Read wanga EZEKIELI 25 Bible Online

EZEKIELI 25 - wanga bible

EZEKIELI 25

¹OMWAMI Nyasaye yamboolela ari,

²“Mwana womundu, shiukhana ohenje abelihanga lia Amoni, orumbule obulakusi nobafukula.

³Obaboolele mbu, bareche eshirwi khu ka isie OMWAMI Nyasaye emboola mbu, inywe mwekhoya okhulola Ihekalu yanje niyifwolwa, khandi mwekhoya okhulola eshialo shia Isiraeli nishikwisibwa likunda, khandi mwekhoya okhulola aboluyia lwa Yuda nibayilwa mubuhambe.

⁴Khulweshio, ndalamuhaana khubetsimbia tsiebukwe okhumuseera inywe. Balombakha amaheema kabwe mwihanga lienywe nende okhumenyamwo. Balalia ebiamo bienywe nende okhunywa amabeele kenywe.

⁵Ndalakhola litookho lia Raba okhuba obwayilo bwetsingamia, nalio lihanga lia Amoni liosi lilaba eshitioli shiamakondi. Nolwa mulamanya mbu, isie nisie OMWAMI Nyasaye.

⁶“Isie OMWAMI Nyasaye emboola mbu, inywe mwakhupa tsikhofi nimwikhoya. Mwachaaya eshialo shia Isiraeli.

⁷Khulweshio ndalamuhaana mumakhono kamahanga kandi akalamunuula nende okhumuyaaya emiandu chienywe. Ndalamumulula mwesi pe, kho mbu muleshe okhubakhwo lihanga khandi, kata okhuba neshialo shienywe abeene ta. Nolwa mulamanya mbu, isie nisie OMWAMI Nyasaye.”

⁸OMWAMI Nyasaye aboola ari, “Khulwa akhuba abelihanga lia Moabu baboola mbu, aboluyia lwa Yuda bali butswa shinga amahanga kandi,

⁹ndalakhola amatookho akalindanga tsinzakho tsia Moabu kaseerwe, amatookho kabwe amalayi muno, niko Betsi-yeshimotsi, Baalimeoni nende Kiriatsaimu.

¹⁰Ndalahaana abeshialo shia Moabu halala nende abeshialo shia Amoni mumakhono kamahanga okhurula Ebukwe. Mana abelihanga lia Moabu shibakhetsulilwekhwo khandi ta.

¹¹Ndakhahelesia abandu ba Moabu eshinyasio. Nolwa bakhamanye mbu, isie nisie OMWAMI Nyasaye.”

¹²OMWAMI Nyasaye aboola ari, “Khulwa okhuba abandu ba Edomu beemalila eshikwoli khuboluyia lwa Yuda, nibarunga obubi khububi,

¹³ndalanyiila omukhono kwanje khulwa okhubahelesia eshinyasio, ndalabamulula boosi pe halala nemiruko chiabwe chiosi. Ndalakhola eshialo shiabwe okhukwa likunda, okhurula khwitookho lia Temani okhuula khu lia Dedani ndalabamulula nolukanga.

¹⁴Ndalemalila eshikwoli khubandu ba Edomu okhubirira khubandu banje ba Isiraeli, balakholela abandu ba Edomu okhulondokhana neliruma lianje, nolwa abandu ba Edomu balalola obusiro bweshikwoli shianje. Nolwa isie OMWAMI Nyasaye emboola.”

¹⁵OMWAMI Nyasaye aboola ari, “Khulwa okhuba abandu ba Filisiti beemalila eshikwoli abeene khulwa okhumulula abasuku babwe mwiruma,

¹⁶khulweshio isie OMWAMI Nyasaye emboola mbu, ndalanyiila omukhono khulwa okhuhelesia aba Filisiti eshinyasio, ndalamulula abandu ba Keretsi nende abamenya khunyanza boosi.

¹⁷Ndalemalila eshikwoli khulwa okhubahelesia eshinyasio mwiruma lianje lilulu. Balamanya mbu, isie nisie OMWAMI Nyasaye, olwa ebahelesia eshinyasio shianje.”