Read wanga EZEKIELI 23 Bible Online

EZEKIELI 23 - wanga bible

EZEKIELI 23

²“Mwana womundu, baliho abakhaana bomunzu ndala babili, aba nyina mulala.

³Nibashili abakhaana nibamenya mushialo shia Misiri, bakhola obutamba, nibafuchilila tsimbeele tsiabwe okhufiinywa, ne nibakosia obushisira bwabwe.

⁴Eliira liomukhaana omukhulundu liali Ohola, ne elia omukhaana wabwe omushe liali Oholiba. Boosi nibaba abanje, nibanzibulila abaana abasiani nende abakhaana. Ohola nilio Samaria, nalio Oholiba nilio Yerusalemu!

⁵“Kata olwa Ohola yali owanje, yatsiililila okhukhola obutamba nende okhwikomba abatiabe ba Asiria,

⁶nibo abelihe abali nibefwala tsingubo tsiobukondo bwa isambarao, bali abakhongo khandi abemilisi bamahe, khandi bali abaraaka belikondo lilayi abachendelanga khutsifarasi.

⁷Ohola yakhola obutamba nende abemilisi ba Asiria, mana obwikombibwe nibumukhola okhuba omumayanu khulwa okhwinamila ebifwanani bia Asiria.

⁸Ohola shiyalekha okhukhola obutamba bwa yakholanga nashili Misiri tawe; okhuba nashili omukhaana abasaatsa bakona ninaye khandi nibasasia obushisilabwe nende okhwilaasia ninaye.

⁹Khulweshio, ndamuhana mumakhono kabatiabe, mumakhono kabandu ba Asiria, abo abelasinjia ninaye.

¹⁰Abandu abo bafuunula eshiechenyeshie, nibahamba abaanabe abasiani nende abakhaana, mana nibamwiira nolukanga. Eshinyasio shia yanyoola eshio nishiba elieko khubakhasi bandi abamutseshelelanga buli habundu.

¹¹“Naye Oholiba, omukhaana wabwe yalola ako, nebutswa yatsiililila okhukhola obutamba kata okhushilakhwo omukhaana wabwe Ohola.

¹²Oholiba yesi yakhola obutamba nende abemilisi ba Asiria, abakhongo khandi abemilisi ba lihe, abelihe abali nibafwala ebiifwalo biabwe bia lihe khandi abachendelanga khutsifarasi, boosi khandi bali abaraaka belikondo lilayi.

¹³Mana ndalola mbu yesi nomutamba, ye halala nomukhaana wabwe bali nebiima bilala.

¹⁴Nebutswa Oholiba yatsiililila nobutambabwe, yalola ebifwanani biabandu basaatsa ebialongwa khwisiisi nende ebia Abababuloni ebiali nibiachoorwa khwisiisi nibiabakhwa iranji inzakhanyu.

¹⁵Khandi biali nemikoye mubishienje biabwe nende ebilemba ebikhongo khumirwe chiabwe; biosi biafwana shinga abemilisi ba Babuloni, abeebule beshialo eshio.

¹⁶Olwa Oholiba yalola ebifwanani ebio, yabikomba nakhola obutamba ninabio, naruma oburume khubo mushialo shia Babuloni.

¹⁷Mana abandu ba Babuloni nibetsa nibakona ninaye, nibamufwabia nende okhwilaasia ninaye. Namalile okhwifwabia ninabo, yashiukhana nabarulakhwo.

¹⁸Olwa yebakala habulafu nende okhwifunula eshiechenyeshie, ndasinyikha neshiukhana okhurula khuye nemwibala shinga olwa ndebala omukhaana wabwe.

¹⁹Ne kata kario yatsiililila butswa nobutambabwe, niyetsulila tsinyanga tsia yali nashili omukhaana, olwa yakholanga obutamba nende abandu beshialo shia Misiri.

²⁰Yakhola obutamba nabasaatsa bobwikombi obubi shinga bweisishili khandi abali namaani amanji shinga akeifarasi.

²¹Kho Oholiba yekomba obumayanu bwa yakhola nashili omukhaana mushialo shia Misiri, ebweneyo abandu ba Misiri bonoonia obushisirabwe, nibafinya tsimbeeletsie.”

²²“Khulweshio, isie OMWAMI Nyasaye ekhalaka khwiwe Oholiba endi, ndalakhola abatiabo abawashiukhana nobalekha, bakhubuushilekhwo nibakhuseera okhurula tsimbeka tsiosi.

²³Ndalatsuuba abandu ba Babuloni nende Abakalidayo boosi, aba Pekodi, aba Showa, aba Kowa, halala nende aba Asiria boosi. Ndalatsuuba abaraaka belikondo lilayi, abakhongo nende abemilisi belihe boosi, abakhongo nende abalwani nende boosi abachendelanga khutsifarasi.

²⁴Balakhuseera okhurula emasaba nibali namakaari kelihe nende abelihe abanji. Balakhuseera okhurula tsimbeka tsiosi nibali netsingabo, nebikhumba nende tsikutwa tsieshibia, nasi ndalakhuhana mumakhono kabwe nabo balakhukhalachila eshiina okhulondana namalako kabwe.

²⁵Khulwa okhuba ekhusinyishiile, ndalabalekha bakhukholele akabeenya mwiruma liabwe. Balakhukhalaka amoolu nende amarwiko, nabo abalatong'a balamululwa nolukanga. Balahamba abaanabo abasiani nende abakhaana, nabo abalatong'a balamululwa nomulilo.

