Read wanga EZEKIELI 22 Bible Online

EZEKIELI 22 - wanga bible

EZEKIELI 22

¹OMWAMI Nyasaye khandi yamboolela ari,

²“Iwe mwana womundu, toto olakhalachila litookho lietsulamwo eshitsayi lino eshiina? Kho olirumbulile akeshisinyo kalio.

³Oliboolele mbu, isie OMWAMI Nyasaye embola mbu, iwe oli litookho eliratsinjia eshitsayi shia abandubo beene khandi abandubo bekasilinjia ebifwanani biabanyasaye bandi khulwa okhwifwabia abeene, khulweshio ebisebio biokhukhalachilwakhwo eshiina bimalile okhuula.

⁴Oli neshikha khulwa eshitsayi shia waraatsia, khandi khulwa okhwikasilia ebifwanani biabanyasaye. Khulweshio omalile okhusitia inyangayo ahambi, induukhoyo eyalobolwa khale yimalile okhuula. Ekhukholile linyeko khubandu bamahanga kandi, khandi okwile inzekho khubandu bebialo bindi boosi.

⁵Abandu boosi bebialo biahambi nende biehale balakhutsesheelela khulwa obumayanu nende obukoyanubwo.

⁶Abemilisi ba Isiraeli abamenya mwiwe, buli mulala khubo yekhoonyelanga obunyali bwa ali ninabwo khulwa okhuraatsia eshitsayi.

⁷Abulaho mwiwe ouhelesinjia samwana noho nyinamwana oluyali. Omurende owamenya mwiwe anuulungwa emianduchie. Abaana ababisandu nende abakhasi abalekhwa abali mwiwe basandibungwa.

⁸Iwe ofwolanga ebindu bianje ebitakatifu, khandi shiolindanga inyanga yanje yeisabato tawe.

⁹Mwiwe balimwo abandu abachiishilanga abashiabwe mbu beerwe, khandi abandi bali mwiwe abaliitsanga ebiokhulia ebikhooleelwe emisango khubikulu. Abandubo bakholanga obwilaasi imbeliwo.

¹⁰Mwiwe balimwo abasaatsa abakonanga nende abakhasi babasamwana. Abandi banichilisinjia abakhasi okhukona ninabo olwa abakhasi abo baba nibali mutsinyanga tsiabwe.

¹¹Abandi bakholanga eshifwabwi shiokhuheya nabakhasi babamenyani babwe. Abandi nabo bakonanga nabakhasi babaana babwe abasiani, nabo abandi bakholanga eshifwabwi nabaana babwe abakhaana aba samwana yebula elwanyi.

¹²Mwiwe balimwo ababukulanga ebiomufuusi mbu baraatsie eshitsayi, abandi bameetanga injelesio khulwa okhwibila abamenyani babwe. Ne bayanzibilila isie. Nolwa isie OMWAMI Nyasaye emboola.

¹³“Khulweshio, lola, bulaano efumba ebifuusi bianje okhukhukhupa khulwa inganga ya wenyoolela munjila yilali ya habwene ta, khandi khulwa eshitsayi shia waraatsia.

¹⁴Mana toto olanyala okhuuma ikholo, kata amakhonoko kalaba namaani okhulwana? Isie OMWAMI Nyasaye nisie ouboolile, ne okhuula ndalakakhola.

¹⁵Ndalasalaasia abandubo mumahanga kandi nende mubialo bindi. Ndalakhurusiamwo eshifwabwishio eshio.

¹⁶Khandi ndalakhola amahanga kandi okhukhufwola, nebutswa iwe olamanya mbu, isie nisie OMWAMI Nyasaye.”

¹⁷Mana OMWAMI Nyasaye niyamboolela ari,

¹⁸“Mwana womundu, aboluyia lwa Isiraeli khwisie bali shinga amakokha butswa, bali butswa shinga amakokha keifetsa, akomukasa, akelibaati, akeshibia nende akolusasi, akatong'anga olunyuma lweshibia okhusambwa mumulilo kwelirumbi.

¹⁹Khulweshio, isie OMWAMI Nyasaye emboola mbu, khulwa okhuba mwesi muli butswa shinga amakokha, ndalamukhung'asia mwesi mwitookho lia Yerusalemu.

²⁰Shinga olwa abandu bakhung'asinjia ifetsa, omukasa, eshibia, olusasi nende libaati nibabisambila mumulilo kwelirumbi mbu kho bisialulwe, nolwa ndalamukhung'asia endio mwiruma lianje lilulu, nenywe mulasaalulukha murio.

²¹Ndalamukhung'asia mu Yerusalemu, nemubwanakhwo omulilo kweliruma lianje, nenywe mulasialulukha.

²²Musialulukha butswa shinga olwa ifetsa yisialuluungwa mumulilo kwelirumbi, nolwa mwesi mulasalulwa murio mu Yerusalemu. Mana mulamanya mbu, isie OMWAMI Nyasaye nisie oumumalilekhwo liruma lianje.”

²³OMWAMI Nyasaye yamboolela khandi ari,

²⁴“Mwana womundu, boolela abandu ba Isiraeli mbu, eshialo shiabwe shishili eshitakatifu tawe, khulweshio eshihelesinjia eshinyasio mwiruma lianje.

²⁵Abemilisi bashio bali shinga italanyi eyihoolanga niyirandula eshioluyitsi shiayo. Beeranga abandu, nibanuula abandu emiandu chiabwe nende ebiobukusi biabwe; benjiyinjia obunji bwabakhasi abalekhwa khulwa okhwira abasaatsa babwe.

²⁶Abesaaliisi babwe bafunakanga amalako kanje, khandi bafwola ebindu bianje ebitakatifu. Shibahukhasinjia hakari webindu ebitakatifu nende ebilali ebitakatifu ta, khandi shibechesinjia abandu okhwahukhasia hakari webiomusilo nende ebilali biomusilo ta. Bafwolanga inyanga yanje yeisabato, khulweshio Abaisiraeli bafwolanga eliira lianje.

²⁷Abemilisi babwe bali shinga tsiifisi etsirandulanga eshioluyitsi shiatsio, baratsinjia eshitsayi khulwa okhwinyoolela inganga eyilali yahabwene tawe.

²⁸Abalakusi babwe babisanga obwonooni bwabwe obwo shinga lwomundu yakhabakha olufuyo khwisiisi limali ti. Babalolelanga amalolelo kobubeeyi nende okhubalakulila akobubeeyi. Beechikhanga nibaboola mbu, ‘Nolwa OMWAMI Nyasaye aboola.’ Nebutswa isie OMWAMI Nyasaye shiebabooleelekhwo likhuwa liosi liosi tawe.

²⁹Abandu ba Isiraeli bakholile akeshisinyo khandi akobunuuli; basandinjia abamanani nende abatakha nende okhunuula abarende bali mubo.

³⁰Kho ndakhabilisia mubo omundu owakhombaashe lisiisi nende okhusinjila mushibanga hakari wanje ninabo, kho mbu endeshe okhubamulula, nebutswa shindanyoolamwo kata mulala tawe.

³¹Khulweshio, ndabamalilakhwo liruma lianje, nebamulula nomulilo kweliruma lianje nende okhubahelesia eshinyasio okhulondana nebikhole biabwe abeene. Nolwa isie OMWAMI Nyasaye emboola.”