari,

¹⁹“Mwana womundu, kaasia emihanda chibili chiomuruchi wa Babuloni aleetselakhwo nolukangalwe. Chiosi chibili chichachile mwihanga elala. Khandi okaasie eshimanyisio, shimanyie omuhanda kutsia mwitookho.

²⁰Oreho eshimanyisio shiomuhanda kutsia mwitookho lia Raba eliabandu ba Amoni, nashio eshindi shimanyie okutsia Yuda nende okutsia Yerusalemu, litookho liasirwa netsingoba.

²¹Okhuba omuruchi wa Babuloni asiinjiile mubuchachilo bwomuhanda, mumasanganjila mwemihanda chibili echio khulwa okhuupa ikha okhumanya okwaloondakhwo, nareesia obuyingo. Areeba okhurula khubanyasayebe nende okhuhenjelesia mushitakhaliira shieisolo yihaanilwe shinga omusango.

²²Mumukhonokwe musaatsa ikha yamanyia obuyingo obulolesia, ‘Yerusalem’ oburume mbu atsie arecheshe okuyini kwokhulikulula ebiliibwa, akhupe omulome kwelihe, arecheshe emiyini chiokhulikulula ebiliibwa, okhulikulula liloba nende okuyaba obuko.

²³Nebutswa khubandu ba Yerusalemu shibwitsa okhulolekha nibuli obufumu bwahabwene ta, khulwa eshitsubo eshia balia. Nebutswa abeetsusinjia akobumayanu bwabwe akalachila bareebwe mubuhambe.

²⁴Khulweshio, isie OMWAMI Nyasaye emboola mbu, khulwa okhuba mukholele aketsisoni kenywe okhwitsulilwa, nabwo obumayanu bwenywe nibubakalwa habulafu, abandu boosi balabulola khandi balamanya shinga muli abeshikha. Ndalabalekhuula mumakhono kabasuku benywe.

²⁵“Nawe iwe omuruchi wa Isiraeli omumayanu, inyangayo yimalile okhuula, ebise bieshinyasioshio biulile.

²⁶Isie OMWAMI Nyasaye emboola mbu, rusia eshilemba shili khumurwekwo, fwalula olusimbilwo. Amakhuwa kalakalukhana, abatakha balachinguulwa, nabo abaruchi baleshibwa hasi.

²⁷Obusasishi, obusasishi ndalasasia litookho. Nebutswa ako shikalekholekhakhwo ta, okhuula lwomweneko oukhoyeele okhukakhola yetsa. Niye owandahelesia obunyali bwokhusasia litookho elo.

²⁸“Iwe mwana womundu, rumbula obulakusi khuba Amoni okhulondokhana nende amakhuwa kabwe akokhwiyitsiala khubandu ba Isiraeli. Obaboolele mbu isie OMWAMI Nyasaye emboola mbu, Olukanga, olukanga lurechekhwe khulwa okhwira, luruutilwe khulwa okhumulula, lung'inang'nanga nilumwesukha shinga oluhenu.

²⁹“Amalolelo kamulolanga shikali akobwatieli ta, khandi obulakusi bwamurumbulanga nobwobubeeyi butswa. Inywe muli abonooni khandi abamayanu, inyanga yenywe yimalile okhuula, ebise bieshinyasio shienywe biulile.

³⁰Kalusie olukanga muluula lwalwo. Ndalamukhalachila eshiina habundu ha mwalonjelwa, mushialo shia mwebulilwamwo.

³¹Ndalamumalilakhwo liruma lianje, ndalamurubulilakhwo omulilo kweliruma lianje. Khandi ndalabahana mumakhono ka abandu ababula tsimbabasi khandi abasitsa mukokhusasia.

³²Mulaba tsikhwi mumulilo, mulafwila mushialo shienywe shiene, ne shimuletsulilwakhwo khandi ta. Okhuba isie OMWAMI Nyasaye, nisie ouboolile.”