²⁶Khandi balakhufwalula tsingubotsio nende okhukhunuula oruchina rwenywe orung'inang'inu khandi orwobukusi.

²⁷Nolwa ndalaakamia obwikombibwo obubi nende obutambabwo obwa warusia Misiri. Shiwakhekombekhwo ebifwanani ebio kata okhwitsulilakhwo eshialo shia Misiri tawe.

²⁸“Khulweshio, isie OMWAMI Nyasaye emboola mbu, ndalakhuhana mumakhono kabandu ba wasila, mumakhono kabandu ba washiukhana nobarulakhwo.

²⁹Ne khulwa okhubeela bakhusila, balakhunuula buli shindu shia wanyoola khulwa oluchesilwo, nende okhukhufwalula ebiifwalobio nibakhulekha eshiechenye, mana eshiechenye shiobutambabwo shilabakalwa habulafu. Obwikombibwo nende obutambabwo,

³⁰nibio ebireerire kano khwiwe. Iwe wakhola obutamba nende amahanga kandi niwiyonoonia nebifwanani biabwe.

³¹Walondile injenda yomukhaana wenywe, khulweshio ndalakhuhelesia eshinyasio shilala tsana eshio.

³²“Isie OMWAMI Nyasaye emboola mbu, Olaheebwa eshinyasio shilia shiomukhaana wenywe yaheebwa, nashio shilaba eshikhongo khandi eshilulu; olanyekwa nende okhutsesheelelwa, okhuba eshichelo shiitsuule tu.

³³Shilakhumeesia nende okhukhubelesia muno. Eshinyasio shiokhuhuchisia khandi shiobusasishi, nishio eshinyasio shiomukhaana wenywe Samaria;

³⁴Olashinywa nende okhushimala shiosi pe, khandi olashiarakamwo ebitonye, olekhoonyela ebitonye ebio okhukhwaara tsimbeeletsio. Okhuba isie OMWAMI Nyasaye nisie ouboolile.

³⁵“Khulweshio isie OMWAMI Nyasaye emboola endi, khulwa okhuba iwe wanzibilila khandi niukhupila omukongo, olanyoola omurungo kwobwikombibwo nende obutambabwo.”

³⁶OMWAMI Nyasaye yamboolela ari, “Mwana womundu, olabakhalachila eshiina Ohola nende Oholiba? Kho barumbulile ebikhole biabwe bieshisinyo biabakhola.

³⁷Okhuba bakhola obuheyi nende obwiiri. Bakhola obuheyi khulwa okhwinamila ebifwanani, nabwo obwiiri khulwa okhuhaana shinga omusango abaana aba bali nibanzibulila.

³⁸Okhumeetakhwo, banzonoonela khulwa okhufwabia Ihekalu yanje indakatifu nende okhufwola tsinyanga tsianje tsia Isabato.

³⁹Okhuba khunyanga ndala yene eyo, olwa bali nibamalile okhwira abaana babwe okhubahaana khubifwanani shinga omusango, benjila muhekalu yanje nibachifwabia. Ako niko akabakhola munzu yanje.

⁴⁰“Akhandi akhanji baruma abarume batsie balanje abandu okhurula ehale, ne toto beetsa. Khulwa okhubachamisia, beesinga nibebakha ipala khubisiche bietsimoni tsiabwe, nibesiaha nebimili.

⁴¹Bekhalanga khubifumbi ebilayi, ne imbeli wabwe nibabarenjesheele tsimeesa etsialilwekhwo tsingubo tsindayi nende okhureebwakhwo obubaane bwanje nende amafura kanje.

⁴²Omwoyo kwahulilikha kwomukanda kwabandu abalateeba eshindu ta, omukanda kwa abasaatsa abameesi, abeetsa okhurula mushitsiimi. Bafwala tsinyolo khumakhono kabakhasi abo, nende okhubafwala olusisimbi olulayi khumirwe chiabwe.

⁴³“Mana nindiireeba omwene endi, ‘Mana toto abasaatsa bano baheyanga nomukhasi watsaalaasibwa nobutamba uno?’[2]

⁴⁴Batsiililila butswa okhuheya nabakhasi abamayanu bano, Ohola nende Oholiba.

⁴⁵Nebutswa abasaatsa abalunjishi, abakhalakanga eshiina habwene balabakhalachila eshiina khulwa obuheyi bwabwe nende obwiiri bwabwe, okhuba nabaheyi khandi abeeri.

⁴⁶“Khulweshio, isie OMWAMI Nyasaye emboola mbu, omukanda kwa abandu kulareerwa okwokhubaseera, okhubariisia nende okhubayaaya emiandu chiabwe chiosi.

⁴⁷Omukanda okwo, kulabalasa namachina, kulabaseera netsinganga tsiabwe nende okhubeera; kuleera abaana babwe abasiani nende abakhaana, nende okhusamba tsinzu tsiabwe.

⁴⁸Nolwa ndalarusiaho obuheyi bwabwe mushialo shiabwe, kho mbu, abakhasi boosi barie khandi baleshe okhukhola obuheyi shinga olwa inywe abakhaana babili mwakhola.

⁴⁹Inywe Ohola nende Oholiba, mulakhalachilwa eshiina okhulondokhana nende obuheyi bwenywe, khandi mulanyoola eshinyasio khulwa obwonooni bwenywe bwokhwinamila ebifwanani; nolwa mulamanya mbu, isie nisie OMWAMI Nyasaye.”