Read wanga EZEKIELI 24 Bible Online

EZEKIELI 24 - wanga bible

EZEKIELI 24

¹Khunyanga yekhumi, yomumwesi kwekhumi, mumuyika kwashienda, okwobuhambe bwefwe, OMWAMI Nyasaye yamboolela ari,

²“Mwana womundu, handika itare yeinyanga yolwaleelo luno, okhuba yino niyo inyanga yomuruchi wa Babuloni achaaka okhubotokhana nende okhwikalila litookho lia Yerusalemu.

³Boolela abandu banje abakhayi oluchelo luno mbu, isie OMWAMI Nyasaye emboola endi, Rechekha inyungu, chirecheshe khumayika obulayi, tsukhamwo amaatsi,

⁴Ramwo ebitonye bieinyama, ebitonye bieshiatakho nende bieshiambeli, yitsusiamwo amakumba amanulu.

⁵Bukulamwo likondi elianera, bunjikha ebisichiri bietsikhwi hasi weinyungu eyo, teekha ebitonye bieinyama nende amakumba ako obulayi.

⁶“Khulweshio, isie OMWAMI Nyasaye emboola mbu, litookho eliaraatsia eshitsayi lili mushilaamo shiobubi. Litookho elo lili shinga inyungu eyakhupa olukukhu, eyolukukhu lwayo lulanyala okhukhulukunywa tawe! Ebitonye bieinyama ebio birusibungwemwo shilala shilala, obulalekhakhomwo kata shilala tawe.

⁷Okhuba amatsayi kabandu ba Yerusalemu baraatsia kali mwitookho elo, kasundulwa butswa khulwanda, shikaasundulwa hasi khwiloba, kho mbu kafuunikhwe nolufu tawe.

⁸Khulwa okhubuusia liruma lianje, khandi khulwa okhumala eshikwoli, embakaale habulafu amatsayi kabaraatsia ako, kho mbu kaleshe okhufuunikhwa nolufu.

⁹“Khulweshio isie OMWAMI Nyasaye emboola mbu, litookho eliaraatsia eshitsayi elo, lili mushilaamo shiobubi! Isie ndalabunjikha tsikhwi.

¹⁰Ndalabunjikha emisichiri chietsikhwi, mana embwane omulilo; ndalalunga inyama okhuula olwa yikhamulukha, khandi ebikumba biyie bilale.

¹¹Mana erenjeshe inyungu ikhaya eyo khumayika mbu yiyie pia, yilale, kho mbu yisialulushe, olukukhu lwayo luhwemwo lwosi pe.

¹²Ne kata kario, enyakhaanenje butswa eshikhaya, olukukhu lwayo shilurulangamwo lwosi, kata nilusaambwa mumulilo tawe.

¹³Iwe Yerusalemu, obumayanubwo bwakhufwola, kata olwa ekhusiiya, oshili butswa oweshifwabwi, shiwakhalabe ta, okhuula olwa ndakhakhumalilekhwo liruma lianje liosi.

¹⁴Isie OMWAMI Nyasaye, nisie ouboolile. Okhuula ndakhakhole akemboolile. Shindakhakalushe inyuma kata okhubabeela tsimbabasi tawe. Ndakhabakhalachile eshiina okhulondokhana neinjenda yenywe nende ebikhole bienywe, nolwa isie OMWAMI Nyasaye emboola.”

¹⁵Mana OMWAMI Nyasaye niyamboolela ari,

¹⁶“Mwana womundu, endi hambi okhubukula obulamu bwoyo owa waheela muno, ne shiolekhuulakhwo noho okhuupa tsimbungu kata okhulila amasika tawe.

¹⁷Wikhuulile butswa mumwoyo, olakholakhwo amasikake tawe. Nebutswa wibohe eshilembashio khumurwe khandi wifwale ebilaaro mubilenje. Oleefunikhakhwo mumoni noho okhulia eshiokhulia shiabandu abali mumasika tawe.”

¹⁸Kho mumabwibwi ndaboola nabandu, ne khungoloobe omukhasi wanje nafwa. Ne mumabwibwi inyanga yalondakhwo, ndakhola shinga olwa ndali nembooleelwe okhukhola.

¹⁹Mana abandu nibandeeba bari, “Shiokhakhuboolelakhwo eshisina shiamakhuwa kano khwifwe, eshichila nokhola orio nishi?”

²⁰Mana nembaboolela endi, OMWAMI Nyasaye yamboolela ari,

²¹“Boolela aboluyia lwa Isiraeli mbu, ndalafwola Ihekalu yanje, inzu eyo eya beyitsialilanga khandi eyibachamisianjia mumoni tsiabwe. Abaana babwe abasiani nende abakhaana abatong'a Yerusalemu baleerwa nolukanga.”

²²Khulweshio inywe mwesi mulakhola shinga olwa isie ekholile. Shimuleefunikhakhwo mumoni kata okhuliakhwo eshiokhulia shiabandu bamasika tawe.

²³Mulaboha ebilemba bienywe khumirwe chienywe, nende okhufwala ebilaaro mubilenje bienywe. Shimuleekhuulakhwo kata okhulila ta, nebutswa mulang'aha khulwa obumayanu bwenywe nimubinda abeene khu beene.

²⁴Khulweshio, isie Ezekieli ndalaba eshilolelo khwinywe, mulakhola butswa shinga olwa ekholile. Olwa kano kamwitsila nolwa mulamanya mbu, OMWAMI Nyasaye, niye OMWAMI Nyasaye omwene mahe.

²⁵OMWAMI Nyasaye niyamboolela ari, “Nawe iwe, mwana womundu, khunyanga eyandakharusieho Ihekalu ya beesikanga, eyili obusaangaafu nende oluyali lwabwe, eyibachamisinjia nende okhubasangaasia, khandi ndakharusieho abaana babwe abasiani nende abakhaana.

²⁶Khunyanga eyo, owakhahonokoshe yakheetse okhukhuboolela amakhuwa ako.

²⁷Khunyanga eyo, wakhachaache okhulomaloma noboola nende owahonokokha oyo. Wakhachaache okhulomaloma khandi, ne shiwakhakhaywekhwo okhulomaloma khandi tawe. Nolwa wakhabe eshilolelo khubo, nabo bakhamanye mbu, isie nisie OMWAMI Nyasaye.”