Read wanga EZEKIELI 26 Bible Online

EZEKIELI 26 - wanga bible

EZEKIELI 26

¹Khunyanga yambeli yomwesi khumuyika kwekhumi namulala nikhuli mubuhambe, OMWAMI Nyasaye yamboolela ari,

²“Mwana womundu, khulwa okhuba abandu ba Tiro basangaala nibatseshelela litookho lia Yerusalemu nibaboola bari, ‘Lola, eshiliibwa shia Yerusalemu shifunaakwe, shiasaame, kho khulenjilamwo khubamulule boosi pe.’

³“Khulweshio isie OMWAMI Nyasaye emboola mbu, ndalakhuseera iwe Tiro, khandi ndalareera amahanga amanji okhukhuseera, kaleetsa shinga amarunda komunyanza.

⁴Kalalikulula amasiisiko, nende okhufunaka eminaarachio. Khandi ndalaharakara lilobalio liosi notong'a butswa olwanda olukhaya.

⁵Tiro lilatong'a butswa shinga lichinga hakari weinyanza, liabanaabi betsinyeni babakalakhwo tsikhanda tsiabwe, okhuba isie OMWAMI Nyasaye nisie ouboolile. Khandi lilaba eshioluyitsi khubamahanga kandi.

⁶Nabo abali mumatookho karondokhane ninalio boosi khandi baleerwa nolukanga. Nolwa balamanya mbu, isie nisie OMWAMI Nyasaye.”

⁷“Isie OMWAMI Nyasaye emboola mbu, ndalareera omuruchi Nebukadineza, omuruchi wa Babuloni, omuruchi ourukanga abaruchi bashie, ouli netsifarasi namakaari nende abelihe abalwanilanga khutsifarasi, aleetsa nomukanda omukhongo kwabelihe okhurula emasaba.

⁸Aleera nolukangalwe abaana benywe abakhaana abamenya mumatookho. Alakaasia amasiisi kokhuniinilakhwo namuseera nende okhusinjisia eshituuli shiebikhumba biokhumuseera.

⁹Alarechekha emiyinichie chiokhulikulula lisiisi lienywe khandi alekhoonyela tsihaywa okhukwisia eminaara chienywe.

¹⁰Tsifarasitsie tsilaba tsinyinji kho mbu olufu lwatsio lulamutumuushila nilumufuunikha, nalwo oluyoka lwamakaarike lulareesia tsinzu tsienywe, olwa nabire naniinile khufarasi nende khumakaari niyenjila mubiliibwa bielitookho lienywe shinga owinjila mubiliibwa ebifunakwe.

¹¹Tsindekeyi tsietsifarasitsie tsiakhatubanjilile emihanda chienywe, naye yakheere abandu benywe nolukanga, natsio tsisiilo tsienywe tsiamaani tsiakhakwisibwe hasi.

¹²Bakhayaaye obuyinda bwenywe nende emiandu chienywe. Bakhakwisie amasiisi kenywe nende okhusasia tsinzu tsienywe tsindayi. Amachina kenywe nende tsimbao tsienywe nende liloba lienywe biakhasukunwe munyanza hakari.

¹³Ndakhakamie tsinyimbo tsienywe, nako amayoosi kamatungu kenywe shikakhahulilishekhwo khandi tawe.

¹⁴Ndakhamukhole okhukwa olwanda, mwakhakwe eshindu shiokhubakalakhwo tsikhanda, ne shimwakheyumbashekhwo khandi ta, okhuba isie OMWAMI Nyasaye emalile okhuboola.”

¹⁵“Isie OMWAMI Nyasaye ekhuboolela iwe Tiro mbu, olwa abandu abamenya mutsingongo tsiokhunyanza bakhahulile akokhukwakhwo nende okhwiirwa khwabandubo, bakhatiilwe neindenga.

¹⁶Mana abemilisi boosi bamahanga kokhunyanza bakharule khubifumbi biabwe bioburuchi, nibafwalula tsingubo tsiabwe tsioluyali nende tsikanzu tsiabwe tsieikitani. Bakhekhale hasi nibatechela. Bakhatiilwe neindenga buli shise nibahuchisibwa namakhuwa kakhukwilile iwe.

¹⁷Mana bakhakhwikhuule nibaboola bari, ‘Litookho liamanyikha muno khulukuku lweinyanza lisasiibwe, litookho eliali liamaani khunyanza, liabandu balio barukanga abandu abokhunyanza neshilifu, khandi eliali niliariisia abandu boosi!

¹⁸Khunyanga yokhukwakhwo, abandu bokhushikhalachinga batiilwa neindenga, khandi abebikhalachinga biomunyanza bahuchisiibwe nokhukwakhwo.’

¹⁹“Isie OMWAMI Nyasaye emboola mbu, olwa ekhukwisia likunda, shinga amatookho akabandu balamenyangamwo ta, olwa ekhufuunikha nemiyembo chiamaatsi, olwa amaatsi komunyanza kakhufunikha,

²⁰nolwa ndakhakhwishie emakombe, obeyo nende abo abafwa khale. Ndakhakhukhole omenye emakombe, mubusasishi bwakhale. Ne abulaho oulimenya mwiwe kata iwe okhubaho mushialo shia abalimwoyo ta.

²¹Ndakhakhole okhumalilikhakhwo okhuba khwamariisia, ne shiolihulilikhanakhwo khandi ta. Kata abandu nibakhukhaaba, shibakhakhunyoole ta. Nolwa isie OMWAMI Nyasaye emboola.”