Read wanga EZEKIELI 27 Bible Online

EZEKIELI 27 - wanga bible

EZEKIELI 27

¹Mana OMWAMI Nyasaye niyamboolela ari,

²“Bulano mwana womundu, yimba olwimbo lwokhwikhuula litookho lia Tiro,

³oboolele abandu ba Tiro, abamenyenga habwinjililo bweinyanza, abakholanga obukhala bweinganga nende abandu bokhunyanza mbu, isie OMWAMI Nyasaye emboola mbu, iwe Tiro, wiyitsialanga mbu oli owelikondo lilayi po.

⁴Tsinzakhotsio tsiuulanga munyanza hakari, abakhumbakha iwe bakhola likondolio okhuba lilayi po.

⁵Bekhoonyela emisaala emitarakwe okhurula Seneri, nende tsimbao tsiemisiita okhurula Lebanoni, okhukhukasilia omulingoti.

⁶Bakaasia emiikhochio okhurula khumiruba chia Bashani, nibang'ona obwelubwo netsimbao okhurula Kupro, nibabusiaha nameeno ketsinzofu.

⁷Amatangi ketsimeelitsio kakasibwa okhurula khungubo yeikitani indorotoro okhurula Misiri, akali eshimanyisioshio. Eshitsafushio shiali shiobukondo bwa buluu nende bweisambarao, okhurula mubikhalachinga bia Kupro.

⁸Abamenyani ba Sidoni nende ba Arawadi, nibo abali bokhuyila tsimeelitsio. Abasitsa okhurula Zemeri, nibo abayilanga tsimeelitsio.

⁹Abakofu okhurula Gebali nende abasitsa babwe, nibo abasubanga tsinzafwa tsietsimeelitsio. Tsimeeli tsiosi nende abeelema batsio, bakulasaninjia ebindu ninawe.

¹⁰“Abelihe okhurula Perisia, Ludi nende Libia, nibo abali abelihelio. Baachikha tsingabo nende tsikutwa tsiabwe mulwanyilwo, nibo abakhuhelesia oluyali.

¹¹Abelihe ba Arawadi nende aba Heleki babotookhana tsingobatsio khulwa okhutsiliinda. Nabo aba Gamadi bali muminaarachio. Baachikha tsingabo tsiabwe khumasiisi aketsingobatsio nibatsibotookhana khulwa okhutsiliinda. Bakhola likondolio okhuba lilayi po.

¹²Abandu ba Tarishishi bakhola obukhala ninawe shichila wali nemiandu eminji chia tsimbia tsiosi; bekhoonyela ifetsa, eshibia, amabaati nende amasasi khulwa okhukula emianduchio.

¹³Abakhala okhurula Yawani, Tubali nende Mesheki, bakulasania ebindu ninawe. Bakhuhelesia abakholi bemilimo nende ebikaye biomukasa khulwa okhukula emianduchio.

¹⁴Abandu okhurula Betsi-togarima bakulasia emianduchio nende tsifarasi, tsifarasi tsielihe nende tsipuri.

¹⁵Abandu okhurula Dedani bakhola obukhala ninawe, abandu abanji bokhutsinguku tsiokhunyanza nibo abakulanga emianduchio, bakhureerera ameeno ketsinzofu nende tsimbao tsiemisaala emiumu khulwa okhukula emianduchio.

¹⁶Abandu okhurula Edomu bakhola obukhala ninawe shichila wali nemiandu eminji muno; bakhureerera amachina amang'inang'inu, tsingubo tsiobukondo bweisambarao, tsieikitani etsianabwa, tsieikitani indorotoro, amachina akomunyanza nende aketsilulu khulwa okhukulaasia emianduchio.

¹⁷Abandu ba Yuda nende aba Isiraeli bakhola ninawe obukhala, bakulaasia emianduchio nende ingano, emiseituni, amakhuyu kambeli okhulaba, obuushi, amafura nende amalesi akeshing'ari.

¹⁸Abandu ba Damasiko bakhola obukhala ninawe shichila wali nemiandu eminji, bakulaasia ninawe idivai okhurula Heliboni nende obwoya obulafu,

¹⁹nende idivai okhurula Uzali. Bakulaasia eshibia, ebindu bieshiuya eshilayi nende ebieshing'ari khulwa emianduchio.

²⁰Abandu ba Dedani bakhola obukhala ninawe, nibakulaasia ninawe tsingubo etsiokhwaala khutsifarasi.

²¹Abaarabu nende abaruchi ba Kedari boosi bakhola obukhala ninawe, bakhukulaasia ebimeme biamakondi, amamiiku nende tsimbusi.

²²Abakhala okhurula Sheba nende Rama bakhola obukhala ninawe, bakulaasia emianduchio nende ebiluunjilo bieshiuya eshilayi, amachina amang'inang'inu nende itsahabu.

²³Abandu okhurula Harani, Kane, Edeni, Ashuru nende Khilimadi bakhola ninawe obukhala.

²⁴Bakulaasia ninawe tsingubo tsioluyali, etsiobukondo bwabulu etsialukhwa, nende emikeka chiamashindu echialukhwa obulayi, nichiabohwa halala khandi nichiabiikhwa obulayi.

²⁵Emianduchio chiachingwa netsimeeli tsikhongo tsia Tarishishi. Khulweshio wali butswa imeeli hakari weinyanza, niyitsuule emisiiko emisiro.

²⁶Abokhuyila tsimeelitsio batsiyila munyanza ehale, ne omuyeka okhurula ebukwe, nikuhutsa obutinyu nikufunaka tsimeelitsio.

²⁷Obuyindabwo, emianduchio, ebiobukhalabwo, abakholi bomutsimeelibo nende abokhuyila tsimeelitsio, abasitsabo bokhukaasia tsimeeli, abakholibo bobukhala, nende abelihebo boosi, nende omukanda kwosi okwali mutsimeelitsio boosi beyinikha nibasishila munyanza, khunyanga yokhumalilanwakhwo.

²⁸Tsimbungu tsiabokhuyila tsimeelitsio tsiahulilikha okhuula khulukuku lweinyanza.

²⁹Tsimeeli tsiosi tsiatong'a tsikhaya, abakholi bomutsimeeli nende abokhutsiyila barulamwo, nibatsia khulukuku lweinyanza.

³⁰Boosi bakhwikhuulanga obululu nibakhupa tsimbungu. Bepuuka olufu khumirwe chiabwe nibakalakala mwikoshe.

³¹Bebeka oluhala khulwa okhukhwikhuula, nende okhufwala ebifwalo biamakunia, bakhupa tsimbungu, nibakhwikhuula obululu.

³²Mukhulila khwabwe, bakhwikhuula nibaboola bari, ‘Wina owamululwakhwo shinga Tiro, hakari weinyanza?’

³³Olwa emianduchio chietsa okhurula mubialo biehale, wakhola abandu abanji okhwikura. Emianduchio eminji nende obukhalabwo, biakhola abaruchi abanji okhuyindihala.

³⁴Nebutswa bulano ofunachiilwe munyanza, hakari mulusiba lweinyanza. Emianduchio nende abeelemabo boosi, beyiniishe ninawe mulusiba lweinyanza.

³⁵Abamenya khulukuku lweinyanza bahuchisiibwe namasila kakhukwilile. Nabo abaruchi babwe batiililwe neindenga, bakhuniye obweni bwabwe khulweshibeela.

³⁶Abakholi bobukhala boosi bakhutseshelela! Iwe omalile okhuula khushiakamoshio eshiokhuriisia, ne shiwakhabekhwoho khandi ta ebisoni nebisoni.”